Łoni
pòjawiło sã nowé kaszëbsczé rokòwé karno Kòmpanijô Wãdzëbôków.
Wszëtcë perznã czëlë jich dokôzów wedónëch na place CD. Na
pôłnim Kaszëbów no karno je czëc w chònicczim rediu, w pabach
w òkòlim, a na kòncertach w Kaszëbsczi Òglowòsztôłcący Licëji
słëchińcë spiéwają razã ze spiéwôczką i bëlno znają kòżdą
piesnią. W łżëkwiace karno zagrało na Przezérkù Piesniów Europejsczich
w Jinowrocławiu. Ni mògło zafélac fanów z KÒL, dlôte chãtny,
ti co chùtkò sã zgłosëlë, pojachalë autokarã. Òrganizatorą
negò béł direchtór Licëje H. Krzoska, a mô òn wiãlgą buchã
z dzejaniô Kòmpaniji. Nen kòncert òceniwało żiri, w jaczi
bëlë m. jn. Małgorzata Stãpień. Postrzód dzesãc karnów z Polsczi
i jinszëch môlów Kompanijô dobëła drëdżi plac. Po podwójnym
bisu i z dobëtą nôdgrodą karno wrócëło z nôdzeją dalszich
sukcesów.
Gôdómë ze spiéwôczką karna Damroką Kwidzyńską.
Jak to sã stało, że prawie w Brusach powstało
karno Kompanijô Wãdzëbôków?
Dlô mnie to je jinwencjô Boskô. Jô wiedno mëszla ò tim, żebe
spiewac po kaszëbskù w taczim karnie. Në i më sã trafilë,
ò przetrôfk abò wedle bosczich ùdbów, ale terô grómë razã
i to je nôwôżnieszé. Kòmpanijô skłôdô sã z karna Horn, co
grô na wieselach i zabawach tanecznëch, i czilu uczniów z
KÒL.
Të jes z Kartuz, a terô cygniesz do Brusów?
Czedë przejéżdżóm do Brus jesmë ze sobą wiele czasu. Zrozmienié
i drëszba to mnie tam cygnie. Jesmë jedną wialgą familiją.
A szpòrtownoscë i fifów téż nôleżnikóm nie félëje.
A same Brusë?
Jo, tam są fejn klimatë, drëszny lëdze. Në i gwësno nalézã
tam tego jedurnégò.
"Kompanijô", to je wiedzec czemù,
ale czemù prawie Wãdzëbôków?
To miono je cekawé, bùdzy zaintresowanié i je përznã kòntrowersëjné.Wëmëszlóny
dzes w jizbie szkólnëch, widzy sã wszëtczim. Le, tôłmaczenié
na pòlsczi baro nas gòrzi. Anielsczégò karna Queen, kò sã
w Pòlsce nie nazéwô „Królowa”.
Pierszi nakłôd platë sã przedôł baro chùtkò,
karno mést je szczestlëwé?
To bëła wialgô robòta, në i ne dëtczi… z nima wiedno je tôczel.
Ale bądą dalszé wëdôwczi, ju niedługò.
Jaczé są Waje dalszé ùdbë?
Grac corôz wicy nowëch piesniów. Przë nagriwanim drëdżi platë
mùszimë jesz wiele poprawic: czëstosc, farwë, në a ni mòże
to bëc robioné w tak krótczim czasu.
Jakô bãdze ta plata?
Wikszosc to bądze chùtkô mùzyka. Cél je taczi, żebë pòrwac
lëdzy, to mô bëc szôł na maksa. Chcemë pokôzac młodim, że
to co kaszëbsczé to nie je skansen, że mòże w tim żëc i sã
bëlno bawic. Teksë bądą naje, bez kòwérów. To mô bëc fejn
żëwô mùza, tekstë z deje, z tegò co sã terôzkù dzeje, z tegò
co w dësze grô.
Kompanijô je corôz barżi znónô, a mòże mdzeta
kaszëbsczima „Gòlcama”?
Wszëtkò je mòżlëwé. Le félëje wiele dëtków na promòcëją,
a tegò sã nie dô zrobic bez pòmòcë drëchów.
Tej żëczã wszëtczégò dobrégò, në i żebë
më Waju òbzérelë we wszëtczich Lëstach Przebojów.
gôda A.Cupa
zaczątk
|