Czësto òbarchniałi zrezygnowóny wëszedł jem bùten z Bùra Prôcë.
Héwò jô mùszôł pòdpisac lëstã ùpòwôżniającą miã do braniégò
dëtków dlô lëdzy bez robòtë.Na deptownikù stojôł jem sztërk
mëslącë co terô ze sobą zrobiec. Ni miôł jem lësztu na chùtczi
jidzenié dodóm. Ni mógł jem zlëdac czekającégò smùtnégò wëzdrzeniô
białczi. Czëtôł jem w nim pëtanié bez słowów:”Môsz të co nalazłé,
bëło co do roböte dlô nas?” Ze zrezygnacëją sczerowôł jem kroczi
w czerénkù mòrza. Jidącë promenadą bez mësleniô wzérôł jem na
strąd i blëszczącą sa w strëmiannikòwim słuńcu spòkójną taflã
wòdë. Nen widok mie sa wiedno baro widzôł. Niósł òn mie cëchòtã
i ùlgã w cażczich sztërkach żecégò. Dzysô béł òn dlô mie bez
znaczeniô, wnetka wrodżi. Strąd bez lëdzy i glada mörza zwikszałë
mòjã smùtnota i ùdbã, że marnieje mòje miasto.
Doszedł jem do pòrtu. Tu téż rządzëła cëchòta.
Jidący dali przëszedł jem do nôwôżniészi sztrasë. Leżący wzdłuż
ni rôczący widocznyma przez wialdzé òkna wëstôwkama krómë
swiecëłë pùstotą. Rzôdkò jidący lëdze przëstôwele przed nima
wzërajacë pòżądlëwie do bëna, dze bëło fùl rozmajitëch warów
i zgrużdżony szlë dali.
Załómóny, bez chãcë i zeznobiony wlôzł jem do
kòscoła. Bëne nie bëło niżódnëch lëdzy. Ùsôdł jem so w jedny
łôwce i długò wzérôł bez pòméslënkù na wôłtôrz i wiszący nad
nim krziż z Ùkrzëżowónym. Za sztërk nie mëslący ò tim zaczął
jem òdmôwiac pôcérz ,,Òjcze nasz...” Pò słowach „niech przińdze
Twòje królestwò”, cos jakbë zatkało mie gôrdzel. Skuńcził
jem mòdlëtwã i zatopił sã w mëslach.
Je strëmiannik 2OO1 rokù. Przëchôdô dwanôsti
rok òd redzeniô przë òkrągłim stole, òd czasu żëcé w nowi
- gôdiwają - tą razą wòlny i nikòmù nie pòdlégający Pòlsce.
Zaczął jem rozmëszlac jak òstôł wëzwëskóny nen dosc tëli dłudżi
sztëk czasu. Mie bëtégò robòtnika òkratowni òbchòdzëłë nôbarżi
warënczi żëcô mòji familie i jinëch taczich jak më prostëch
lëdzy. Zaczął jem rozmëszliwac jak zmieniało sã nasze żecé,
co òstało z wialdżich marzeniów, z wialdżégò zrëwù òsmëdzesątëch
lat.
Jem jak wikszi dzél wespół robòtników naszi
fabriczi człowiekã bez robòte i niżódny leżnoscë żebë co nalézc.
Białce dëtczi dlô bezrobòtnëch skùńczëłë sã przed miesącã,
miã czekô za trzë to samö.
Żecé z pracharsczégò grosza je baro cãżczé,
a nôbarżi dlô zdrów chłopa co më bëlny fach.
Nasze pòspólné dëtczi nie sygałë na nôskrómniészé
żëcé, terô czéj dostôwómë blós mòje mómë corôz wikszé dłëdżi.
Nalézenié jaczi robòtë chòc na czôrno greńczëło z cëdã.
Sromiã sã, że jô zdrów, chãtny do robòte chłop
mùszã prosëc ò pòmòc emeritów - tatków mòji białczi. Z rozpaczą
rozmësliwóm ò tim co bądze z nama za trzë miesące czéj jô
téż nie bądã miôł rechtu do dëtków dlô bezrobòtnëch. Czë bądã
w sztãdze wëżëwic familią, òpłacëc mieszkanié żebë nie wërzucëlë
nas na flaster? Jak pòmòc dzecóm w ùczbie i dac jima mòżnosc
dobëcégò bëlnégò fachù?
