Na Zjezdze Kaszëbów mdze delegacëjô Pòdhalanów
– przédnictwò Zrzeszë Pòdhalanów, Kréjzu Tatrzansczégò ë fòlkloristiczné
karna z Ząba ë Sidzinë. Òsoblëwie dlô naju gôdô Jãdrzéj Skùpień
– vice starosta tatrzansczi.
Czë kòl Waju na Pòdhalim òdbiwają sã taczé
dosebné zjazdë jak kòl nas na Pòmòrzim?
Më – Pòdhalanie – téż mómë swòje zjazdë, chòc
ne wezdrzą përznã jinaczi jak na Kaszëbach. Łoni béł Zjôzd
Góralów, jaczi miôł jintergrowac Góralów, żejącëch tuwò a
téż nëch, jaczi wëchalë z naju zemi. Miesąc temù òdbéł sã
Zjôzd Pòdhalanów – sparłączony ze zjazdã redżionalny pòdhalansczi
stowôrë – Zrzeszë Pòdhalanów.
Naje rozegracëje rzeszą sã barżi z rësznotą
turisticzną, je na przëmiôr Wiôlgô Majówka Tatrzanskô, czë
jinszé jimprezë masowé namienioné nié le na Pòdhalanów, a
téż na turistów.
Co rzeszi Pòdhalanów ë Kaszëbów?
Òdbiwô sã òd dôwna wespółrobòta midzë najima
zdrëszënama. Mómë kò dosebné merczi: dbã ò tradicëją, ùpiartosc,
gòspòdarnosc, zycherowòsc, chãc spólnégò dzejaniégò… Kòntaktëją
sã szkòłë, ògniowé starże, samòrządzënë, stowôrë redżionalné.
Bòdôj, ne kòntaktë nie są za czãsté, bò kò dzéli nas 500 czilométrów.
Jak Wë bë skòmentowelë tekst z czerwińca z Gazétë
Wëbòrczi ò Goralenvolkù (Nôrodze Góralsczim) ë jegò przédnikach,
jaczi wespółrobilë z Miemcama òb II swiatową wòjnã?
To je przebëstrzenié. Taczi kòlabòrancë, jaczi
wespółrobilë z Miemcama są wiedno ë wszãdze. Terô to òstało
– mëszlã – nié przez przëtrôfk wëcygłé. Gwësné zachë kòl nas
bëłë mòże za głosno rozgriwóné, bëłë niezrozmienia midzë Tatrzansczim
Nôrodnym Parkã ë samòrządzënama, sztridë ò zëmòwą òlimpiadã
w Zakòpónym… Nie sygło dobri wòlë, a sprawa Goralenvolkù bëło
to cësniãcé kama w głãbòką wòdã – żebë le zrobic niezdrowi
szum wkół Góralów.
gôdôł ps
zaczątk
|