Słëchôjta le drëszë Kaszëbi, na Kaszëbach mómë terô swój
kabaret. Nie wierzita? A muszita, bò je to prôwda. Pòstôralë
sã ò to dwaji drëszë z nordowégò dzéla Kaszëbów. Są nima Róman
Drzéżdżón ze Starzëna ë Pioter Cëskòwsczi z Chłapowa. Stworzëlë
òni kabaret kaszëbsczi, chtërny nazwëlë „FiF”, co òznôczô
to samo, co wic abò szport. Òbaji robią w pùcczi „Gazécë Nadmòrsczi”.
Rómk Drzéżdżón robi jesz w pùcczi mùzeji, a Pioter Cyskòwsczi
prowôdzy Dodóm Kaszëbsczi w Swôrzewie. Wpôdlë òni na ùdbã,
żëbë zrobic cos nowégò, czego jesz w kaszëbiznie przódë nie
biwało. Kabaret je nastãpną formą, ò jaką mô sã zbògacëc dzysdniowô
kultura kaszëbskô, chtërna òznôczô nie le folklor, ale je
téż òtemkłô na to, co nowé. Wespół z Drzéżdżónã ë Cëskòwsczim
wëstãpiwają téż: Michôł Pieper z Rëmi-Janowa, chterny do ti
pòrë spiéwôł w młodzëznowim karnie rockòwim „Chëcz” ë Adam
Drzéżdżón ze Starzëna, spiéwôk jinszégò karna rockowégò „Banicja”.
Dokôzë młodich ùtwórców z kabaretu „FiF” ukôzałë sã w môłim
tomikù pòd titułã „Pióro do gilganiô”, chtërny mòżna bëło
kùpic ju na latosym zéńdzenim Kaszëbów w Wejrowie. Króm tégò
R. Drzéżdżón, P. Cyskòwsczi ë Michôł Pieper dzél swòjich dokôzów
wëdelë w tomikù „Zymk”. W wëstãpach Kaszëbsczégò Kabaretu
„FiF” króm tekstów R. Drzéżdżóna ë P. Cëskòwsczegò wëzwënégóné
są dokôzë lëteraturë kaszëbsczi a òsoblëwie Aleksãdra Labùdë
– Gùczów Macka.
Nôléżnicë kabaretu „FiF” znóny są òsoblewie na kaszëbsczi
nordzë. Do ti porë westąpilë na Élu, w Chłapowie, Starzënie,
Juracë, Żelëstrzewie ë Dãbògórzim.Terô miele też leżnosc do
pòkôzaniô sã w Zabrzu na Szląsku. Impreza, w jaczi westąpilë,
zwała sã „Po naszemu - czyli po śląsku” gdze pòkôzalë sã Szlązôcë,
Warszawiace ë Górôlë. Rómk Drzéżdżón ë jegò drëszë westąpilë
pòza konkursã, ale, jak to pòwiedzôł pózni, lëdze nie baro
rozmielë kaszëbską gôdkã chòc Kaszëbi ë Szlązôcë mają niechtërne
słowa dosc dosebné. Terô nôleżnikom „FiF-a” nie òstało nick
jinszégò jak wëstąpiwac dali na najich binach ë doczekac sã
jinszëch, kabaretów kaszëbsczich, czegò jima ë całi dzysdniowi
kaszëbiznie brateczno żëczimë
Formellów Sławk
zaczątk |