Z różnëch tekstów (drëkòwónëch nié le w Òdrodze), wëpòwiedzów,
gôdków, pòliticznëch szpòrtów ë wiców mómë wëlowóné czile fejn
zdaniów. Wëszedł z tegò nié taczi môłi Słowôrzk Rësznotë Kaszëbsczi.
Pòrządk słów òstôł téj-séj mieniony w zesôdzenim z òridżinałã,
równak jeżlë chtos rozpòznôł gwôsné słowa – Redakcëjô żëczi
miłégò wieczoru.
Kaszëbsczi jãzëk – apartny jãzëk,
jaczi je dzélã pòlsczégò jãzëka na prawach nôbarżi apartnégò
dialechtu. Jegò znanką je przede wszëtczim gôdanié „łe” dze
le sã dô.
Kaszëbsczi jãzëk–
pëszny stôropòlsczi jãzëk.
Kaszëbsczi jãzëk w szkòle – jak
kòżden jinszi cëzy/domôcy jãzëk nôwôżniészé w jegò ùczbie
je, żebë ùcznie rozmiele zaspiewac pôrã lëdowëch frantówków
ë òdsadzëc pług òd brónë.
Ti, co na kaszëbiznie sã „dorabiają”
– dzejôrze, jaczi przë òrãdze dzejaniégò mają zwësk z kaszëbiznë.
Ti, co na kaszëbiznie sã nie „dorabiają”
– dzejôrze, jaczi przë òrãdze dzejaniégò mają zwësk z kaszëbiznë.
Ti, co do kaszëbiznë gwôsné dëtczi dokłôdają
– wszëtcë dzejôrze.
Spòdlé kaszëbsczi juwernotë –
jãzëk, chtërnégò zacht dzél kaszëbsczich élitów nie znaje,
a zacht dzél resztë Kaszëbów sã sromô.
Mecz balë midzë Cassubią Kòscërzna ë
Legią Warszawa – jedurnô òrãga, żebë Kaszëbi mòglë
pòkazac, że są wierny sënowie Pòlsczi.
Òglowi spisënk–
òrãga, żebë Kaszëbi pòkazelë, że są mòcny le w gãbie.
Dba ò kaszëbiznã – stara ò to,
żebë Kaszëbi stelë sã wielokùlturowi.
Dozéranié kaszëbiznë – stara ò
to, żebë kaszëbizna mia jak nôlżészą smierc.
Dzejanié dlô kaszëbiznë – gôdanié
pò pòlskù/miemieckù/… (niepòtrzébné wësztrichnąc) ò kaszëbiznie
przez Kaszëbów.
Ùgrãdzanié Kaszëbóm żëcégò – pisanié
ë gôdanié pò kaszëbskù.
Ùgrãdzanié nié-Kaszëbóm żëcégò– pisanié ë gôdanié pò kaszëbskù.
Pisanié ë gôdanié pò kaszëbskù
– nicht nie wié co to je, bò nicht te nie rozmieje.
Môl kaszëbiznë na Pòmòrzim – zarô
pò pòlaszëznie, miemcëznie ë ùkrajiniznie.
Statistika ùżëcégò słowa „Kaszëbë”
– w zesôdzenim ze słowã „Zemia” dwa razë mni, w zesôdzenim
ze słowã „Europa” sztërë razë mni , w zesôdzenim ze słowã
„Pòlskô” sto razów mni.
Kaszëba – taczi jinszi Pòlôch.
Pòlôch – przede wszëtczim je nim
Kaszëba.
Kaszëbizna – przënôlegającô do
kùlturë ë nôrodu pòlsczégò, apartnô ë samòbëtnô kùltura autochtonicznégò
lëdu żëjącégò nad Bôłtã.
Chinszczëzna – dzél kaszëbiznë
(Kaszëbi bëlë wiedno wielokùlturowi).
Żëdowizna - dzél kaszëbiznë (Kaszëbi
bëlë wiedno wielokùlturowi).
Pòlaszëzna-
dzél kaszëbiznë (Kaszëbi bëlë wiedno wielokùlturowi).
Miemczëzna - dzél kaszëbiznë (Kaszëbi
bëlë wiedno wielokùlturowi).
Nôrodowi pòzdrzatk – barżi niebezpieczny
jak cepliństwò pòzdrzatk, jaczi chce zszargac wielokùlturowòsc
Kaszëbów.
Wielokùlturowòsc Kaszëbów
– stôrô prôwda jakô mówi, że Kaszëbi parłączą w se
wiele kùlturów, a nômni w tim je kaszëbsczi kùlturë.
Grãdé òkòlé – gard abò òkòlé dze
Kaszëbi mówią, że są Kaszëbama.
Prosté (zwëczajné) òkòlé - gard
abò òkòlé dze Kaszëbi mówią, że nie są Kaszëbama.
Kaszëbë – corôz mniészi dzélik
zemi, dze jesz je wòlno rzec, że mieszkają Kaszëbi.
Dëchòwô bòkadnosc Kaszëbów – przënôleganié
ë ùjuwernianié sã do jak nôwikszi lëczbë kùlturów.
Jãzëkòwô bòkadnosc Kaszëbów –
to, że Kaszëbi znają nôslédné jãzëczi: pòlsczi, miemiecczi,
czãsto rusczi, anielsczi, francësczi. Kaszëbsczi nié wiedno.
(Bò pò co? – dopisënk redachtora)
Grif – symból Kaszëbów, jaczi
nôleżi zastãpic czim jinszim, bò sã za baro z Kaszëbama kòjarzi.
Môłpa pòd pôlmą – bédowóny symból
Kaszëbów.
Kaszëbizna òb wëlacëją – stara,
żebë przed wëlacëją nie gadac ò Kaszëbach ni pò kaszëbskù,
bò to bë bëła gwësno nieùtcëwô wëlownô biôtka.
Jãzëkòwô pòlitika – stara, żebë
jak nômni lëdzy gôdało pò kaszëbskù, a żebë w europejsczi
statistice bëło mòżno wpisac czile kaszëbsczich licejów.
Stara ò przekazywanié kaszëbiznë doma
– stara, żebë wszëtcë prócz … (tuwò wpisac gwôsné jimiã ë
nôzwëskò) gôdelë ze swòjima dzecama pò kaszëbskù.
Stara ò przekazywanié kaszëbiznë w krómie/na
zéńdzenim – stara, żebë wszëtcë prócz … (tuwò wpisac
gwôsné jimiã ë nôzwëskò) gôdelë w krómie/na zéńdzenim pò kaszëbskù.
Stara ò kaszëbiznã w pismionach
– stara, żebë wszëtcë prócz … (tuwò wpisac gwôsné jimiã ë
nôzwëskò) piselë pò kaszëbskù.
Kaszëbsczé pismiona – cządniczi
wëdôwóné na Pòmòrzim, jaczé [… … … Ùrząd Kòntrolë Widowiszczów
ë Pismión]
Jinternét – jesz nierozpòznónô
zagrożba procëm Kaszëbóm. Na szczescé nie je tak letkò na
Jinternéce pisac pò kaszëbskù.
K-PZ – Ôbram ë Mòjżesz Kaszëbów.
Jinszé karna ë stowôrë – niebezpieczny
lëdze.
Nowô kaszëbskô stowôra/part– zagrôżba ë dzejanié procëm kaszëbiznie.
zebrôł pk
zaczątk
|