Karno Szturérów „Pòmòranijô” z kòòrdinatorã
Grégorã J. Schramke ju trzecy rôz mô zorganizowóné Zjôzd Młodzeznë
Kaszëbsczi. Ùczniowie ze strzédnëch szkòłów, nôleżnicë Karnów
„Pòmòranijô” ze Gduńska ë „Tatczëzna” ze Stôłpska zjechelë
sã 16. maja do nadmòrsczi Wieldżi Wsë. Lokum, jaczim béł Ferijny
Òstrzódk Zôrzãdu Dargów, jak i zjestkù dlô ùczestników zagwësniło
Krézewé Starostwò w Pùckù. Blós żôl, że sponsor starosta A.
Jabłonsczi nie mógł przëbëc na planowóny zéńdzené z ùczãstnikama
Zjazdu.
Pierszi dzéń, nôwôżnieszi dlô wzajemnégò pòznaniégò ë jintegracëji,
minął na gôdkach ò kaszëbiznie, spólnëch zôbawach ë spiewie.
Głównym zadaniã bëła robòta we warkòwniach, a ji rezulatatë
òstałë przedstówioné w niedzelné przedpôłnié. Warkòwniów bëło
nié mało. Karno lëteracczé òpracowa cziledzesąt kaszëbsczich
neòlodżiznów, a smiéchu téż z tegò bëło wiele. Ò Młodokaszëbach
diskutowalë „historicë”, jinszé karno zatitlowóné „Kaszëbë
a jinszé redżonë w Europie” diskùtowało plac Kaszëbów w zjednóny
EÙ. Gazétnicczich kùnsztów ùczëlë sã nôleżnicë karna medialnégò.
Mają zrobioné czile wëwiadów z dôwnyma i terëczasnymi Pòmòrańcama
ò ewolucëji w karnie ë kaszëbsczi rësznoce, jak téż ji òcenie.
Kritikã możlewòtë rozwiju nowëch mùzycznëch kaszëbsczich karnów
przedstôwia mùzycznô warkòwniô. Młodi gôdelë ò niedostãpnocë
folkloristicznëch karnów, chternëch nôleżnice zamkniãti są
w swòjim karnie i niechãtno przëjimają nową òsobã, co òd razu
zniechãcywô do aktiwnoscë na tim gònie. Ti, z karna turisticznegò,
króm wanożeniô i zwiedzaniégò Wieldżi Wsë, òbgôdelë perspektiwë
rozwiju turisticzi w nym gardze, a przede wszetczim szanse
i zôgrożbë z tim zrzeszoné. Na spólnëch zéńdzeniach karnów,
ùczãstnicë mielë mòżlewòtã òbëzdrzec dwa kaszëbsczé filmë:
„Midzë narodama” (reż. B. Bòrk) ë „Kaszëbë” (reż. R. Ber).
Przësłowié rzecze „do trzëch razów sztëka” i pò rôz trzecy,
z atrakcëji zapòwiedzónëch ju przed Zjazdã, nie doszło do
skùtkù płiniãcé bôtã pò Pùcczi Hôwindze. To ùczãstnikóm wynôdgrodzył
baro cekôw sobòtny wieczórk z kabaretã „FiF”.
Lëdze, jaczi ju zôstny rôz bëlë na zjezdze, pòdsztrichòwelë
corôz lepszą òrganizacëją. Sami ùczniowie strzédnëch szkòłów
w anczetach, jaczé wëpiselë na zakùńczenim, òceniwelë go baro
pòzytywno. A nôwikszą wadą zjazdu òkôzało sã to, że 3 dnie
to bëło za krótkò. Òrganizatorowie zapòwiôdają w 2004. rokù
zrobic zjôzd na całi tidzéń.
A. Cupa
zaczątk
|