Panie - gôdôł jem półgłosno zdrzącë na krziż
- za co kôrzesz nas swòjich nômiészich bracynów? Co jesmë
winny më robötnicë, lëdze öd cãżczégo rakòwaniô? Òdpowiedzą
bëła le smutnô cëchòta pùstégò kòscoła. Mòje mëslë copnãłë
sã w kùnc sétmëdzesątëch lat. Pò skùńczenim warkòwi szkòłë
zaczął jem robòtã w òkrãtowni jakno wëùczałi robòtnik. Żebë
miec leżnosc na bëlniészã robòtã rakùjącë w dzéń, wieczorama
robił jem technikùm. Na zôczątkù starcë, a pòtemù jô sóm òb
czile lat wpłôcalë dëtczi na mieszkanié w spółdzelni. Pò założenim
familie mô dosc chùtkò dożdalë sã swòjégò M-3. Pòtémù pòspòłu
z robiącą téż w òkratowni białką më szëkòwelë je na przińdzenié
pierszégò dzecka. Nasz pòspólny wzątk skòpicą sygôł na bëlné
żëcé. Dzãka wczasowémù fùnduszowi mòglë më jezdzec na ferije
do rozmajitëch strón najégò kraju. Bëłë téż rëchtowóné przez
fabrikã wëjazdë do téatrów do wialdżich gardów, a téż krajoznawczé
wanodżi. Chto miôł chãc, ten miôł mòżnosc kòrzëstaniégò z
kùlturë, miôł dëtczi na kùpienié zdrzélnika, redia czë ksążków.
W najim miesce òkróm òkratowni bëło czile jinëch fabrików.
Nie bëło niżódnégò jiwru z nalézenim robòtë. Chto miôł lëszt
ten mógł robic.
Panie, të doch pòmnisz, mòżesz to ùdokaznic,
Twój kòscół nie stojôł pradżi próżny. W niedzele i swiãta
bëło w nim skòpicą fùl lëdzy. Mie i mòjim znónym nicht nie
wadzył, nie zakazywôł jic do Ce do Twòjégò dodóm.
Mòje nadmòrsczé miastkò òb sztërë miesące w
rokù robiło sã pôłną lëdztwa wialgą metropòliją. Przëjéżdżelë
do nas prôcownicë z rozmajitëch fabrików z całi Pòlsczi chtërnyma
jich prôcodôwcë dopłacywelë wialdżi dzél kòsztów ùrlopù. Nôwôżniészima
naszima gòscama bëlë bògati górnicë. Òni òstôwilë kòl nas
baro wialdżé dëtczi. Co zrobiec, të czase są ju wek. Ùrlopòwi
czas je terô baro krótczi. Dérëje colemało jeden miesąc w
rokù.
W tëch tam czasach nie doskwiéra mie, jak sa
terô zamanówsze gôdô, féla wòlnotë. Bëłë doch i cemny nórtë
héwòtnëch lat. Nôwikszą ùcemiãgą bëłë próżné krómë. W nich
nôbarżi félało żëwnotë. Chto chcôł co lepszégò kùpic mùszôł
to wëstojec òb czile gòdzënów. Bëło to baro, baro czążkò -
wialdzé ùcamiãżenié dlô naszich mëmów i białk. Pòwstôwôł górz
na tëch co rządzëlë. Zacził sã rodzëc bùnt Na zôczątkù ceszi
kòta, pòtemù corôz głosni bëło gôdóné ò kòniecznoscë zmión.
Dlô mie prostégò człowieka i dlô jinëch taczich
jak jô òkrãtowników słowo ,,mióna” òznôczało mòżnosc kùpieniégò
w krómach tegò co sã brëkùje bez dłudżégò stojeniô, pòprawa
warënków i bezpiecznote w robòce. Òznôczało pòprawienié tegò
co erlich rzekłé - nie bëło lëché - na bëlniészi.
Marzónczi chcëniô zmianów i pòprawieniô codniowégò
żecégò zrobiłë sa jesz wikszé pò przëjachanim papieża Pòlôcha
Jana Pawła II. Przez całą Pòlską przeszłë wërzekłé przez niegò
w Warszawie słowa: „Niech zestąpi Dëch Twój i òdmieni gãbã
zemi, ti zemi.”
Christe Panie - rzekł jem zdrzącë na krziż -
bëło bë to mòżebné, że pò taczich słowach jô czë jiny taczi
sami robòtnicë bë nie ùwierzëlë, że na nas żdô nowi, bëlniészi
swiat, Twoje królestwò?
Nadszedł bùńt rządzonëch procëm rządzącym ò
barżi sprawiedlëwi Twój, mój, naju swiat. Biôtka zaczãtô w
zélnikù 1980 roku w Gduńskù skùńcza sã w 1989 roku gôdkama
przë òkrągłim stole we Warszawie. Pôdł system socjalisticzny,
padła kòmùna, pôdł stôri pòdobno baro lëchi swiat. Jô jak
baro wiele jinëch był ny dbë, że ta òdmiana je wërażenim „Twòji
wòle” że Të chcôł żebë nama czile razy bądącym w niewòlë zaswiecëło
słuńce wòlnotë.
