Përznã cëchò sã zrobiło òstatno wkół kapelë Chëcz – pierszégò
rockòwégò karna spiéwającégò pò kaszëbskù. A to wszëtkò temù,
że mùzycë wëszlë do sztudia.
Karno Chëcz nagriwô terô tak zwóné demò dlô wëtwôrni mùzyczny.
Mdze na nym 10 piesniów – wszëtczé pò kaszëbskù. Płëta mdze
sã nazéwa „Òdjimk”. Są prowôdzoné rozmòwë z trzëma pòdjimcama:
Pomatonã, SONY ë Warner, chterne chcą wëdac platã.
-Wëtwórcë za baro nie chcą żebë wszëtkò bëło pò kaszëbskù,
bò zdrzą przede wszëtczim przez sukces kòmercëjalny w Pòlsce.
– gôdô Pioter Kapczënsczi, spiéwôk –Są zato chãtny do kòmpromisu
ë jem gwësny, że nômni pòłwa piesniów mdze zaspiéwónô w rodny
mòwie. Bãdze to sukces kòmercëjalny i na Kaszëbach i w Pòlsce.
Płëta w wersëji limitowóny, dze wszëtczé dokôzë mdą pò kaszëbskù,
òstónie téż wëdónô dzãka spònsoróm. Bądze dostąpnô na pòmòrsczim
rënkù muzycznym – w krómach Trójgardu ë jinszich kaszëbsczich
gardów. Kaszebską wersëją téż dostónie Radio Gdunsk.
W nôblëższim czasu Chëcz ni mdze nigdze kòncertowac. - Jesmë
za baro zajãti robòtą w sztudiu, to je taczé smùkanié kòżdégò
zwãkù, żebë brzëmiôł jak nôlepi. – gôdô Kapczënsczi. Czéj
płëta mdze wëdónô, we łżëkwiace naczną sã kòncertë na Pòmòrzim.
Nieòficëjalno wiémë, że je mòżlëwô wiôlgô kòncertowô wanoga
Chëczë. Mùzycë, dejade, nie chcą ò tim gadac. Krëjamnota karna.
Mùzyka, jaką graje terô Chëcz, je përznã jinszô jak bëła
przódë – czéj za spiéwôka béł Michôł Piéper. Terô mni je zrzeszeniô
z lëdowòscą ë pòézëją spiéwóną, wicy – zwëczajnëch rockòwëch
tekstów (napisónëch przez T. Fòpkã) ë mùzyczi rockòwi na ôrt
redosnégò rocka 90-ëch lat czë ’77.
Michôł Piéper z Rëmie, ex-wokal Chëczë, terô pisze wiérztë,
wëstãpùje z gùtarą z kabaretã FiF Rómka Drzéżdzona ë Piotra
Cëskòwsczégò ë wcyg mëszli ò kapelë spiéwający pòézją kaszëbską.
Je dali drëchã karna Òdrodë, na roczëznie cządnika w gòdnikù
dôł môłi kòncert „unplugged”. To andżelsczé słowò òznôczającé
kòncert gróny na jinstrumentach akùsticznëch, a nié elektricznëch
òstało skaszëbioné na: ùbezsztrumkòwienié.
Karno pòwstało dwa lata temù z jinicëjatiwë Michała Piépra
– spiéwôka ë Môrcëna Pòpka – gùtarzëstë, lidra kapelë. Jegò
znanką bëło spiéwanié kaszebsczich tekstów nôwikszégò najégò
pòétë – Jana Trepczika. Wëdało na jeseni 2000 rokù płëta pòd
titlã „Do młodëch”.
-Mòże żebë òdpòcząc përznã òd rocka, mdã spiewac rolą Jezësa
w Pasëji, chtërną napisôł Tomk Fòpke. – gôdô na zakùnczenié
Kapczënsczi. – Òn brëkòwôł rockòwégò głosu dlô Jezësa, në
i nalôzł mie do ti rolë. – Mdzemë gò mòglë ùczëc w ti rolë
ju latos w Jastrë.
Wszëtkò wezdrzi na to, że Chëcz mòże sã stac kòmercëjalnym
sukcesã kaszëbiznë. A tegò mùzykóm – Piotrowi ë jegò drëchóm
brateczno żëczimë!
(ps)
zaczątk
|
