Czéj jidze sã bez wies Kluczi w tesznotny szlagóny wieczór,
a pôdający deszcz je jak òrganë w pòczëstny katrdrze, niespòsób
nie pòtkac w pòdswiądze dëchów zamiszkùjącëch nã przeklãtą
przez ledzy i zabôczoną przez Bòga krôjinã. To dëchë nadłebsczich
Kaszëbów – stalatnëch òbsôdzëlców ti zemi – Słowińców. Jich
twôrze ze stôrëch fòtografijów są kòmùdné i bùszné jak wkółleżné
błota. Równak fùl pòkù, dowiérné, wrosłé w swòją wanożënã,
historëją, dërchanié. Jesz w XIX w. biôtkòwalë z cëskã ermanizacëji,
jesz w pòłwie XXw mòżno bëło ùczëc tam kaszëbską mòwã w mionach
nôrzãdów, toniów jezór. Jaż wtim wszedna zmòra negò swiata
regła na nëch i zadëszëła. To czegò do kùńca nie ùdało sã
zrobic Miemcóm, Pòlôszë zdzejalë w cziles lôt pò wòjnie. Profesjonalnô
akcëjô germanizacëjnô nie zwënégòwa taczégò skùtkù, jak lëdzkô
głëpòta, chcëwòta i nieznónié. Paradoks historëji – Pòlôchòwie
zrobilë Miemców ze Słowianów i wëwiezlë jich do Miemiecczi.
Na mòjich òczach òdeszlë na wiedno ny, chterni nie bëlë ni
Pòlôszë ni Miemcë. Òni bëlë Kaszëbi – niczim wicy. Wiedno
czedë le przëbiwóm do ni sërowi krôjinë Słowińców, na héwòtnim
smãtôrzu, òdwiedzywóm jich grobë. Widzã tedë nëch cwiardëch,
bëlnëch lëdzy i wiém, że je ò co biôtkòwac. Òni wiedzelë,
że nôród to nie je le pusté słowò, że ni mòżno zmienic etosu
w zanoleżnoscë òd przesëniãtëch grańców. Òni wëbralë le rôz
– wiarã, tatczëznã, jãzëk. Delë przikłôd òdwôdżi, wëtrwałoscë
i bùchë. Mają straconé.
Adam Kleina
zaczątk
|