Jak chłop z diôbłã na wëcmaniznã gòspòdarził
Sadził chłop bùlwë i mù jich nie sygło, a ni miôł dëtków,
żebë sobie bùlew dokùpic. Tak òn sã jiscył do swòjé białczi,
co z nim sadzëła. – „Co tu terô zrobic. Rolô je ùprawionô,
a bùlew ni ma. Żebë tak chto sadzónczi miôł, to bëm z nim
sadził chòc na pół”. – Białka sã wzã i szła dodóm, a chłop
zaprzigł kònia w wóz i chcôł jachac wtëlnié. Té sã nalôz do
nie diôbéł i mù rzekł: - „Të sã jiscysz, że ni môsz bùlew
do sadzeniô. Jô móm bùlew dosc, jô bë sadził z tobą na pół”.
Nen chłop na to chãtno przëstôł i òni sã tak ùzgòdzëlë, że
czé te bùlwë ùroscą, té diôbéł weznie to, co mdze wëżé zemi,
a chłop òtrzimô to, co je w zemi. W jeseni diôbéł przëszedł
i wszëtkò bùlwiczé wërwôł, lińcuchã związôł, zadwignął na
remiã i szedł. Za pôrã dni òn przëszedł do tegò chłopa nazôdk
i mù rzekł: - „Wész të co?” – „Co?” – „Jô sã lëchò zgòdził.
Jô sã dôł za baro òszëkac. Të dostôł bùlwë, a jô le wzął zelëskò.
Ale, co ju bëło, to bëło. Ale wiész të co?” – „Co?” – „Të
môsz mało żëta, a jô môm żëta wiele. Chcema sôc na pół. Ale
terô jô sã jinaczé nie zgòdzã, jak tak: Të wezniesz wiérzch,
a jô weznã spòdk”. Na to chłop sã zgòdził. Diôbéł mu żëto
przëniósł, a òn je zasôł. Czé przëszłë żniwa, té diôbéł przëlecôł
za żëtã. Chłop żëto sekł i z pòla wòżił dodóm, a diôbéł wtële
szedł i rwôł lëdzënã. Pò żniwach téj ten chłop do swòji białczi
rzekł: „Më mômë żëta wiele. Żebësmë so terô nabëlë swiniã”.
„Jo, to bë bëło dobrze – rzekła białka – ale za co jã kùpic”.
„Jo, jo, to je prôwda. Ni ma za co”. W tim nad wieczórkã przëlecôł
znôw nen diôbéł i wërzékôł, że òn na tim żëce téż lëchò wëszedł.
„Ale wiész të co – mówi dalé diôbéł – chcema spróbòwac do
trzecégò. Mòże to bë bëło lepié. Të so chcesz kùpic swiniã,
a ni môsz za co. Jô ce dôm pieniãdze i kùp nã swiniã, a të
jã mdzesz chòwôł. Ten zôróbk wezniema na pół. Jô weznã z té
swini tã wełnã, a të òtrzimôsz to miãso”. Ten chłop rzekł:
„Dobrze, ale mùszisz tã wełnã sóm strzic”. Jak swinia ùrosła,
tak nen diôbéł przëszedł za swòją wełną i zaczął swiniã strzic.
Czé òn jã òstrzig, téj òn widzôł, że òn sã dôł znôw òrżnąc
i òn rzekł: „To béł wiôldżi krzik, a môłi strzig! Jô widzã,
të jes mãdrzészi, jak jô. Trzë razë jes mie òszukôł! Nié,
z tobą jô ju na pół wiãcé nie bãdã nic sadził, nic sôł ani
chòwôł”. I diôbéł chłopa òstawił i szedł, a chłop sã ùcesził,
że sã rôz brzëdôla pòzbéł.
Przërëchtowôł Grzegorz Schramke
zaczątk
|