W òstatnym tidzeniu gromicznika w Czechach, w Pradze òdbëłë
sã Dni Kaszëbsczi. Wespółòrganizowóné bëłë przez Òdrodã ë
Karno Drëchów Łużëcë Part Kaszëbskò Pòłabsczi. Sta sã òrãgą
dlô zéńdzeniégò badérów ë jinszëch òsób zajinteresowónëch
kaszëzbizną. A taczich w stolëcë Czech je wiele.
Zéńdzenia ë wëkładë dérowałë sztërë dnie. Nôprzód w Nôrodny
Mùzëji òdbëłë sã òdczëtë Władisława Knola ò jãzëkù kaszëbsczim
ë jegò zesôdzenim z czesczëzną ë Paùla Szczëptë ò tereczasny
kaszëbsczi lëteraturze ë sytuacëji kaszëbsczich médiów ë pismieniznë.
Miôł plac téż pòkôz òdjimków tradicëjny kaszëbsczi bùdowiznë.
Zéńdzenié w Nôrodny Mùzëji bëło òrãgą, żebë zajinaugùrowac
dzejanié Kaszëbskò Pòłabsczégò partu Karna Drëchów Łużëcë.
Czerownikã òstôł wespółrobiący z Òdrodą Władisłôw Knol, rodzony
Czech, jaczi òd lat jinteresëje sã kaszëbizną ë pisze pò kaszëbskù.
– To baro wôżné, że w najim karnie je part, jaczi przedstôwiô
jãzëk ë kùlturã najëch nôbarżi nordowëch słowiansczich bracynów.
– gôdôł Radek Czermak, przedstôwca włôdzów Karna.
Na drëdżi dzéń òdbëłë sã zéńdzenia w Bibliotece Słowiansczi,
jedny z nôwikszich bibliotéków skòscérzającëch ksążczi ë dokùmentë
sparłãczoné z historiją, lëteraturą ë jãzëkama Słowión. Kòle
50 ksążk kaszëbsczich, jaczé òstałë bibliotéce przekôzóné,
òsta ùfùndowóné przez Kaszëbsczi Jinstitut we Gduńskù, Òficynã
Czëc Wòjcecha Czedrowsczégò ze Gduńska ë Mùzëją Pismieniznë
ë Mùzyczi Kaszëbskò Pòmòrsczi we Wejrowie.
Bëłë téż zéńdzenia ze slawistama ë ùczałima z Ùniwesytetu
Karola w Pradze. Bëło wiele rzekłé ò tim, że je wôrt ë je
nót stwòrzëc w Pradze lektorat jãzëka kaszëbsczégò. – Praga
je mést pierszim ë nôlepszim placã bùten Pòmòrzégò, dze je
nót stwòrzëc kaszëbsczi lektorat. – gôdôł prof. Marvan. Pò
prôwdze na Ùniwersytece mają lektoratë bezmała wszëtczich
jãzëków słowiansczich ë ò Pradze sã gôdô, że je stolëcą zôpadny
Słowianiznë.
Karno Drëchów Łużëcë Kaszëbskò Pòłabsczi Part je zajinteresowóné
przëjazdã na Kaszëbë, żebë lepi pòznac Kaszëbów, kùlturã ë
jãzëk kaszëbsczi. Wialdżé je téż zajinteresowanié kùrsama
kaszëbiznë. Je baro mòżlëwé, że bądzemë gòscëc czesczich sztudérów
ju w maju. Chcą òni przëjachac na Zjôzd Kaszëbów, jaczi w
tim rokù mô bëc òrganizowóny w pòłwie maja we Stôłpskù.
ps
zaczątk
|