„Mdze Twòja wòlô”- mòdlił jem sã wierzącë, że
terô pòspòłu zbùdëjemë na naszi zemi swòjã bëlną bòkadną chëcz.
Przechôdałë pò se jeden pò drëdżim nowé rzãdë,
demòkraticzno wëlowóny władze. Żdôł jem na brzadë jejich dzejaniégò.
Miôł jem rëcht mëslec, że terô czéj jesmë panama w ,,swòjim
dodóm” mòżemë sami pòdług swòji ùdbë rëchtowac przińdnotã.
Òbzérôł jem zdrzélnik, słëchôł redio. Z dzenników jak za czasów
Gierka dmùchało ùrzãdowim – „wszëtkò je fejn”.
Przëchôdałë tidzenie, miesące, lata. Zmieniałë
sã parlamentë, prezydencë, a Nowô Pòlskô sã stôwa dlô nas
robòtników - lëdzy cãżczi robòtë corôz mni mëmą, a corôz barżi
macochą. W najim miesce i òbéńdze miast òczekòwónégò pòlepszeniô
przëszła rujnacëjô gòspòdarczi.
Pierszi òstôł bez robòtë robiący i mieszkający
w Państwòwim Gòspòdarstwie Rolnym bracyna mòji białczi. Przëjachôł
do nas w jednã z niedzelów i znerwòwóny dërgòtającym głosã
pòwiôdôł do jaczi rujnacëji doprowadzëlë jegò PGR, jich jedurny
robòcy môl. Lëkwidatora przedôł bëdło, maszinë, wszëtkò na
co nalézlë sã kùpcë. Òsta le gòłô, nie ùprawiónô zemia, próżny
bùdinczi bëdlãcé, a téż më - lëdze bez robòtë i bez nôdzeje
na ji nalézenié. Jónkù – jô spitôł smùtnym pôłnym rezygnacëji
głosã -.Co më mómë terô robic? Jesmë òb pòmieszkanié zasztëkóné
na wsë dwadzescë czilométrów òd nôblëższégò miasta w chtërnym
ni ma téż robòtë. Całé żëcé robił jem i mieszkôł w PGRze.
Robił na trekrze, to bëło to co jem rozmiôł robic bëlno, baro
bëlno - rzekł z bùsznotą. Na wszëtkò nama sygało. Na jestkù,
kòrnusa przë niedzelë i ùczbã w miesce naszich dwòje dzecy.”
Wzérôł sztërk smùtno na miã i pò czim gòrzkò, złoslëwie zawrzészczôł:
„Ze tczëwôrtnégò człowieka zrobilë biédôka, pracharza”
Cały sztërk sedzelë më sztël zdrzący w òkno.
Cëchòtã przerwa białka rôczącô nas na baro biédné pôłnié.
Pò môltëchù i zjãcu skòrpów zaczëlë më dali kôrbic.Szwadżer
jaczis czas rozmëszliwôł, a téj sa spitôł:
- Słëchéj, a jak wëzdrzi tu kòl waju w miesce?
Mòże bë sã dało jaką robòtã kòl ce w òkratowni chwacëc?
- To bãdze baror baro cãżkò - òdrzekł jem i
dopòwiedzôł -. Ù nas je ju pòłwa ökratowników wek, tak je
téż w drëdżich fabrikach.
Z mojégò jadłobieniô wërwôł miã stëkòt kroków.
Jidący flot strzódkã kòscoła młodô białka doszła do trapów
wôłtarza. Héwò ùklëkła i ùtaca w rãkach swòjã twôrz. Pò dërgòcącëch
plecach bëło widzec, że chlëchô. Za sztërk wsta i sczerowa
sã do bùtnowëch dwierzi. Òb sztócëk wzérôł jem na ji gãbã.
Bëła smùtnô, zajiscónô. Pò zaczerwienionëch òczach bëło widzec,
że przed sztótã płaka.
Pòzdrzôł jem znôuka na Ùkrzëżowónégò i zacził
òd nowa wdarzac, spòminac miniony czas.
Nastãpné lata nie dałe nick bëlnégò, bëło colemało
jesz gòrzi. Pòpôdałë w rujnacëją wcyg nowé fabriczi, to ju
bëło bùten szëkù, co sã wkół nas dzało. Corôz wicy doswiôdczonëch
lëdzy òstôwało bez robòtë. Bëło jakòs bùten szëkù czéj sã
widzało dôwnégò bùsznégò spawôcza z òkratowni wëmiatającégò
jak za jaką sztrôfã sztrasë, abò ceszi kòta zazérającégò ò
szarëkù, grzebiącégò w kastach z négama.
