| Nadbôłtowi Center Kùlturë we Gduńskù - jedna z nôlepi znónëch
jinstitucëjów zajimającëch sã kùlturã wkółbôłtëcką na Kaszëbach
- zrëchtowa w kòscele sw. Jana wëstôwk „Gduńsk - dwiérze wdôru”.
Naju czëtińcë zwarcëlë najã ùwôgã, że na jinstalacëji kòle banowi
stacëji w Gduńskù Głównym, jakô zachãcywô do òdwiedzeniô wëstôwkù,
nie ma nôdpisu w jãzëkù kaszëbsczim. Je w pòlsczim, rusczim,
miemiecczim, żëdowsczim, jitalsczim…
Westrzód wicy jak 10 jãzëków, ni mòże nalézc kaszëbiznë.
Czemù tak sã stało? Zabëcé? Lëchô wòlô? Gôdóm z Adamã Hlebòwiczã,
dôwcą deje ë autorã wëstôwkù.
- To nie je lëchô wòlô z naju starnë. Terô czëjã, że to mia
bëc, a më - céchòwnik jaczi to robił - jesmë czësto ò tim
zabëlë. Czéjbë chtos nama miôł to rzekłé przódë…Në a pòza
tim Kaszëbi są héwòtny, a më tuwò - jak je widzec - mómë wëpisóné
wszëtczé jãzëczi gòsców tegò gardu.
Në, jeżlë to mô bëc na taczi ôrt - téj grãdo miec co procëm.
Chòc përznã mie ti kaszëbiznë brëkùje. Na zôstny rôz mdzemë
mielë starã, żebë jinaczi to òtaksowac ë ò kaszëbiznie na
zachãcbach nie zabëc - dodôwô czerownik.
Scenariją zrëchtowôł kaszëbsczi pisôrz Paweł Huelle. Kaszëbizna
na samim wëstôwkù dejade je przëtomnô. Wëstôwk nie je letczi,
gwësno téż temù, że je mùltimedialny - w zacht dzélu je zrëchtowóny
ë prezentowóny na kòmpùtrach, z jaczima starszô generacëjô
mô wiedno përznã jiwru. Dôwô dejade przezérk historiji gardu.
Bòkadny historiji. Òd zôczątków - gôdczi ò Subisławie, dzejów
zôkònu cysterów… Historiją Gduńska wpisóną w historiją Kaszëbów
je widzec na wëstôwkù, chòc nie je to pierszi jegò zgrôw.
- Kaszëbi bëlë ë są tuwò gòspòdôrzama, a Gduńsk je bòkadny
òbez tã wielokùlturowòsc. - gôdô jesz A. Hlebòwicz - Òsoblëwie
dlô kaszëbiznë naju Center téż dosc tëli robi: dzãka nóm kaszëbizna
bëła niedôwno w Téatrze Wëbrzeżé, dze grało czile kaszëbsczich
karnów, lëdowé karno Kòleczkòwianie wëjacha niedôwno na kòncertową
wanogã, midzë jinszima na Syberiją.
Ùdbë Nadbôłtowégò Centra Kùlturë swiôdczą, że ta jinstitucëjô
chce brac dzél w żëcym kaszëbsczi kùlturë. W nôblëższim czasu
- na przełómie rokù mdze zòrganizowóny wëstôwk kaszëbsczich
szopków-betlejemków. Przédnictwò NCK je zajinteresowóné kaszëbizną
- kùlturą znade Bôłtu. Chòc jak na dzysô ni móm niżódny ùdbë
taczégò kaszëbsczégò wëstôwkù, czéj chtos przindze do mie
z taką ùdbą - mòżlëwòtë są wiôldżé. - gôdô na zakùńczenié
Hlebòwicz.
P. Szczëpta
Wëstôwk je òtemkłi jesz do 24. smùtana w kòscele sw. Jana
w Gduńskù (ùl. Swiãtojanskô, Center Gduńska).
zaczątk
|
