Czãsto je wiôldżi trzôsk ë wiele kòntrowersëjów ò znaczenié
nëch dwùch słów: samòrządzëna ë autonomijô. Wiedno lëdze, jaczi
ni mają pòchwatu ò tim czim ne dwie jinstitucëje sã òd se różnią
wiele złëch słów ò nëch gôdają. Czãsto są òne przez nëch kòjarzoné
z tim, co nôgòrszé.
Samòrządzëna je to taczi ôrt pòdzélu państwa (na gminë, òkrãdżi,
wòjewództwa czë jak bë tegò nie nazwac) w jaczim ne subiektë
są elementama władzë administracëjny. Są Redë (na przëmiôr
gminë), Zôrzãdë, mógą òne stanowic jeden ôrt prawa: normë
pòrządkòwé. Ne normë są nôniżi w systemie prawa ë mògą blós
słëżëc wëkònaniémù jinszëch nórm np. ùstawòwëch. Ò nëch subiektach
gôdô, że je to part władzë administracëjny, czëlë wëkònawczi.
W zanôleżnoscë òd tegò jak baro są samòbëtné - są mni abò
barżi pòdległé rzãdowi centralnémù. W tim kraju w jaczim żëjemë,
nie są baro samòbëtné. Jak na warënczi europejsczé - grôd
jich samòbëtu béł zwëczajny 20 lat temù, terô są mni jak na
przëmiôr w Jitaliji, Hiszpaniji abò Miemcach.
Autonomijô, zato, je to taczi ôrt samòrządzënë, w jaczim
w kòżdi òbéńdze są zòrganizowóné òrganë władzë wëkònawczi,
ale téż ùstawòdawczi. Czasã nawetka sądowny. Są òne dëbeltowé,
bò rzecz jasnô je téż òglowòkrajowô władzô ezgekùtiwnô (wëkònawczô)
ë ledżislatiwnô (ùstawòdawczô). Aktë, co są wëdôwóné przez
ne autonomiczné òrganë mùszą bëc zgòdné z aktama wëdôwónëmi
przez władzą òglowòkrajową, ale ne aktë òglowòkrajowé są barżi
òglowé. Nié tak dokładno normùją wszëtczé zachë ë wicy òstôwiają
samòbëtnoscë òbéńdë.
Tëli sygnie, żlë chòdzy ò zrozmienié nëch dwùch słów. Terô
chcemë le pòmëszlëc sztërk, jaczé są zwënédżi jednégò ë drëdzégò.
Na òglim - co do tegò znajôrze prawa są zgòdny - tim lepi
fùnkcjonérëje kraj, jim wikszô samòrządzëna je dónô òbéńdóm.
Władzô je stwòrzonô dlô lëdzy a nié lëdze dlô władzë. Jeżlë
władzô òpiartô je na samòrządzënie - téj mòże chùtczi dzejac
tam dze ji je brëk. Mòże lepi òdpòwiadac na zdrëszënowé brëczi.
Mô lepszi kòntakt z òbiwatelama, a doch chcemë twòrzëc zdrëszënã,
krôj òbiwatelsczi. Ë do tegò nicht nie zmùszô jednëch òbéńdów
do przëjicô złëch ùdbów, jaczé doch mógą bëc baro dobré dlô
jinszëch. Wëchôdô to z tegò, że kòżdô zemia, òbéńda mô jinszé
warënczi (nawetka nôtëralné) ë je je brëk rozëmno wëzwënégòwac.
W ùstroju autonomicznym kòżdô òbéńda wëbiérô nôlepszé dlô
se.
Drëgô wôżnô zacha to są - to je wiedzec - dëtczi. W ùstroju
ùnitarnim (a jesz gòrzi w centralnosterowónym, jaczi béł do
niedôwna kòl naju) wszëtczé pòdatczi jidą przódë òd òbiwatela
do rzãdu we Warszawie, a pùzni są nazôd dôwóné wszelejaczim
jinstitucëjóm w òbéńdze. To je wiedzec, że taczé sélanié dëtków
tam ë nazôd wiele kòsztëje - doch chtos je mùszi pòrechòwac
rôz tu kòl naju, pùzni drëdżi rôz we Warszawie, ë pòtim jesz
rôz czéj òne do naju wôrcają. Czë nie je lepi, żebë òne bëłë
le rôz rëchòwóné? Naju pòdatczi mają kòl nas òstac - na naju
zemi, a nie jachac dzes na drëdżi kùńc swiata.
