Spiéw, damienny tuńc, wënagòliszcze
Òsobë:
KAWALÉR
PANNA
KNÔP
CHÓR DZÉWCZÃTÓW (w nim midze jinszima DZÉWCZÃTA I, II ë III)
CHÓR CHŁOPÓW (mòże téż to bëc jeden CHŁOP, nie za młodi, abò
dwùch).
KASZËBSKÔ KAPELA (skrzëpczi, klarnet, basetle, bùrczybas ë
pùkadła taczé jak diôchelsczé skrzëpczi; ni ma armòniji)
Cos dlô reżisera
(ò strojach ë ò aktorach)
PANNA òbùtô je pò kaszëbskù z tim, że dwie sëczenczi, nie
równy dłëgòscë, są (jedna z lewégò, drëgô z prawégò bòkù)
rozcãté ë związóne blewiązkama; na ji głowie téż je blewiązka
związanô pòd brodą w kòkardã, a téż czepc. Ji piersnik ë bùksczi
przëstrojają, przëpiãté zôtrzôskama, kaszëbsczé wëszëwë –
dwa na piersnikù, trzecy na bùksówkach.
KNÔP nie mòże bëc niższi jak PANNA.
CHÓR DZÉWCZÃTÓW (midze jinszima DZÉWCZÃTA I, II ë III) òblokłi
je w proste sëczenczi, krótsze jak ta PANNË, a téż w szeroczi
bluzeczci. DZÉWCZÃ III lepi jakbë bëła censzô niżle PANNA.
Jesz kąsk didaskaliów
Niedalek rampë z lewi starnë stoi CHÓR CHŁOPÓW. Jeżle dejade
je to leno jeden CHŁOP, sedzy w zeselu taczi jaczis zmùdzony,
zmarachòwóny. Z prawi starnë stoi KAPELA. W drëdzi linie barżi
pò prawi stoją: PANNA ë KNÔP. Kąsk dali w tił binë, na westrzódkù
je pòłożony ZBÓN, a w nim CÉRZNIÉ (psenka, drzón, dzëwô róża).
Jesz dali w głãbiã binë, z lewi starnë stoi wiésznik, a z
prawi CHÓR DZÉWCZÃTÓW, ùstawionich jakbë kòlumna wòjska zdebkò
ze skòsa do òśczi binë.
W piérszi rydze ti kòlumnë stoją DZÉWCZÃTA I, II ë III, za
nima jinsze, a jesz głãbi miast brutków mòże bëc malënk, a
na nim nieskòńczenié dłëdżé rydżi dzéwczãtów. Miast malënkù
je mòżno zrobic jegò projekcjã na ekranie zawieszonim z tiłu
ù górë, bë dało to doznanié głãbi òbrazu.
Scena 1
KAWALÉR
Wchôdô z lewi starnë. Je òblokłi w szôrk (1)
, na głowie mô rëbacką kapùzã, w rãkù trzëmô leszczënowi szlig.
Pòdchòdô do wiésznika, scygô kapùzã (pòd nią miôł jesz òbùte
zëmòwą mùcã, co jã dopiérze terô je widzec) ë wiesza jã na
nim. Pòtémù scygô mùcã ë téż wieszô jã na wiesznikù. Spiéwô
na melodiã Kaszëbsczégò Alfabetu ë leszczënowim szligã pòkazëje
òbiektë, ò chtërnich spiéwô.
To je mùca, to je pùza (2), to je naszkô
jazgùlka (3).
To rëbackô je kapùza, a to całô piãknuszka
CHÓR DZÉWCZÃTÓW
Spiéwają tak, jakbë òdpòwiadałë KAWALÉROWI na melodiã refrenu
Kaszëbsczégò Alfabetu. W spiéwie wspòmagô je KAPELA, chtërna
ju do kùńca bãdze grac refrenë.
To całô piãknuszka.
Rëbackô kapùza, mùca, pùza, jazgùlka.
Scena 2
KAWALÉR
Spiéwô ë wskazuje leszczënowim szligã rzeczë. Piérsze dwa
taktë z przëstónkama, dalszé zwëczajno.
To je czepc, tu je płëc (4), to są
cérznié, biôłé lica.
