Niedôwno we Gduńskù naczãła wëchòdzëc Norda - ò czim më téż
pisalë. Niedôwno na Ùniwersytece rusził pierszi rok sztudiów
kaszëbisticznëch. Terô widzymë jak dzeje sã cos co mòże nie
je za bëlno widzec, le je nie mni wôżné. Kaszëbi na gduńsczi
Mòrenie brzątwią sã i baro aktiwno dzejają. Òstôł hénë założony
part ZK-P, co tidzéń òdbiwają sã zéńdzenia, co niedzelã msze
swiãté z kaszëbską lëturgëją.
Kaszëbizna wôrcô do Gdunska -czëjã jak wiele sërc tak krziczi
z redoscë. Pò wielu latach gôdaniô, że ze Gduńska ùdało sã
wënëkac wszëtczich Kaszëbów - wejta le - je jich wcyg dosc.
Do tegò - rzecz jasnô - baro wiele Kaszëbów mieszkającëch
we Gduńskù dzysô, mô przejachóné do najégò gardu pò wòjnie
z jinszëch strón Kaszub. Baro to ceszi, że ti chterny zamieszkalë
tuwò wëstrzód różnëch lëdzy z różnëch strón, rozmielë ùtrzëmac
swòjã juwernotã. Nie delë sã wcygnąc we wiôlgą dënëgã, we
chterny kòżden zabôcziwô skądka je, kògùm je ë jak sã nazéwô.
Le tak dali! Jô czôrno widzôł przińdotã kaszëbiznë... Le
terô, czéj widzã to co widzã robi mie sã cepli na sërcu. Bò
jesz pôrã lôt, a na Mòrenie (na chterną z mòjégò dodomù je
kòl 1 czilométra), bądã mógł dogadac sã we krómie pò kaszëbskù.
P. Kąsk
zaczątk |