Jak kòżda spolëzna, Kaszëbi òkróm swòji robòtë mielë téż
swòją zôbawã. A czéj lëdzë sã bawilë, téj téj-séj chcelë sprôwdzëc,
chto je lepszi. Szôlony tuńc je przëmiôr taczégò pòpisu ë
kònkùrsu. Zasada je prostô - chto nôdłëżi wëtrzëmie corôz
chùtszi tuńc, chto téż mdze tuńcził nôbëlni - ten dobiwô.
Tuńc zaczinô sã jakno dosc wòlnô pòlka, a czéj przëspiészô,
téj tuńcérzóm sã plączą nodżi, pòtrącają sã, niechtërny ùpôdają.
Ti, chtërny nie strzimią tuńca, òdchôdają z kònkùrsu, a nôlepszé
trzë parë dostają nôdgrodë. Szôlony bëł wôżnym wëdarzenim
towarzësczim ë wszëtkò, co sã tedë dzejało, jesz dłëgò bëło
kòméntowóné.
Paòl Szefka notëje nôslédné leżnoscë, przë jaczich béł tuńczony
Szôlony:
- wiesela
- zëmòwé bale (dzysodnowy karnawał) ë Zeloné Swiãta
- òżniwinë (zbòżowé abò brzadowé)
- Roztrãbarchë - ùroczëzna pasturzów i jachtôrzów.
Czéj béł kònkùrs, téj mùszałë bëc i nôdgrodë. Òb midzëwòjnowi
cząd bëłë fùndowóné:
Przez rzemiaslników: dlô pierwszi parë beczkã piwa abò trzë
kòrnusë; dlô drëdżi pare dëmiónô swiniówô szënka; dlô trzecy
parë dwa dëmióné półgãsczi.
Przez karczmôrzów - 1. bùdlã sznôpsù, 2. szterë kùfle piwa
i krãg wôrsztë, 3. dwa kùfle piwa i krąg wôrsztë.
Przez starostóé gbùrsczich òżniwinów - 1. beczkã piwa, 2.
dwa kùfle piwa i 2 kg piekłi baraninë, 3. dwa kùfle piwa i
jajecznicã na zélcu zez 30 jaj.
Starostowie brzadowëch òżniwinów - 1. dwie bùdle kòrnusa,
2. achtel (1/8 beczczi) piwa, 3. szesc plińców z baraniną.
Na wieselim starszi młodëch fùndowalë: 1. achtel piwa i 8
skwarzónëch gãsëch ùdzëszczów, 2. liter kòrnusu i skwarzóną
kôczkã, 3. szterë kùfle piwa i gòtowóną kùrã
Jachtôrzë i pasturzë fùncowelë 1. szesc pòrcëjów piekłégò
dzëka abò sôrna, 2. szesc skwarzónëch zajkòwëch ùdzëszczów,
3. trzë piekłé kùropatczi.
Szôlony je tuńc letczi i wiesoły, nawetka friwòlny (je spiéwóné
téż „tuńcuj ze mią i w łóżeczkù...” abò „tuńcuj ze mią wiedno
wkół, a mdzesz ù mie dłëgò spôł”). Mëszlã, że je wôrt wprowódzëc
gò i do dzysôdniówëch jimprezów - karnawał je blëskò! Nawetka
nôdgrodów nie ma brëk zmieniwac, jô bë rôd dzëka abò zajka
zjôdł.
S. Gepper
zaczątk
|