CHÓR DZÉWCZÃTÓW
Jak w ùszłi scenie.
Cérznié.
Biôłé lica, czepc, płëc, to całô piãknuszka.
Rëbackô kapùza, mùca, pùza, jazgùlka.
KAPELA pòwtôrzô refren, nawetka jeżle trza to wiele razë
(dali w sztëce tak samò). W tim czasu PANNA scygô czepc, KNÔP
gò bierze, tuńcëje z nim do wiésznika ë zawiesziwô gò na nim.
CHÓR CHŁOPÓW
A co dali, a co dali, a co dali je?
Scena 3
KAWALÉR
Spiéwô tak ja w ùszłi scenie. Takt òstatni z przëstónkã.
To je paja (5), to je nóżka, to panieńsczi
je szërtuszk (6).
CHÓR DZÉWCZÃTÓW
Jak rëchli.
Panieńsczi to szërtuszk. Paja, nóżka, cérznié.
Biôłi lica, czepc, płëc, to całô piãknuszka.
Rëbackô kapùza, mùca, pùza, jazgùlka.
KAPELA pòwtôrzô refren. W tim czasu PANNA scygô szërtuszk,
KNÔP gò bierze, w takt melodëji tuńcëje do DZÉWCZÃCA I ë jakbë
ją òblôkô w nen szërtuszk. Òna dejade szërtuszka nie wiąże,
le pòdtrzëmùje z dwùch starnów.
CHÓR DZÉWCZÃTÓW
A co dali, a co dali, a co dali je?
Scena 4
KAWALÉR
Jak rëchli.
To je liwk, to je tiłk, a to farwnô blewiązka.
CHÓR DZÉWCZÃTÓW
Jak rëchli.
Liwk, tiłk, blewiązka.
Panieńsczi to szërtuszk. Paja, nóżka, cérznié.
Biôłé lica, czepc, płëc, to całô piãknuszka.
Rëbackô kapùza, mùca, pùza, jazgùlka.
KAPELA pòwtôrzô refren, a w tim samim czasu PANNA scygô liwk
ë òdwiązëwô blewiązkã. Pòmôgô ji w tim KNÔP, a pòtémù dwakroc
tuńcëje do DZÉWCZÃCA II, wkładô ji liwk na remiona, a blewiązkã
na głowã.
CHÓR CHŁOPÓW
A co dali, a co dali, a co dali je?
Scena 5
KAWALÉR
Jak wëżi.
To je szëja, to je zbón, to panieńskô sëczenka.
CHÓR DZÉWCZÃTÓW
Jak wëżi.
Szëja, zbón, sëczenka, liwk, tiłk, blewiązka.
Panieńsczi to szërtuszk. Paja, nóżka, cérznié.
Biôłé lica, czepc, płëc, to całô piãknuszka.
Rëbackô kapùza, mùca, pùza, jazgùlka.
KAPELA pòwtôrzô refren. W tim czasu PANNA òdwiązëwô blewiązczi
nôpiérwi òde piérszi sëczenczi, pòtémù òd drëdżi. KNÔP w taktë
melodëji pòkòleji je z ni zebùwô, dwakroc tuńcëje do DZÉWCZÃCA
II ë jakbë ją w nie òbùwô). Òna dejade nich sëczenków nie
zawiązëwô, le pòdtrzëmëwô z òbù starnów.
CHÓR CHŁOPÓW
A co dali, a co dali, a co dali je?
Scena 6
KAWALÉR
Jak rëchli.
To je pòpleck (7), to je ùzémk (8),
a to całô kòszëla.
CHÓR DZÉWCZÃTÓW
Jak rëchli.
Pòpleck, ùzémk, zgło (9).
Szëja, zbón, sëczenka, liwk, tiłk, blewiązka.
Panieńsczi to szërtuszk. Paja, nóżka, cérznié.
Biôłé lica, czepc, płëc, to całô piãknuszka.
Rëbackô kapùza, mùca, pùza, jazgùlka.
