Òd 15. gromicznika mòże òbzerac w Nôrodowi
Mùzëji w Pałacu Òpatów w Òlëwie wëstôwk dokôzów króla pòp
artu Andy Warhola pòd titlã Amerikansczi mit. Na nym wëstôwkù
je kòl 70 dokôzów, mdą òne prezentowóné do 31. strëmiannika.
Wëstôwk nen skłôdô sã z dwùch partów lëtograficznëch ë serigraficznëch,
jaczé są przëzdrzatkã ùtwórstwa artistë òd pùznëch 50-ëch
lat - tak zwónégò cządu pre pòp art, jaż do 80-ëch lat, czéj
je to ju dozdrzeniałi ë refleksëjny Warhol.
Òrganizatorzë mielë dbã ò młodëch przëjimôrzów ë bédëje òprowôdzajków
- sztudérów Akademiji Pësznëch Sztëk. Wëswietlô téż filmë
ò ùtwórcë ë pòp arce.
Gwësno na ùtwórstwò Andy Warhola mùszi zdrzec w szerszim
kònteksce.Béł to znóny ùtwórca céchùnków, òbrôzów, béł znóny
jakò designer w Nowim Jorkù. Rzesził znanczi artistë akademicczégò,
doswiôdczenié psychòlodżi òdbioru, trim lëteracczi ë charizmã
jidola pòp artu.
Na wëstôwkù òbaczimë zajinteresérowania artistë kùlturą ùrmòwą
- òd bùsczi zupë Campbell do znónégò wizrënkù Maò Tse-Tunga,
jakò przëmiarë òbrazu wëtwòru kònsumpcëjnégò.
Serigrafijô je ôrt, jaczi dôwô mòżlëwòtã ùtwórcë przedstawic
wiele nietipòwëch ekspresëji. Kòżdô z jegò serigrafiji je
dokôz niepòwtarzalny dzãka wiôldżémù cządłu farwów. Z drëdżi
stronë zwielokrotnianié je nôbarżi tipòwô znanka Warhola ë
kùlturë terëczasny. Sztëka - wedle Warhola - òprzestaje bëc
centrã kùltu, je le temù bë bëła òbzérónô przez jak nôwicy
lëdztwa.
Wëstôwk prezentëje téż Warhola jakò malôrza akademicczégò
- jaczi ùrzôsô nié efektownoscą, le delëkatnoscą sztrichù
ë témą. Òdkrëjemë Warhola - céchòwnika w régach In the bottom
of my garden ë A gold book, wild rasberries.
Artista ùrzidzył sã w témë ekòlodżiczné. Mô namalowóné rédżi
przedstôwiającé zwiérzãta ùstëgòwioné wëdżiniãcym. Zbiér nen
je wòłanié ò pòmòc ë jakbë zapisanim ùszłotë Zemi. Mëszlã,
że miec zemiã ë nie zszargac ji, to nôpëszniészi jaczi mòże
prażëc, zort sztëczi - gôdiwôł Warhol.
Andy Warhol gwësno je kòntrowersëjny, bùdzy wiele emòcjów.
Wiôldżé ùrmë jaczé przëchôdają na jegò wëstôwczi, swiôdczą
dejade ò tim, że pòpùlarnosc Warhola rosce. Òd lat na niegò
gôdô król pòp artu.
A. Bradtke
zaczątk
|