 |
| Kòmpanijô Wãdzëbôków - nowe mùzyczne karno |
Przë brusczim Kaszëbsczim Òglowim Liceùm naczãło grac rockòwé
karno mùzyczne. Je to ju drëgô naszô formacëjô (pierwszą je
Chëcz), co mô ùdbã robic mùzëkã dlô młodich ë spiéwac dlô nich
pò kaszëbskù. Karno nazëwò sã chwëtliwie, a przë tim kąsk enigmaticzno
ë szportowno - Kòmpanijô Wãdzëbôków.
Równak jeżle chtos pò òwim mionie bë sã mëszlôł, że Kòmpanijô
letkò pòdchòdô do grania, milëł bë sã baro.
Sekcja jinsrtumentalnô je bòkadnô: dwie gitarë elektriczne,
basowò gitara, perkùsëjô ë grëpa skrzëpiców (trzë sztëczi).
Derżéń formacëji je òpiarti na mùzëkach karna Horn, co ze sobą
ju grają pôrã lat. Skrzëpice, chtërne robią baro widzałi czëcowi
ùstôw, ë jedna elektricznô gitara są w rãkach ùczniów brusczégò
KLO. Wòkalistką Kòmaniji Wãdzëbôków (charakteristny, czekawi
głos wôrt ùwôdżi) je sztudirka Mùzyczni Akademiji w Gduńskù
- Damroka Kwidzińskô.
Karno nie òdżegniwô sã òd najégò folkloru. Bierze z niegò wëchòdające
z przekònanégò, że òd kòrzeniów nie nôleżi òdchòdzëc. Dejade
nie je mòżno nazwac Kòmpaniji Wãdzëbôków karnã folkloristicznym
- je grëpą rockòwą, co czasã jidze w starnã bluesa, a ne tekstë
lëdowe są przërëchtowóne w nowich aranżacëjach. W swòjim repertuarze
formacëjô mô, na dzys dzéń, jeden cover. Grô téż balladã Michôła
Piépera - Kôrbiónkã z aniołã. Do jinszégò tekstu Piépra ...niechôj
pòlecã... stwòrzëła mùzëkã.
Karno je nafulowane chãcą grania ë je widzec, że nie je to blós
chãc słomianô (jô bëł na jich próbie). Graje dobrze ë rozmie
sã w mërgniãcy òkã. Wierzã, że ùdô jemù sã dostac na szersze
mùzyczne wòdë. A terô bãdze gò mòżno pòsłëchac na zakùńczenim
III Kònkùrsu Kaszëbsczi Pòezëji, co òdbãdze sã w brusczim liceum
16 - gò smùtana latos ò gòdz. 10.00.
Jôbard
zaczątk
|
|
| 
Na Jinternece nigdë ni môsz
wszëtczégò…
żebë miec wiedno całą Òdrodã, wiedno na czas – òbacz tuwò
Mòżesz nas wspòmòc w wëdôwanim abò kòlpòrtażu?Napiszë do naju! |
|
|