KAPELA jak rëchli, a w tim czasu (w ritmë melodëji) PANNA
òdwiązëwô blewiązczi dekòltu kòszlë, KNÔP pòdchòdzy do ni
ë zesëwô kòszlã z ji remion. Przëòdzéwk spadô na zemiã, PANNA
robi krok w starnã KAWALÉRA, KNÔP pòdnoszi kòszlã ë tańcëje
z nią do DZÉWCZÃCA III. Òna ùnoszi rãce do górë, a KNÔP jã
òbuwô. Kòszla przëkrëwô ji całi dotëchczôsny òbleczënk – niekaszëbską
sëczenkã ë bluzkã.
CHÓR CHŁOPÓW
A co dali, a co dali, a co dali je?
Scena 7
KAWALÉR
Jak rëchli.
To kaszëbsczé są wëszëwë.
CHÓR DZÉWCZÃTÓW
Jak rëchli.
Kaszëbsczé wëszëwë. Pòpleck, ùzémk, zgło.
Szëja, zbón, sëczenka, liwk, tiłk, blewiązka.
Panieńsczi to szërtuszk. Paja, nóżka, cérznié.
Biôłé lica, czepc, płëc, to całô piãknuszka.
Rëbackô kapùza, mùca, pùza, jazgùlka.
KAPELA jak rëchli. KNÔP pòdchòdô do PANNË ë zriwô z ji piersnika
(przypiãti zatrzaskama) jeden haft, tuńcëje z nim do DZÉWCZÃCA
III ë szpileczką przypinô gò do ji kòszlë na wësokòscë piersë.
Pòtémù wracô do PANNË ë zriwô ji drëdżi haft. Robi to tak,
że ùriwô sã remionczkò òd piersnika. Piers dejade sã do kùńca
nie òdkrëwô. KNÔP drëdżi rôz pòdtańcowùje z haftã do DZÉWCZÃCA
III ë przypinô gò do kòszlë, tam gdze drëgô piers. Jesz rôz
przëtańcowùje do PANNË ë zriwô z ji bùksczi trzëcy haft, z
chtërnim pòwracô do DZÉWCZÃCA III ë przipinô gò... tam gdze
trza.
CHÓR CHŁOPÓW
A co dali, a co dali, a co dali je?
Scena 8 (finôł I)
PANNA
Ji òbleczenim są ju terô leno bótczi, piersnik ë bùksczi.
Spiéwô na mëlodëją „Marëszczi”. Na kùńc spiéwczi trãpie nóżką
(tak z żëcim).
Dali to, dali to nie je kaszëbsczi strój.
Dali to, dali to kùpił mùlk z GS-ù
[: Pôrã dëtków dôł :] wëzdrzã jak princesa.
KAWALÉR pòdchòdô do PANNË ë òkriwô ją swòją peleriną. Òdchòdzą
z binë.
Scena 9 (finôł II)
KNÔP ë CHÓR DZÉWCZÃTÓW są w półceniu. Terô wid jich pòmalińkù
rozwidniô.
KNÔP tuńcëje (w ritm refrenu Kaszëbsczégò Alfabetu, co gò
grô kapela), scygô z DZÉWCZÃCA II sëczenczi, liwk ë blewiązkã,
z DZÉWCZÃCA I szërtuszk, a z wiésznika czepc. Pòdtańcowùje
do DZÉWCZÃCA III ë òbùwô ją w ne ruchna. W czase òbleczaniô
DZÉWCZÃ III przesuwô sã do westrzódka binë. Ji plac zajimô
dzéwczã z nôstãpné rydżi kòlumnë chóru.
DZÉWCZÃ III
Òblôkłô jak DZÉWCZÃ na zaczątkù dramë. Spiéwô na melodëjã
„Marëszczi”:
Terô jô, terô jô! Chto ùskòczny mie
Wënagòcëc chce? Chce?
Zawiesëna
Zeza zawiesënë wëchòdô KAWALÉR òblokłi pò kaszëbskù (ale
bez pelerynë) ë z zamëslenim gôdô:
Żëcé jidze wiedno wkół.
Skòrno jem jedną wenagòlił,
A ju drëgô parłãżnicą je,
A ju za nią ùrma jich...
Świat sã krąci wiedno wkół...
Czedë KAWALÉR gôdô czwôrtą wiérztã, z prawi starnë zawiesënë
ùkôzëwò sã dekòracëja – niekùńcząca sã kòlumna dzéwczãtów.
Kùńc
zaczątk
|