Wëjôzd kaszëbsczégò przedstôwce do Bruksele béł w tim samim czasu jak rozsądzenié ò przëjicym Pòlsczi do Europejsczi Ùniji – 13. gòdnika 2002.
To je przëtrôft, ale naczãcé wespółrobòtë przez Kaszëbów z EU mô taką samą wôgã jak przëjicé Pòlsczi do EU. – gôdô S. Kruszënsczi, przëdstôwca Kaszëbów w Néderlandach.
– To òtmikô mòżlëwòtë, żebë tak jak w nym sztóce Pòlskô wëszła z cénie Jałtë, żebë Kaszëbi wëszlë z cénie ùscëgòwieniô. – bëło czëc równo w Brukselë jak w Gduńskù.
Donenczas wespółrobòta je sparłãczonô ze zrechtowanim jinternétowi encyklopediji môłëch jãzëków, jakô mdze na serwérach EBLULa. Mdze w ni wszëtkò co je mòżlëwé ò Kaszëbach, co le je mòżno zapisac w elektroniczny fòrmie: artikle, słowôrzk, lënczi do jinternétowëch starnów pò kaszëbskù (na wszëtczé témë). Mô to bëc nôwikszi zbiér jinfòrmacëjów ò kaszëbiznie.
Donądka wespółrobòta ë zwënégòwnié eurodëtków jidze lëchò. Je czile ùdbów jaczé dostałë dëtczi, ale mòżlëwòtë są wialdżé. EÙ je w sztãdze dopłacëc jaż 60% do wszeldżich ùdbów jak: redio, telewizëjô, gazétë ë cządniczi w jãzëkù kaszëbsczim, badérowanié tikającé kaszëbiznë, wëdôwk wszëldżich ksążków pò kaszëbskù, ùczbòwëch ksążków, a téż słowôrzów. Wszeldżé ùdbë jaczi mają za zgrôw rozwij kaszëbsczégò jãzëka mògą rechwac na pòmòc. Sukces projektu zanôleżi przede wszëtczim òd tegò chto gò robi – czë je to òsoba kòmpetentnô, czë òrganizacëjô jakô nã ùdbã „firmùje” je gòdnô wiarë ë czë je to ùdba cekawô. Jeżlë chtos mdze chcôł na przëmiôr dëtczi na jinternétową starnã namienioną kaszëbiznie a dëcht le taczich starnów je ju 15, téj mëszlã, że nie dostónie wiele. Abò nie dostónie nick, bò jegò ùdba nie je nowòtnô. – gôdô Bertrand Menczasy (Bertrand Menciassi) z EBLULa.
Nicht Kaszëbóm dejade nie pòmòże jeżlë òni sami nie mdą chcelë so pòmòc. Prosto mùszimë jak nôwicy miec ùdbów, bo jaczis dzél – wikszi abò miészi – dostónie wspiarcé. A tak prawie kaszëbizna sã rozwinie.

Co EÙ mòże dac Kaszëbóm?

Prócz ùstawów europejsczich ë midzënôrodnëch ùgôdënków zawiartëch przë wespółrobòce z EÙ, jaczi dôwają gwarancëje prôw wszëtczim môłim jãzëkóm, Europejsczé Kòmisëje mógą dawac dëtczi na wiele zortów ùdbów, nôwôżniészé to:

redio w jãzëkù kaszëbsczim
telewizëjô w jãzëkù kaszëbsczim
gazétë ë cządniczi w jãzëkù kaszëbsczim
badérowanié ë projektë ùczałich tikającé kaszëbiznë
wëdôwk ksążków sparłãczonëch z badérowanim abò ze szkòłowizną (w tim wszeldżich ksążków do ùczbë jãzëka, historiji ë jinszëch subiektów w jãzëkù kaszëbsczim), a téż słowôrzów.
òrganizowanié ùczałich abò pòpùlarnëch zéńdzeniów namienionëch kaszëbiznie
jinszé dzejanié dlô kaszëbsczégò jãzëka ë kùlturë

Nôbarżi donenczas znóną rozegracëją dofinansowóną przez EÙ béł Zjôzd Kaszëbów w Wejrowie w 2001. rokù. Dofinansowanié òd EÙ mòże bëc maksymalno 60% drëdżi dzél ùdbòdôwca mùszi nalézc sóm: abò z gwôsnëch dëtków, abò òd spònsorów abò z jinszëch dotacëjów, na przëmiôr redżonalny samòrządzënë.

Cëż je brëk?
Dotacëje z EÙ dostôwają przede wszëtczim samòbëtné stowôrë. Wialgòsc dotacëje zanôleżi òd tegò jaczi to je projekt (wiele je nót dëtków, czë je to nowòtnô ùdba, jak wialdżé znaczenié ë zdrëszënową dôgã òna mô), òd tegò czë robią to lëdze kòmpeteny ë òd tegò czë stowôrze mòże wierzëc. Je wiedzec, że stowôra jakô je 50 lat mô wikszé szanse, żebë dostac dëtków jak jinszô, co òsta zaredżistrowónô przed miesącã.

pk

zaczątk