Czasã je takô sytuacëjô, że ni ma pò prôwdze za wiele nëch młodëch, òdwôżnëch ë zdecydowónëch nawetka pòswiãcëc se dlô ùkòdzóny tatczëznë ë deji. Téj mómë jimpas. Nôród - miast rozwijac sã - stoji, bò ni mô nëch chtërny bë wskôzywalë dargã. Bò nie ma nëch co bë zdrzelë wprzódk na wicy jak kùńc kadencëji!! To je nôwôżniéjszô mést rolô „przodkòwi starżë” - z francëska zwóny „awangardą”. Cëż jesz ti mają do robieniô òkóm skazywaniô dardżi na wiele lat wprzódk? Gwësno ùaktiwniają lëdzy.[...]

Gôdelë, że Abraham dzejôł za pòlaszëznã Kaszub. Lëdze, czë wë czëjeta cëż wa gôdôta?! 30 lat temù gwësno wa mùsza tak gadac, że Abraham dzejôł dlô pòlaszëznë, ale terô - odecknijta sã - żëjemë w wòlnym kraju ë mòżemë rzeknąc prôwdã: Abraham dzejôł dlô kaszëbiznë! A to nie to samò - móm nôdzejã że wa - przédnicë rësznotë kaszëbsczi to wiéta! Dzejôł gwësno dlô Pòlsczi, ale doch nié dlô spòlaszeniô Kaszëbów! Dlô Pòlsczi demòkraticzny, co w ni bë béł plac dlô wszëtczëch. Zanôleżało mù żebe Kaszëbë bëłë w wòlny Pòlsce. Rzesził z tim wiôlgą nôdzejã (ë nie blós òn). [...]

7. lepińca, latos apartno òd nadpòmkłégò wëżi Zjazdu, jacha Bana Jëdnotë – Transcassubia, tim razã z Chòjnic do Wejrowa.

14 – 22 lepińca derchôł XVI Spłiw Czôłenkòwi „Szlachama Remusa”

22 lepińca w Swiónowie òdbéł sã zwëkòwi òdpust ù Matczi Bòżi Królewi Kaszub. Bëło rójno ë farwno. Niechterni gôdają nawetka, że bëło widzec wicy znanków nôrodnich jak nôbòżnich.

22 lepińca przë belnim wiodrze wiele lëdzy bawiło sã w Chałëpach na jimpreze „Kaszëbsczi bôte pòd żôglama”. Nôprzód òdbëłë sã miónczi czôłnów rozmajitëch zortów: rëbacczich ë szportowich, żôglowich ë paczenowich. Pòzni na binie wëstapiłë karna Kòleczkòwianie, Jurczi z Żôrnowca, Chëcz z Bojana ë Zbigniew Wodecczi. Atrakceją wieczora bëło téż welowanié nôsnôższi czarzelnice, latos ròwnak nie òsta ùtopionô w mòrzu, jak to sã stało w tim môlu w rokù 1836.

24 – 29 lëpinca, na binach Brusów, Sierakòjc, Bëtowa, Kòscerznë ë Charzyków mòżna bëło, z leżnosce VII Midzënôrodnégò Festiwalu Folkloru, òbezdrzec lëdowiznã bezmała z całégò swiata. Bez te 6 dniów tuńcowałë, spiéwałë ë pòkôzëwałë òbrzãdowé òbrôzczé zespòłë z Kaszub ë zeza grańce: z Lëtwë, Miemców, Tajlandëji, Zjednónëch Krajów, Meksikù, Chòrwacëji, Tajwanu, Mòngòlëji, Sardiniji, Ùkrajinë (trzë ë solista), Szwëcëji ë Pòlsczi. Razã wnetka 800 artistów.
Swiãto folkloru zaczãło sã w Bëtowie, przéńdzenim kùństôrzów sztrasama miasta ë jinaugùracjowim kòncertã. Zakùńczëło sã, jak wiedno, we Brusach mszą swiãtą z elementama liturgëji w cëzych jãzëkach, przemarszã na brusczi szpòrtplac, gdze sta bina, ë kòncertã finałowim, na chternim kôżde z folkloristicznich karnów z VII MFF pòkôzało kąsk swòji nôrodny lëdowiznë. Festiwal miôł wiôlgą pòpùlarnotã. Na samim finale bëło kòl 9 tys. lëdzy! Je to dwa razë wiãcy niżle nôrodu, co mieszkô we Brusach.
Gòspòdôrze festiwalu bëłë karna mùzyczné: „Krëbane” ze Brusów (przédny òrganizator MFF), „Sierakowice” z Serakòjc, „Kaszuby” z Chòniców, „Bytów” z Bëtowa, „Kościerzyna” z Kòscérznë; urzãdë gminów ë miastów, a téż domë kùlturë, co są w tich môlach.
MFF dostôł latos, pò òsądze òsoblëwi kòmisëji, co na nim bëła, certyfikat midzënôrodny òrganizacëji folkloristiczny – C.I.O.F.F. Je to baro wiôldżé wëprzédnienié. Festiwal òstôł ùznóny za równy taczim jimprezom europejsczim.
Za rok, mômë nôdzejã, òdbãdze sã VIII MFF. Rôczimë na niégò baro serdeczno.
Wicy ò MFF w cządnikù „Pomerania” nr 9/2001

15 – 22 zélnika na swòją kòłową wanogã rëszeła młodzëzna z Karna Sztudiérów Pomorania. Jacha ich lëno 9 sztëk, le wszëtcy gôdają, że bëło bëlno!

18 zélnika na kartësczim rënkù zrobiony òstôł òdjimk Kaszëbów, òpùblikòwóny pùzni w gazéce "Dziennik Bałtycki"
òbaczë

27 zélnika Sejmik Wòjewództwa Pòmòrsczigò uchwôlił swój nowi herb – czôrnégò grifa na złotim pòlu

zaczątk