Òb lato we stolpsczim zómkù pòmòrsczëch
ksãżãt òdbiwają sã co niedzelã Jarmarczi Grifitów. Chòc miono
wzãłë òd dinastiji naszëch, pòmòrsczëch włôdców – nié wiedno
są namienioné na rozkòscérzanié kaszëbiznë.
Jarmark
zaczinô sã kòle drëdżi, chòc pierszé stojiszcza z ksążkama,
stôrima wôrama, chlebã ze szmôłtã przëjeżdżiwają ju kòle jedenôsti.
Na binã wchôdô zapòwiôdajk, jaczi prócz szpòrtów ë zapòwiôdaniégò
nôslédnëch karnów mùzycznëch téż robi zachãcbã wëstôwków òrganizowónëch
w Mùzeji. Midzë jinszima je czëc, że do òbezdrzeniégò je westôwk
„fòlkloru tutich zemiów, stwòrzonégò przez repatriantów zeza
Bùga, czë Pòlsczi centrowi, a téż autochtonów”. Bëło tak czëc
rôz czë drëdżi, a nijak nie szło ùczëc, że chòdzy prawie ò
Kaszëbów, a dokładni ò zôpadny dzél najgò nôrodu – ò Słowińców.
Jô nie strzimôł ë pòszedł sã zapëtac direkcëji Mùzeji, czemù
nen zapòwiôdajk nie ùżëje słowa „Kaszëbi”
- Kò to je wiedzec, że mòże òbezdrzec fòlklor nié le Kaszëbów,
chòc téż Kaszëbów. Fòlklor lëdowi twòrzëlë kò tuwò téż Miemcë.
Słowò autochtonë ni mòże kò bëc òdczëtiwóné jakò òbrazlëwé,
to je le taczi mëszlowi skrócënk – wszëtcë tuwò wiedzą że
w zacht dzélu chòdzy ò Kaszëbów – gôdô Marzenna Mazur, czerowniczka.
Jeżlë wszëtcë wiedzą, téj czemù nicht tegò miona nie ùżiwô?
Téj ju nie darwô ùżëwac? Dlôcze z miona òstelë wëmieniony
wszëtcë le nié Kaszëbi?
- Na rozegracëje „wilniuków” przëchôdô nawetka kòle tësąca
òsób, całé rodzënë – gôdô jesz czerowniczka. Szkòda, że terô
czéj bëło na pòstrach napisóné ò fòlklorze Pòmòrzégò – przëszło
mòże le 200-300 òsób Në a téż ti pòmòrskòscë czëlë kaszëbsckòscë
za wiele nie bëło: le ten chléb ze szmôłtã ë dwa stojiszcza
z kaszëbsczim złobiórstwã. Zato karna mùzyczné dërch wcyg
spiéwałë ò Lwòwie.
Érë kaszëbiznë le barniło karno Ricerzów Pòmòrsczëch „Jastrzib”
z Bëtowa. Òb całi czas jarmarkù mielë swòje pòkôzënczi biôtczi
czë paradë, z barnią ë w ruchnach, jaczé sami so mają zrobioné.
- Naje karno mòże nie je jedurné, ale gwës jedno z niewielu
– trzech, mòże sztërzëch, jaczé wëstąpiwają w farwach ricérstwa
pòmòrsczégò – gôdają nôleżnicë karna. Jejich ruchna są tipòwé
dlô cządu 8.-12. stalatégò.
- To cząd czéj jesz Pòmòrskô bëła samòstójnô – gôdają z bùchą.
To je to czim mòże sã tuwò bùsznic – tradicëje wiôldżégò
Pòmòrzégò. Dzëwi mie përznã czemù ne tradicëje mùszą dërch
ùstãpòwac jaczims jinszim tradicëjóm, chòc cekawim ë pësznym,
leno przëwiozłim z jaczich cëzëch strón swiata.
P. Kąsk
zaczątk
|