5. łżëkwiata Karno Sztudérów „Pòmòranijô”
zòrganizowa Kònkùrs Wiédzë ò Pòmòrzim. Kònkùrs je òrganizowóny
òd 1986, ë latos – jak wiedno – bëło zachtné zajinteresowanié
nim.
Zgłoszenia òstałë sélóné z 27 szkòłów z całégò Pòmòrzô. Przédnik
Karna – Krësztof Kòrda – je dbë, że nôwicy w taczim wialdżim
ùdzélu pòmògła refòrma szkòłowiznë ë terëczasny system, jaczi
zachãcywô szkólnëch do ùrzidzaniô ë rëchtowaniô swòjich ùczniów
do kònkùrsów ë òlimpiadów.
Z 86 òsób, jaczé sã dosta do finału we Gduńskù, przëjacha
71. Tuwò mùszëlë nôprzód przeńc przez test, w jaczim bëło
45 pëtaniów z geògrafije, lëteraturë ë historije. Nie béł
baro grãdi – gôdają nôleżnicë Pòmòraniji. Jinaczi gwës mëszlą
ò nim ùczniowie, bò pòłwa z nich bëlno òdpòwiedza na nie wicy
jak 50 pëtaniów. Nicht nie dobéł 40 pùnktów (45 bëło maksymùm),
14% dosta „dwùjã”. Pëtania pò prôwdze nie bëłë grãdé, a wëniczi
testu mògą swiôdczëc le ò przërëchtowanim ùczãstników. Przezérającë
òdpòwiédzë z testów òcenionëch na „sygająco”, pòłwa nie zna
nôzwëstka dzysdniowégò przédnika K-PZ!
Drëdżi dzél bëłë to jak wiedno eseje na jednã témã. Do tegò
dzéla sã dostałë le blós òsobë ò nôwëższi lëczbie pùnktów,
a taczi bëło 9. Tradicëjno wikszosc z nich wëlowa témã z geògrafije.
Latos mielë pisac na témã: „Bédowónô wanoga pò Kaszëbach,
môle atraktiwné turisticzno”. Wasta prof. J. Szukalsczi, nôleżnik
żiri, miôł dosc tëli robòtë, bò mùszôł sprawdzëc jaż 7 esejów.
Na zakùńczenié miôł rzekłé, że baro niewiele bëło pisóné ò
krajobrazu, jaczi béł nôwicy wôrt òpisaniégò ë pòdsztrichniãcégò.
Z wikszëch félów wëmienił téż zjinakã lëpów na bùczi z Aleje
e Rzucewie. Równak bëłë téż òsobë, jaczé dostałë „baro bëlną”.
Tak òsta òcenionô na przëmiôr przez wastã dra K. Brusczégò
prôca ò rësznocë Młodokaszëbów. Nicht nie wëlowôł témë z lëteraturë
(„Òpiszë nôwôżniészé znanczi jednégò kaszëbsczégò pisarza”)
a òbez to trzecy ùczãstnik kòmisëje, wasta dr. M. Cybùlsczi
ni miôł niżódny prôcë do sprawdzeniégò.
Kònkùrs bùdzy wiele pòdskacënë ò czim swiôdczi to, że dwie
ùczãstniczczi zrezygnowałë z 2. ë 3. dzéla Kònkùrsu. Miałë
rzekłé, że nie są dosc tëli przërëchtowóné do nëch pitaniów,
jaczé dostałë.
Pòslédny dzél Kònkùrsu – dzél ùstny, na jaczim 6 òsób òdpòwiôdało
na 3 losowóné pitania – òsta zdominowónô przez brutczi z dwùch
szkòłów Òglowòsztôłcący Licëje miona S. Żeromsczégò z Pùcka
ë Zrzeszë Òglowòsztôłcącëch Szkòłów miona S. Żeromsczégò z
Lãbòrga. Dobëła (nié pierszi rôz) Justina Wenta z Lãbòrga,
drëdżé place mają dobëté: Joana Mùdlaff, Jiwòna Maszota, Jiwòna
Marzejón ë Magdalena Grzãdzëckô. Laureacë pierszich 10 placów
dostelë ksążczi ë platë CD karna Kòmpanijô Wãdzëbôków.
Wedle wastë prof. J. Szukalsczégò nen kònkùrs nie béł jinszi
òd pòslédnëch, le szkòda – jak rzekł – że słëchińców na òstatnym,
ùstnym dzélu bëło mni, bò wikszosc ùczniów ë szkólnëch pò
pierszim dzélu pòjacha.
ac, pk
zaczątk
|