19
czerwińca 2002. w Tawernie Mestwin w Gduńskù òdbëła
sãuroczëzna wrãcziwaniégò kaszëbsczich nôdgrodów: Skrë Òrmùzdowi,
Lëteracczi Nôdgrodë mn. R. Wróblewsczégò a przede wszëtczim
piesniodzejny laur pamiãcë Jizabelle Trojanowsczi.
Kònkùrs mn. J.Trojanowsczi financowóny je przez
ji drëchnã pòchôdającą z Finalandiji- Mariã Kirsti Siraste.
Wszëtczé zôs nôdgrodë nadôwô òd zôczątkù jich jistnieniégò
Redakcëjô cządnika Pomerania.
Kònkùrs miona Trojanowsczi dobëła latos Karolëna
Serkòwskô, 16to latné dzéwczã, ùczenka 3cy klasë dżimnazjalny
w Kartuzach. Na kònkùrs przësła 10 swòjich wiérztów. Chòc
je młodô, nie je to ji pierszô nôdgroda. Mô dostóné pôrã wëprzédnieniów
lëteracczich, m.jn. lëteracką nôdgrodã Z arką za pón brat,
abò wëróżnienié w kònkùrsu Złoté Jaje.
A wszëtkò zaczëło sã òd tétrowi kòleczczi przë
Centrze Kùlturë w Kartuzach do jaczégò przëstąpia 4 lata temù
za Jidë Czaji pòdmòwą. Te zéńdzenia artisticzné pòdskôcëłë
Karolënã do pisaniégò wiérztów. Nôprzód ne bëłë pòlsczé, pùzni
– ùczącë sã kaszëbsczégò – ùmëszlëła so pisac w rodny mòwie.
Pierszi zôłącz z kaszëbską mòwą òna mia ju w
chëczë – ten nôprostszi – òd starków, jaczi gôdelë na codzéń
w mòwie òjców. Terô Karolëna Serkòwskô pisze we wikszoscë
pò kaszëbskù. W swòjim ùróbkù mô wiérztów baro wiele, nie
rechùje jich jesz.
Bra dzél we wieczórnicach òrganizowónëch przez
Kartësczi Center Kùlturë, czéj sama czëta swòje tekstë. Ne
rëchają témë wôżné ë blësczé kòżdémù z nas – egzystencëjô,
żëcé ë smierc, piãknota, strôsznosc. Autorka mô starã w swòjich
wiérztach nalézc szëk jinstnieniégò, szëk apartnëch elementów
chtërne skłôdają sã na bëcé człowiekã.
Jak mô to rzekłé piesniodzeja Pioter Celesz:
czéj przechôdają rézczi kùnczi sã swiat ë zaczinô sã kòsmòs
bëne człowieka, człowiek bëne kòsmòsu. W taczim sztërkù człowiek
równoczasno ùmierô ë rodzy na do nowégò żëcégò.
M. Bradtke
Nôdzeja
To je tak-
Jakno ptôch
Tuńcowac w blónach
I widzec przed sobą rzmã
Cwiardą, cãżką i grëbą
Òna mòże doprowadzëc do stratë.
A czéjbë òminąc jã
Pòdôj swòjã rãkã
Z fantazëją latôj
I snicé rząskôj
Nie bòji sã jegò zwiartoscë
Zaszmakôj wòlnoscë
Bò redota twòja sã doskòpicëje
I nie bãdzesz w stónie
Pòjąc ti gromistoscë
Dze sedzy snôżota?
Czi je snôżosc?
Ùrzek, łisk
Kò mòże zwëczajnota?
Czim je żëcé?
Smùtk, jednotorizna,
Kò mòże redota?
Czim je smierc?
Strata, òdéńdzenié
Kò prosto wòlnota?
Czim je snôżosc?
-Żëcym…
…i
smiercą
zaczątk |