We fùsbal grelë Wilkòwie i Zajcowie. Wilkòwie atakòwelë,
napiérelë, grelë òfensywno. Zajcowie òpak - jakbë ni mielë
chãcy do graniô. Nie bëło kòl nich niżódnégò grôcza na przódkù,
co bë szosowôł do brómczi procëmników. Jich brómka téż za
baro nie bëła barnionô.
-Jes të głupi? Czemù të wpùscył tegò gòla? - wrzeszczôł òbrońca
Zajck.
-Kò òni i tak dobądą. – gôdôł bramkôrz. - A żelë më sã bądzemë
za òstro bronilë, òni nama jesz wicy wklepią.
-Co të tu pleszczisz? Jô ce zarô jednégò méznã w pësk, tej
të zarô òtrzézwiejesz– rzekł Zajck. I pòbiégł do kapitana,
żebë sã pòskarżëc na bramkarza.
-Ale òn mô prôwdã – przëswiôdcził bramkarzowi kapitan. –
Jô téż mëszlã, żebë nëch Wilków za baro nie drażnic. A tej
òni wezną wzgląd na naszã pòstawã.
Zajck béł “baf”.
„- Jak to je mòżlëwé? – mëslôł so. – To je wierã jakôs zmòwa.
Òni mają ten mecz sprzedóné”.
Pò prôwdze, całé karno Zajców, miast bëlno grac, krącëło
sã na wëstrzód placu i le ùdôwało, że graje .
Czibicowie Zajców, czej widzelë pòstawã swòjëch grôczów, corôz
barżi gwizdelë, szkalowelë na czim swiat stoji, przezéwelë
jich òd torbów i dupsów, a nawetka jesz gòrzi i szmergelë
w nich, co le mielë pòd rãką. A przë òstatkù wszëtcë zaczãlë
czibicowac Wilkóm.
Wilkòwie bëlë përznã zdzywiony tą pòstawą Zajców i strzélelë
jima jednégò gola za drëdżim. Przed kùńcã pierwszi pòłowë
meczu bëło ju òsmë do zera. Na szczescé sãdza zagwizdôł na
przerwã.
Òb czas przerwë niejedny z Zajców, co mielë chãc do ùtcëwégò
graniô, szkalowelë na drëchów, a naweta zaczãlë sã szarpac
z nima. Òbrońca Zajck mówił:
-Jesta wa òbarchniałi? Pewno jesta pòdpłacony, bò robita
wszëtkò, żebë stracëc. Żelë tak chceta dali grac, tej jô ju
nie jidã na jigrowi plac.
Ale niejedny drëszë, z kapitana na przódkù przekònywelë,
że tak trzeba, że to je nôlepszô taktika....
Drëgô pòłowa meczu bëła baro krótkô. Czej le Zajcowie wëszlë
na plac, Wilkòwe strzélnãlë jesz jednégò gola. Tej kapitan
Zajców pòdeszedł do sãdzë, żebë przerwac mecz. Czej sãdza
zagwizdôł, kapitan Zajców podeszedł do kapitana Wilków, zdjął
kòszulkã, pòdôł mù a rzekł, że Zajcowie ju dali nie chcą z
Wilkama walczëc, le bédëją nen mecz rozstrzëgnąc pòkòjowò,
pò przëjacelskù. I jesz sã spitôł:
-Mòżemë më sã dołãczëc do wajégò karna?
Wikszosc kibiców ju dôwno przëszła na stronã Wilków.
D. Król/P. Kąsk
zaczątk
|
