Stón kaszëbiznë na zôpadze Kaszëbów nie je jaż tak lëchi,
jak to bë wezdrzało. To je fakt, że czim dali na zôpôd, tim
mni je Kaszëbów z krwie ë gnôta, ale to je widzec, że kaszëbizna
jesz tam żëje. Że żgli sã żôr.
Nôlepszi przëmiôr je Mùzejô - Skansen we Klukach. Jegò czerownik
- Henrik Soja - ju przed rokã rozsądzył, że zrobi dlô procowników
Skansenu lechtorat kaszëbsczi. Bëła bë to nôuka jãzëka òd
spòdlégò, dlô lëdzy, co nawetka słowa pò kaszëbskù nie rozmieją
ë są ùrodzony czãsto nawetka nié na Kaszëbsczi zemi. Ale dlô
lëdzy, chterni chcą sã ùczëc.
Łoni òdbëło sã wëjazdowé zéńdzenié Kaszëbskò-Pòmòrsczégò Zrzeszeniô
w Klukach, dze przédnik Brunon Synak miôł rzekłé, że czéj
we Klukach pòwstónie plac nôuczi kaszëbsczégò - téj Zrzeszenié
jima pòmòże. Czerownik Skansenu baro rechòwôł na pòmòc ti
nôwikszi kaszëbsczi òrganizacëji kùlturalny w zòrganizowanim
lechtoratu - òsoblëwie jeżlë chòdzy ò dëtczi ë szkólnëch.
W gòdnikù 2001 miało òdbëc sã zéńdzenié Zrzeszeniô z direchtorama
mùzejów na Kaszëbach, dze midzë jinszima miało bëc gôdóné
ò lechtorace we Skansenie. Ne zéńdzenié nie òdbëło sã - jak
gôdô przédnik Synak - temù że termin béł lëchi dlô wikszoscë
zarôczonëch. Òdbãdze sã w drëdżi pòłwie gromicznika.
Łoni direkcëjô Mùzeum sczerowa wniósk ò przeznanié dëtków
na zòrganizowanié lechtoratu do samòrządzenë wòjewódzczi.
Dosta òdpòwiédz, że doch taczé zache zòrganizowac mòże KP-Z.
Zrzeszenié dejade nie rwie sã do òrganizowaniô samòstójno
taczëch kùrsów. Jesmë òrganizacëją pòzarządową, naju rolô
nie je òrganizowac, le nacëskac na gwësné pòdmiotë, chterne
mają dac na to dëtczi i to zòrganizowac - gôdô Przédnik Synak.
Taczi sóm je stosënk przédnictwa Zrzeszeniô do tzw. kaszëbisticzi
na Ùniwersytece Gdunsczim. We zwëczajnëch warënkach to bë
bëło jasné, że to bë robia samòrządzëna wòjewództwa - tak
mô bëc, ale terô przë taczim stanie finansów pùblicznëch je
na to niewiôlgô mòżlëwòta - dodôwô na pëtanié, czemù sejmik
wòjewódzczi nie zajimô sã taczima zachama. A kò je to jeden
z célów samòrządzënë wòjewódzczi - rozwij ë promòwanié kùlturë.
Prôcownicë Skansenu żdają le czedë kùreszce lechtorat sa nacznie.
Czerownik Soja gôdô, że to je prioritet dlô promòcëji Skansenu
ë òbéńdë ë że „jeżlë nié terô to za rok”. Przédnik Synak zdôwô
sã zdrzec na to realisticzno, przez lëchi stón finansów w
kraju. Wszëtkò wskôzëje na to, że wszëscë są dobri wòlë ale
jesz dłëgò mdzemë żdac za kaszëbizną w Klukach. Wiedno cos
stónie przéką, jak nié niesyga dëtków, to szkólnëch abò jesz
co jinszégò. Czë to ni mô bëc tak, że jaczis òrgan na przëmiôr
bënë K-PZ bë zajimôł sã blós kòòrdinowanim, òrganizowanim
dëtków ë szkólnëch do taczich placów jak Kluczi, chterne bë
sã do nie zgłôszałë?
Przédnik Synak gôdô: we Gdunskù - Jaseniu są dwie szkòłë,
co òne sã pò prôwdze przescygają, chterna bãdze barżi kaszëbskô.
Jedna chce przëjic jimiã K-PZ, òrganizëją ùczbë jãzëka, edukacëją
redżionalną ë tak dali. Wszëtkò mòże skùteczno jic z dołu.
Mającë dejade przed òczama òbrôz Kluk, mëszlã, że wszëtkò
mùszi jic z „dołu” - to prôwda, ale mùszi dostac wspòmóżkã
z „górë”. Bez ni skùnczi sã tak jak w Klukach, na żdanim ë
pësznëch słowach.
P. Kąsk
zaczątk
|