Znôuka podniósł jem òczë na wôłtôrz pitającë:
„Panie jak sã cos taczégò mògło stac, że w Twòjim królestwie
ni ma codzénnégò chleba dlô tak wiela lëdztwa. Czemù pôdają
na pësk, przódë bëlno so radzącé rôbòcé môle. Czemù tak terô
je?
Na to be zycher mòglë dac swòjã òdpowiédz ,,bëlny”
pòlsczi ekònomiscë. Sóm rozmëszlëwającë i wzérającë na dzejanié
rządzącëch jem dbë, źe rujnacëjô naszich robòcëch môlów mô
swój cwek i czerowónô je z bùtna. Doprowadzoné do wialdzégò
zadłëżeniégò, ni mògącë przëdac biédnym lëdzóm swòjich wërobów
przedsãbiorstwa za bëlë jaczé dëtczi są przejimóné przez tak
zwònëch jinwestorów zeza greńców. Òni bez sëmieniô wërzucają
z robòtë lëdzy, a z fabriką robią to co mô dlô nich cwek,
co sã jima lónëje. Czãsto téż w wialdzich fabricznëch bùdinkach
òtmikô sã rozmajité hùrtownie szachrëjącé zwlokłima zeza greńców
warama. To szargô wszëtkò co naje. W najim miesce, na naszim
swiece zjawia sã grëpa - nowô klasa, tak zwónëch „nowòbògacczich”.
Bez niżódny lëtoscë wëzwëskòwają òni swòjich bądącëch bez
robòtë dôwnëch drëchów, trachtującë jich czãsto jak dzysdniowëch
niewòlników.
Panie, w Twòjim królestwie pòwsta schòwa rojbrów.
Lëdze nie mający wzãtkù nie są doch w sztãdze płacëc dzerżawë
za swòje dodóm. Nastało to co bëło niepòjãté, nieznóné w historiji
pòwòjnowi Pòlsczi. Lëdzy wëszmergùje sã z dzecama i wérama
gòrzi jak psë na flaster.
Panie wezdrzi tu do nas na najã zemiã. Je to
jesz Twòje królestwò? Rzeczë, co je winnô mëmka czë òjc, że
ni mô robòtë i ni mô czim zapłacëc za swòje dodóm? Co są winny
jich głodné, òberwóné dzecë? Czemù cërpią lëchą dolą òni,
a nié ti Judôsze co zniszczëlë dôwającą żëc lëdzóm gòspòdarkã?
Òjcze nasz, Tatkù w niebie za se i za miliónë
taczich jak jô lëdzy chtërny òstelë òbrabòwóny z jich robòcëch
môlów proszã Ce, błagóm Ce: Zeslë Twòjégò Dëcha, niech sã
przezdrzi co sã pòrobiło na ti zemi. Niech òbôczi wiele falszëwòtë,
łżélstwa, wëzwëskù, òbrazë mòralnoscë, nãdzë, zbrodnie, òszëkaństwa,
bezrobòcégò i félaniégò jaczich le widoków na przińdnotã przëniosła
nama ta ,,nowô wòlnô Pòlskô”. Niech przińdze z wôgą bë zwôżëc
òbietnice i bùszny słowa, niech je pòrównô z lëchima, nielëdzczima
dzejanima tich co òdpòwiôdają za dzysdniowé i przińdné losë
tego kraju i nas. Niech przińdze, bò znôuka je nót. Donëchczasné
miónë lëca ti zemi dlô baro wiela ji sënów i córków są baro
lëché, a czãsto wòłają do nieba ò pòmsta. Wëlãkłi wëzdrzôł
jem na krziż, mòże mòje mëslë bëłe za smiałé, za kriticzné?
Òn dali spòkójno zdrzôł na miã z górë. Cëchò zacził jem prosząco
mówic: „Panie òdpùscë mie, ödpuscë nama naje winë, jak i më
òdpùszcziwómë naszim...” tu jem sã zatrzimôł.
Czë je mòżebno, czy móm prawò òdpùscëc winë
tima, chtërny przez nieùdacznictwò, głëpòta, chcëwòtã, a mòże
téż zdradã gëszeftów najégò nôrodu doprowadzëlë do tragediji,
do tegò, że milionë lëdzy są bez robòtë i nie mają za co żëc?
Nie skùńcził jem pôcerza, jem nie mógł, jô jem nie béł w sztãdze.
Nie ùzwëskôł jem ùspokòjéniégò i ùkòjeniégò.
Zgrużdżony, zgnãbiony pòmalinkù wlókł jem sã
dodóm. Mie sã nie spieszëło. Wiedzôł jem, że héwò czeka mie
smùtné wëzdrzenié białczi i wëstraszoné pëtanié: „Dze të tak
dłëgò béł? Nalôzł të mòże jaką robòtã?
zaczątk
|