Pierszi rôz w historëji mùzyczi Kaszëbów
pòwsta Pasëjô pò kaszëbskù. Mielë më jã czëté 22égò strëmiannika
w wejrowsczim kòscele sw. Annë. Òd stronë artisticzny pòdjimstwã
ti czerowôł Tomasz Fòpke, a jinicëjatorą ë ùdbôwcą bëło Starostwò
Pòwiatowé we Wejrowie. Do spółrobòcégò tegò dokazu mô òn zarôczoné
grëpã solëstów, przede wszëtczim dzejôrzów ë trzë chùrë: Harmonia
z Wejrowa, Lutnia z Lëzëna ë chùr parafialny z Lënie.
Òpis Pańsczi Mãczi òstôł wzãti z Ewanielëji wedle sw. Marka,
przëtołmaczony z grecczégò przez ò.dr. Adama Sëkòrã. Kòmpòzytór
pòkôzôł swòjã wizëjã pasëji mòtetowi skòmpònowóny wedle renesansowëch
reglów pòlëfòniji a capella. Prócz wielogłosu bënë Pasëji
są téż jednogłosowé sztëczczi chòrałowé.
Wëkònanié gwësno dotegòwało niejednémù słëchińowi równo mùzycznëch
jak ë dëchòwëch przeżëców, jeżlë le nie próbòwôł òceniôc le
techniczny stronë wëkònaniô. Próba znóbniészégò wezdrzeniô
na wëkònanié nieùchronno prowôdzy do wnióskù, że nie bëło
òno czësto bëlné. Kòmpòzytór òpatrził mùzyką mòże nie za baro
wëszukóną ë kùńsztowną, ale gwësno taką, co mòże òddac dramatiznã,
dramaticzną wëmòwã pòkôzónëch dzejbów. Nié do kùńca téż zôchwôtniłë
mie chùrë, chtërnëch jintonacëjô dôwa skòpicą do żëczbë. Równak
w jinterpretacëji nadrôbialë majestatã, patosã ë żëwiołowòscą.
Akcëja òsta ùkôzónô w dobrim tempie, precyzëjno dobiérónym
do kòżdi szteczi, kòżdi dzejë dramatu. Nimò tegò mankamentã
tegò dokazu je niesëga ùkôzaniô tradżediji ë dramatiznë ,jaczé
bëłë w Pańsczi Mãce. Atmòsfera sacrum tak jistewnô w mùzyce
relidżijny ë nieòdzownô òb czas Wiôldżégò Pòstu zwëczajno
nie zajistnia, a szkòda. Ùtwórca mést za wiele mô wzãté na
se: rolą kòmpòzytora, wëkònawcë, dërëgenta, czegòskùtkã bëła
niesëga kòntemplacëji, refleksëji... Pasëjô òsta wëkònónô
òd zaczątkù do kùńca bez felë, ale czë to sygnie, żebë jã
nazwac dokôzã?
Cãżôr wëkònaniô Pasëji je wiedno na Ewanielëscë ë nen dzél
Tomasz Fòpke mô zrealizowóny nad zwëk. Mô zaprezentowóné słëchińcóm
przerodzoną mùzykalnotã, pëszny głos, wrażlëwòtã, jaczi òdkriwają
dejã tekstu ewangelëcznégò ë znanié stilu. Dobrim Jezësã béł
Pioter Kapczëńsczi. Jegò widzenié bëła baro sugestiwnô ë emòcëjonalnô
dcht tëli kùli je nót. Dosebny skùtk òsyglë téż jinszi spiéwôcë:
Mirosłôw Lademann (Piłôt), Wòjcech Rëbôkòwsczi (Judôsz), Eugeniusz
Prëczkòwsczi (Pioter). Wiele sërca mô włożoné kòmpòzytór w
part Arcëkapłana ë prowôdnika chùru – Riszarda Lorka – jaczi
spiéwôł z wiôldżim ùrzidzenim ë dramatizną.
Je wôrt dozrzec to, że je zajinteresowanié Ewanielëją sw.
Marka przetołmaczoną na kaszëbiznã ë ùdbą napisaniô do tegò
mùzyczi. Wiôldżé dzãczi Tomaszowi Fòpke, dzãka chtërnémù Kaszëbi
mają terô swòjã Pasëjã – pò kaszëbskù. Kòżden nôród mô sã
czim bùsznic më terô w mùzyce – téż.
Niezależno òd mòjich zastrzégów nôtërë mùzyczno – techniczny,
wejrowskô Pasëjô òsta zakùńczonô kòskanim na stojąco. Sukces
taczich kòncertów stądka jidze, że lëdze są sprażony kòntaktu
z wiôlgą mùzyką ë do tegò kaszëbską.
A. Bradtke
zaczątk
|