Dzysodnia òdbiwô sã Òglowi Spisënk. Stôł òn sã òrãdzã do
przëbôczeniégò so stôri diskùsëji nad nôrodnoscą kaszëbską.
W anczetach są pëtania ò nôrodnosc ë domôcy jãzëk, kòżden
òstónie ò to zapitóny. Anczeterzë, jaczi spisëją lëdzy mają
òbrzeszk wpisac dokładno tak jak lëdze jima rzekną. Jeżlë
òstónie rzekłé „jãzëk kaszëbsczi” tak mdze wpisóné, jeżlë
nôrodnosc – téż. Taczi je pòzdrzatk Głownégò Statisticznégò
Urzãdu – wpisac to, co lëdze deklarëją.
Naja Redakcëjô mia dejade sygnałë òd Czëtińców z Gduńska,
Kartuz, Jastarnie ë Bëtowa, że niechtërny, co robią szkòlenia
dlô kòmisarzów spisënkòwëch, gôdelë, że nie je mòżno wpisëwac
„kaszëbsczi” jakò domôcy jãzëk ë nôrodnosc, naewtka jeżlë
lëdze tak deklarowelë. Jak më piselë w òstatnym numrze – falszowanié
jinfòrmacëji ùrzãdowi je przestãpstwò.
Żebë wszëtcë dejade bëlë gwësny, że je mòżno deklarowac kaszëbskòsc
na spisënkù, redakcëjô Òdrodë wëdrëkòwa 32 tësące ùlotków,
na jaczich mòże to przëczëtac.
Prócz tegò òstôł wësłóny do wszëtczich mediów lëst òtemkłi
Tomôsza Tónë Piechòwsczégò w jaczim òn scwierdzô, że wedle
jegò pòzdrzatkù deklarowanié nôrodnoscë kaszëbsczi je nôtëralné
dlô wszëtczich Kaszëbów. Òdezwałë sã głosë, że tak nie je
mòżno ë że Kaszëbi nie są ë ni mògą bëc nôrodã.
Na kùńc wszëtczich zgòdzył B. Synak, przédnik K-PZ, chtëren
12 maja w Redio Gduńsk gôdôł, że nôwôżniészé je tak czë jinak
wpisëwanié kaszëbsczégò jãzëka, a na pëtanié ò mòżlëwòtã wpisaniô
kaszëbsczi nôrodnoscë, rzekł: Kòżden mòże pòwiedzec taką nôrodowòsc
jaką òn chce, temù że nôrodowòsc je sprawą baro jindiwidualną,
sprawą òsobistą i przede wszëtczim to je to, czim sã czëje
chto.
(ws)
zaczątk
|