Westrzód kaszëbsczich mùzyków móże nalézc wielu lëdowëch
ùtwórców a téż czile karnów grającëch mùzykã „normalną”, rockòwą
czë pòézëją spiéwóną. Jednym z taczich karnów je Kùtin grający
pòézëją spiéwóną.
Karno Kùtin òsta zakładłé na
jeseni przez Agnesã Bradtke (klawir, spiéw), sztudérkã Mùzyczny
Akademiji we Gduńskù ë Michała Piépra (gùtara, spiéw), dôwnégò
spiéwôka rokòwi Chëczë. Równak deja bëła ju przódë. Ùdba żebë
zrobic taczé prawie karno sã narodzëła na wrãcziwanim nôdgronë
Stolëma rok temù, czéj zakłôdcë Kùtina pierszi rôz zagrelë
razã. Karno zaczãło dejade regùlarno kòncertowac òd 17. rujana,
czéj grało na promòcëji nowégò zbierka wiérztów Jana Zbrzëcë
w Lãbòrgù. Òd tegò czasu grelë dosc czãsto, midzë jinszima
na roczëznie Òdrodë ë téatrowim festiwalu w Parchòwie.
Do zakłôdców karna, Agnesë ë Michała, chùtkò dołączëła Magda
Jabłonskô (kòntrabas). Òstatny kòncert karna – na kaszëbsczich
zôpùstach 3.03.2003. òdbéł sã w rozszerzonym składze, z grającym
na akòrdiji Krësztofã Zimmermannã.
Kùtin grô kaszëbską pòézëją spiéwóną taczich kaszëbsczich
pòétów jak L. Heyke, A. Labùda, J. Zbrzëca, R. Drzéżdżón.
Téż są przez nich spiéwóné tekstë gùtarzëstë – Michała Piépra.
Mùzyka je pisónô przez karno.
Pòézëjô wiednô nôlepi òddôwô to, co je w lëdzczi dëszë, a
temù më spiéwómë pò kaszëbskù, że je to naj jãzëk, z jaczégò
jesmë bùszny. To mùszi tak dzejac, żebë kaszëbizna bëła przëtomnô
we wszëtczich dzélach żëcégò, téż w mùzyce. – gôdô Agnes Bradtke
Są kaszëbsczé karna rokòwé, a nie bëło karna grającégò pòézëją.
Temù pòwstôł Kùtin.
Miono Kùtin je baro cekawé ë baro pòmôgô karnu bëc chùtkò
pòznôwóné. Westrzód wielu tipicznëch mionów, archajiczné „Kùtin”
(stôrokaszëbsczé: czarznik, czarzecél), kòjarzi sã z dôwną
wialgòscą kaszëbsczégò nôrodu.
Karno mô nalazłé gwôsny stil, to je gwësné, z czasã gò rozwijô
a nen stôwô sã corôz barżi ùbòkadniony. Jak gôdają nôleżnicë,
mają sã ju nalazłé w mùzyczny jawernoce, wiedzą dze je jich
môl, ë nie mdą tegò swòjégò ôrta graniégò zjinaczac.
Na lato je ùdbónô mùzycznô wanoga pò Kaszëbach ë kòncertë
we wikszoscë kaszëbsczich gardów. Karno téż so ùdbô nagrac
platã CD, mô na to nalazłé dëtczi ë studio. Jeden je le jiwer
– Agnesa ë Magda są sztudérkama òstatnégò rokù Mùzyczny Akademiji
ë maja przed sobą terô cãżczi cząd. Temù plata mùszi bëc òdkładłô
na pùzni. Ale jak sami gôdają, gwës sã nie pòddadzą ë plata
mdze jesz latos.
P. Kąsk
zaczątk
|