Wiôldżi Tidzéń ë JastrëNo ë ju wnetka kùńc Pòstu. Białczi
pòmalë spòd płotów biorą szmërgniãté na czas bezmiãsowi patelnie
ë czëszczą ją z rdzë, chłopi ju snią ò òbcekającym tłëstą
sztëkù miãsa, a téż mòże ë ò jaczim kòrnusu z drëchama. Młodi
tesknym òkã wzérają na kôrczmë, dôwni jaż hùczącé òd mùzyczi,
tuńców, terô cëché jak zëmòwi bezwiatrowi wieczór, mùzykancë
do grë wiesołi rëchtùją jinstrumentë. Hmm.... òbrôzk sprzed
„stalatów”. A dzysô? Dzysô pòst ju wnetka cãżkò òdjinaczëc
òd nié-pòstu. Pòreszce wszëtczé czasë rokù, zwëkòwò czedës
jinszé òd se, terô wezdrzą wnetka tak samò. Pòrobiło sã szaro,
pò prôwdze naszé czasë to ju „globalno zwëkòwò wies”.
Jak tak czëtóm ò stôrëch zwëkach, w nen ùszłi ju czas wchôdóm
ë w nim jem, widzy mie sã, że te dôwné czasë taczé jaczés
lepszé bëłë (wierã ju cos na tã nótã jô ju rôz pisôł), barżi
farwné, cekawszé. Mòże to temù, że wërwóny z cëchòscé a ùbëtkù
môłégò gardu, ju piãc lat sedzã w wiôldżim miesce, gdze dzéń
szlachùje za dniã, jak szaré krople wòdë z deszczowi plëtë.
Smãtwa mie ògarinô, mëszlë szaré są. A niech jidą précz! Òpòwiesc
ò ùszłëch czasach nacząc je czas, òderwac sã òd trzôskù, aùtów
pò szasëjach òbarchniale jeżdżącëch, lëdzy w pòpiechù żëjącëch.
Slédnô òpòwiesc bëła ò zôpùstach ë pòsce, dzysô bãdze ùroczësto,
pòdniosło, magiczno – ò Wiôldżim Tidzeniu, a téż ò redosnëch,
zymkòwëch Jastrach.
Jesz przed Wiôldżim Tidzeniã młodi lëdze zbieralë sã ë razã
szlë do bòru, bë nacąc swiéżëch, zazeleniałëch wietewków brzózków
ë ju òbsëpónych „pùjkama” wierzbów. Z nich to doma robiło
sã palemczi ë w Palmòwą Niedzelã (zwóną téż Kwietną), co naczëna
Wiôldżi Tidzeń dôwało je sã do pòswiceniégò. Pòswiconé wôżną
rolą òdgriwałë òb całi rok. Bëła wiara, że mają wiôlgą czarzącą
mòc. Jedna pòłkniãtô „pùjka” mia chronic òd chòrobów gardła
ë gòrącczi, palonô òb czas grzëmòtu miała, tam dokądka zalecy
ji dim, ùstrzéc òd ùdrzeniégò piorëna. Palemczi bëłë kładłé
sã w jizbach (przede wszëtczim za òbrôzë), w stajniã, stodołã,
ùl, a nawetka wbijóné w zemiã na pòlu, gdze żëto rosło. Miało
to ne placë (a téż lëdzy, zwierzãta, roscënë) chronic òd wszëtczégò
złégò, a przëniesc to co dobré (na przemiór bògaté żniwa).
Palemkama gbùr w Kwietną Niedzelã letkò ùderzôł sąsada, bë
nen nie chòrzôł, a miôł wiele żëwòtnoscé ë mòcë. To samò w
niechtërnëch dzélach Kaszub robilë dzecóm starszi. Czéj pierszi
rôz bëdło bëło nëkóné na łączi, zwierzãta bëłë czidłé palemkama,
a czéj zymkòwé zbòża bëłë sóné, pòmieloné „pùjczi” bëłë mieszóné
do zôrnów. Miało to dac dobroctwò w chòwie ë żniwach.
Ksądz Jón Perszón w swòjim dokazu Na brzegu życia i śmierci
pisze, że òb òstatné pôradzesąt lat wiele lëdzy w Kwietną
Niedzelã nosy pòswiconé palemczi na grobë blisczich, bë zmarłi
ti „téż mielë swòje swiãto” . Pisze, że je to òglowé na Kaszëbach
(a mëszlã, że bë sã ze mią zgòdzył, że téż òglowò w całim
słowiańsczim swiece, a téż ù jinszich lëdów Eùropë) wiara
w to, że dësze są związóné ze swòjim môlã pòchòwaniégò. Wiąże
to z przódechrzescijańsczima wierzeniama.
Cząd Wiôldżégò Czwiôrtkù to czas, czedë pò wieczorny swiãti
mszë nastawô „czas żałobë”. Jaż do pańsczégò zmartwëchwstaniégò
zwónczi są ùcëchłé, a w kòscołach leno rozchòdzy sã głos klekòtków.
Ò tim „czasu żałobë” jesz w niechtërnich môlach Kaszub do
latów 60. ùszłégò stalatégò młodi lëdzë dôwalë òglowò znac
chòdzącë z wieczora pò wsë a klekòtającë klekòtkama, a téż
terkòtającë sznarama. Trzôsk òni téż robilë w piątk a sobòtã.
We Wiôldżi Czwiôrtk wedle Londżina Malicczégò (Rok obrzędowy
na Kaszubach) białczi farwiłë jaja. Kaszëbsczé jôjka nie wëzdrzałë
jak jinaszé, dzysô tak dobrze znóné – bògaté we wszelejaczégò
zortu wzorë. Jôjka bëłë farwioné blós na jednã farwã – czerwòną,
zeloną, mòdrą czë na jiną.
Zwëk malowaniégò jajów je baro stôri. Ale chòc ù naju mô ju
wierã pôrã dobrëch stalatów, to dejade, jak pisze Perszón
(Na brzegu...) dopiérze pò II swiatowé wòjnie farwioné jôjka
stałë sã dzélã swiãcónczi, to je różnégò zortu jestkù swiconégò
w kòscele w Wiôlgą Sobòtã. A jeżlë jidze ò swicónkã, to przed
1945. rokã na Kaszëbach nie bëła òna wnetka znónô. Je téż
wôrt dopòwiedzëc, że jaż do 12. stalatégò òb czas pòstu kòscół
miôł zakòzóné jedzenié jajów.
Czedës, dôwno ju temù Wiôldżi Czwiôrtk ù Óstowëch Słowianów
béł téż dniem pòswiconym dëszóm zmarłëch. Lëdze pòlëlë ògniszcza,
a czasã téż òstôwialë dëszóm nédżi jestkù. Ù naju taczé ògniszcza
pôloné w Wiôldżim Tidzeniu miałë swòjé bëtnictwò jesz w 19.
stalatégò.
G.J. Schramke
zaczątk
|