Jak më piselë miesąc temù, na Gduńsczim Ùniwersytece òdbéł sã wëstôwk òdjimków
sparłãczonëch z òdjimkòwim ùdokùmentowienim kaszëbsczi tradicëjny
bùdowiznë. Béł to projekt kaszëbsczi „szorëmòwi” stowôrë Rémùs
wespółòrganizowóny z jegò wespółrobòtnikã ‑ Pòmòraniją – sztudérsczim
karnã. Òrganizatorowie mają ògłoszoné kònkùrs na òdjimczi,
jaczé mdą dokùmentowałë dżinącą tradicëjną kaszëbską bùdowiznã.
Kòżden chto chce ùczãstniczëc w nym kònkùrsu, mô sélac na
adresã naju Wëdôwcë, pòdóną we stopce, òdjimczi (farwné abò
czôrno-biôłé) w fòrmatu nié miészim jak 10x15cm. Kònkùrs mdze
dérowôł do jeseni. Nôbiéżno w Òdrodze mdzemë drëkòwelë nôcekawszé
wedle Redakcëje òdjimczi. Na kùńc wszëtczé òstóną òcenioné
przez fachòwé karno ë nôlepszé trafią na wëstôwk „Tradicëjnô
kaszëskô bùdowizna dzysô”, jaczi mdze na jeseni 2003.
Na nôlepszich żdają téż cekawé nôdgrodë!
|