Mùzejô Zôpôdno-Kaszëbskô w Bëtowie mô latos
bëlną roczëznã. Ju òd trzedzësce lat zbiérô zabëtczi kùlture
dobëtkòwi Kaszëbów.
Kòżden chto le përznã czuł ò Bëtowsczi Mùzëji, przechôdô
mù na mësl kùltura kaszëbskô ë ji szeroczi rozkòscërzanié.
Òficjalno dzejanié zaczãła w 1972 rokù, równak zaczątk kòlekcëje
sygô smùtana 1962 rokù. Piérszima eksponatama bëłë nôrzãdza
gbùrsczé, tkacczé, rëbòcczé ë jinszé, jaczé òstałë pòkôzóné
w Krézowim Dodomù Kùlturë.
Môl òstôł zagwësniony dlô Mùzëji w Dodómie Zôkònnym, pòłożonym
w nordowim skrzëdle zómkù krzëżacczégò. Tén bùdink razã z
Basztą Młënową ë Wiéżą Prochówą zawiérô sã w zómkòwi grëpie
mùzejowi.
Zôczątczi dzejaniégò mùzeji bëło baro drãdżé bez warënczi
môlowé, fëlowało midzë jinszima składów mùzejowëch. Sytuacëjô
ta pòlepsza sã dopiérzë na zaczątkù lat 90ëch, czédë òsta
zakùńczonô bùdowã dzélu zómkù przerëchtowónégò na môl mùzeji.
Piérwszim direchtorã béł Pioter Cëlecczi, dzysodnia fùnkcëją
tã sprawùje Janusz Kopidłowsczi.
Z leżnoscë roczëznë prôcownicë Mùzeji przerëchtowalë konferencëją
nôùkòwą namienioną kùlturze ë historëji bëtowsczi òbéńdë.
Swòje referatë wëgłoszëlë antropòlodzë, architekcë ë historicë.
Wôżnym dzélã programù bëło téż òtemkniãcé wëstôwkù „Tereczesnô
sztëka lëdowô Kaszëbów”. Béł to wëstôwk pòkònkùrsowi, chtëren
òstôł wëróżniony bez Mùzeją Historiczno-Etnograficzną w Chònicach.
Wëstôwk nen je mòżno òbzerac do kùńca gromicznika.
Mùzëjô na swòjã roczëzna dosta pòdark: archiwa z zapiskama
zemi bëtowsczi z lat 1976-1989 nieżëjący ju prof. Jadwidżi
Kùcharsczi z Ùniwersytetu Łódzczégò.
Zôpadno-Kaszëbskô Mùzejô w Bëtowie mô téż swój bùtnowi òddzél
w Szkòle we wsë Płotowò. Są tam dwie zale wëstôwkówé namienioné
szkółowiznie pòlsczi w Miemcach ë dzejaniémù Partu Pòlôchów
w Miemcach. Je téż komplétno ùmeblowónô szkòłowô jizba z czasów
midzëwòjnowëch.
Do dzysdnia bëtowskô Mùzejô zòrganizowa wiele westôwków nie
blós u se, a téż w Łowiczu, Człochòwie ë Seradzu.
Wôżny dzél dzejaniô Mùzeji to dokazë wëdôwniczé: prowôdniczi,
jinfòrmatorë, ë wëdôwstwa stałé: „Naji Pòmòrzé”.
R.Z. Sobisz
zaczątk
|
