Niespòsób òd ni ucec, je z nama na codzéń, mómë doznanié,
że nas ùscëgòwiô. W kuńcu, mómë ji dosc, le z drëdżi stronë,
jakas nieznónô mòc robi, że lniemë do ni jak mòrë do widu.
Kògò, a rëchli co móm na mëslë? Pòlitika, pòlitika i jesz
rôz pòlitika. Dzysodnia, chôłpnosc panowaniô je tak wialgô,
że sã sta spragłim łupã prawie dlô każdégò. Dëcht le temù,
wcyg gôdô ò ni ë ò lëdzach, jaczi sã w „nią bawią”. Pòlitika
staje sã czãsto zdrojã natchnieniô satirików, kabaretników.
Òni rozmią w spòsób lżészi, letczi ë lubczi, òdkrëc wszelejaczé
cemné stronë te warkù. Mają dosc tëli òdwôdżi, bë prosto,
udżibac te wiôrztë problemù, jaczé, z jaczis òrądzë, są dlô
wielu „niewprowôdzonëch” zakriwóné.
19. rujana, w pëszny kawnicë „Kolumb” w Pùckù, òdbéł sã artisticzny
wieczórk, na jaczim wëstąpił, znóny kabaret FiF, to je Rómk
Drzéżdżón ë Pioter Cëskòwsczi. Prowôdną témą zéńdzeniô bëłë
nôdchòdné samorządzënowé welowanié - w jaczi atmosferze mdą,
jak wpłëną na codniowé żëcé zwëkłëch mieszkeńców ëtj. W cekawą
kònstrukcëją uchwôconé òstôł psychòlogòwi pòrtret bëtégò pòsła
przechôdającégò sã ò reelekcëją. Pòstójca tegò pòznówómë òbez
òsobné wëznanié, zamkłé w fòrmie wdôrnika.
Nawkół pierszi témë, pòkazowałë sã téż jinszé sprawë, jaczé
nieòdstójno są z nim zrzeszoné. Równak w nôwikszim skrócenim,
jak sóm zaswiôdcził Rómk Drzéżdżón, kabaretowi wieczórk bë
mógł pòdzélëc na trzë dërżéniowé dzéle: wstãp, rozwinienié:
pòlitika – dëtczi - seks, no ë gwësno kuńc.
Atmosfera wieczorka bëła bëlnô. Wszetcë skòscérzony, bawilë
sã dobrze, bò smiéch na jich gãbãch bëło całi czas widzec.
Dejade tégò wieczora kawnica „Kolumb” bëła kò pewno jednym
z nôgłosniészich môlów w całim Pùckù.
W òprzestónkach midzë pòkôzkama kaszëbsczich kabaretników,
dlô stonowaniô rozgrzónëch do czerwònoscë czëców, mùzyczno
czarził lëdzy, niedôwno zakładłi kaszëbsczé liriczné karno
mùzyczné KÙTIN w składzie Agnesa Bradtke klawéra, Michôł
Piéper - gùtara. Òb całi wieczór przedstawilë 10 piesniów
- dokôzów równo Agnesë ë Michała, m.jn. Spik, Wdôr, Sniég,
Sama, Kuli, Melk.
Sami muzykańcë zeswiôdczëlë, że to bëło wôrt grac dlô taczi
pùbliczi, jakô nimo szpòrtownégò zéńzdeniô, rozmia môłknąc
przë piérszim côrniãcym jinstrumentów.
Jak gôdô przëmówka: smiéch je zdrowié, ë nie je to gwësno
blós taczé tam gôdanié, le sprôwdzóny uczało dokôzënk niejednégò
specjalistë. Dzãki némù nasz stón dëcha je w niespòdzójny
fòrmie, a to wpłiwô na naje òglowé czëcé, tak dalek, że pò
prôwdze chce nóm sã żëc!
Taką „smiéchòwą” terapiją dôwô kabaret FiF, jaczi przekôzywô
swòjim słëchincóm pòzytiwną stëtkòsc. Nie może równak przepùscëc
prôwdë, że òbez elementë hùmòru, czãsto òstôwają jakòs „szmuglowóne”
prôwdzëwé sprawë, nad jaczima wôrt sã përznã dłëżi namëslëc.
Artisticzni duetk kabaretu FiF ë mùzycznégò karna KÙTIN, òkôzôł
sã szosã w dzesątkã. Czë spòtkają sã jesz razã? Tégò mést
nicht, nawetka òni sami, nie są w sztãdze wiedzec. Jak gôdô
teòrijô fizyczi, że dwa procëmstójné biegùnë wiedno przëcygają
sã! Në téj do przińdnégò przëcyganiô!
M.Bradtke
zaczątk
|