Jinszô zacha - mdã le sygnalirowac gwësné zachë, nie sygô
tu placu żebë ò nëch wszëtczich dosc wiele napisac - je przëtomnosc
naju kùlturë ë jãzëka. Czë wiész drodżi Czëtińcu jak grãdo
je wprowadzëc drëdżi jãzëk legalno ë w 100% do ùrzãdów? Jo,
niechterné òkrãgòwé ùrzãdë przëjimają ju pisma ë lëdzy pò
kaszëbskù, to je prôwda, ale chòdzy mie ò to, żebë całô administracëjô
mògła bëc dwùjãzëcznô. Terô tak pò prôwdze na to bë brëkòwało
ùstawù. Në a taczi ùstôw w tim kraju, to mùszi ùchwôlëc Sejm.
Sami wiéta jak to dłëgò dérëje ë jaczé są na to mòżlëwòtë,
czéj nawetka pòłwa pòsłów z Kaszub nie je tim zajinteresérowónô
a pòłwa dzejôrzów naju òbéńdë je procëm - z ùrzaskù.
A w ùstoju autonomicznym to je mòżno zrobic na równi władzë
òbéńdowi i kùńc. Ni mùszi pëtac lëdzy z jaczégòs Lëblëna czë
jinszégò Wrocłôwia jaczi je jich pòzdrzatk na to - to doch
nie jich zacha. Tam samò më téj ni mdzemë rozsądzëwac ò jich
jiwrach. Niech kòżden mô swój włôsny rozëm na swòje jiwrë!
Tak samò je z ùczbą kaszëbiznë we szkòłach - sami mòżemë
rozsądzëc ò tim. më bë ni muszëlë zajimac czasu tim ùrzãdnikóm
w Ministerstwie we Warszawie dlô zrobieniô tak prosti ë nôtëralny
zachë jak szkòłowizna. Tak samò je z wszëtczima jinszima zachama,
przede wszetczim z gòspòdarką. Kò chto mdze miôł wikszą dbã
ò gòspòdarkã mòrską ë rëbôków jak më sami? Czë jich rozmieją
ti lëdze we Warszawie, co czãsto mòrzã nawetka na òbrôzkù
nie widzelë? A chto mdze rozmiôł gbùrzëznã kaszëbską lepi
jak le sami Kaszëbi?
Mój ôrt żëcô je nie wpichac mòjégò nosa w nié mòje zachë,
a téż nie lubiã ë nie lëdóm jak chto wtikô swój w mòje. Ë
wam rzeknã, że dzãka temù mést dobrze wëchôdóm, a na gwës
móm czëcé samòbëtnoscë ë swòbòdë.
Cëż je nót terô? Pò pierwszé (jak chto mie nie wierzi w to
co móm rzekłé na zaczątkù niech le so weznie jakąs ksążkã
do administracëjnégò abò samòrządzënowégò prawa ë so pòczëtô)
- mùszimë wdôrzëc co to znôczi autonomijô ë samòrządzëna.
Mùszimë kùreszce zrozmiec że samòrządzëna, autonomijô ë samòstójnosc
to përzinkã co jinszégò. Ne wszëtczé słowa mają swòje znôczenié,
ë félą je żlë chtos autonomiją kòjarzi ze samòstójnoscą. To
je co jinszégò. Pò drëdżé: mùszimë sã nëch słów òprzestac
bac ë naczic ò nëch głosno gadac. Nôlepszé wiedno mòże òsygnąc
czéj człowiek gôdô z jinszima ò swòjich ùdbach ë jiwrach -
téj rôczã do òglowòkaszëbsczi diskùsëji na témã „samòrządzëna
- autonomijô - darga na przińdotã”. Pò trzecé: mùszimë so
pòmëszlëc czë je nóm tegò brëk ë czë je wôrt. Jô mëszlã, że
jo. Mëszlã téż., że czéj strukturë zôpadnoeuropejsczé są dlô
naju za wzór, té mómë je naslôdowac w całoscë, a nié blós
w jaczich wëbrónëch dzélach. Jeżlë ne strukturë nie są dlô
naju niżódnym wzorã, mùszimë wdôrzëc, że samòrządzëna ë autonomijô
to je le jednô darga, żebë nie skùńczëch jak Sowieckô Zrzesz.
Nôbarżi rozwiti ë nôbògatszi krôj na swiece - Zjednóné Stanë
Americzi - mają ùstrój federalny jaczi pòlégô na tim że wszëtczé
òbéńdë są równo autonomiczné. Dosebno Miemcë czë Jitaliô.
Zato kraje w jaczich nie dôwô rozwicégò samòrządzënë stôwają
sã chùtkò scéną kòrupcëji ë wërosnieniô ùstrojów niedemòkraticznëch.
P. Kąsk
zaczątk |