 |
| Kaszëbi w dialogù |
Gduńsk. Bëło wiele rzekłé ò dialogù
midzë słowiańsczima nôrodama ë jãzëkama òb czas 3. Midzënôrodny
Ùczałi Kònferencëji Sztudérów „Dialóg kùltur ë wiarów na zemiach
słowiańsczich”, jakô mia plac 8 – 9. maja na Ùniwersytece Gduńsczim.
Òrganizowónô bëła przez Ùczałé Kòło Slawistów miona P.P. Niegosza
(Njegoš), dzejającé na katédrze slawisticzi GÙ. Òbgôdka ta sã
sta òrãgą dlô zéńdzeniégò sztudérów z Pòlsczi ë zeza greńców,
a téż òsób zajinteresowónëch kaszëbizną.
Wëkładë dérowałë dwa dnie, òb nen czas òdbëłë sã òdczëtë sztudérów
z Pòlsczi, Czech, Sôrbije ë Ùkrajinë ò kùlturowëch, mòwnëch
ë relidżijnëch znajemnotach Słowión.
Co je wôżné – bëło pierszi rôz w trzëlatny historiji ti kònferencëje
rzekłé téż ò kaszëbiznie – ò zetknieniach ë kòntaktach jãzëka
kaszëbsczégò z czesczëzną ë pòlaszëzną.
Bëłë téż zéńdzenia ze slawistama ë ùczałima GÙ. Miôł plac téż
môłi pòkôz kaszëbsczi kùlturë, òbleczënka ë keramiczi. Cëzyńcóm
kaszëbizna òsta przedstôwionô téż „òd kùchnie” – mia plac prezentacëjô
Dôjwida Króla kaszëbsczich wôrów, to je zjôdnëch wôrów z kaszëbsczima
nôdpisama.
Prócz tegò Paùl Szczëpta gôdôł, a Duszan Pazdzersczi tołmacził
na sôrbsczi, ò kaszëbiznie, ò terëczasny kaszëbsczi kùturze
ë sytuacëji kaszëbsczich médiów ë pismieniznë.
Na kùńc mòżno bëło pòsłëchac kaszëbsczégò mùzykòwaniô – na akòrdiji
fejn gra naja redachcëjnô drëszka Ana Cupa z Brusów (sztudérka
pòlitolodżije na GÙ).
Dlô nas no zéńdzenié bëło òrãgą, żebë pòsłëchac ò jinszich Słowianach,
a dlô gòsców, żebë lepi pòznac Kaszëbów, jich kùlturã, jãzëk
a mùzykã. Kaszëbizna na wiedno gwësno ju mdze w „repertuarze”
ny kònferencëje – westrzód òrganizatorów bëło czëc, że za rok
no zéńdzenié mòże bëc namienioné môłim słowiańsczim jãzëkóm.
A. Dradrach
zaczątk
|
|
| 
Na Jinternece nigdë ni môsz
wszëtczégò…
żebë miec wiedno całą Òdrodã, wiedno na czas – òbacz tuwò
Mòżesz nas wspòmòc w wëdôwanim abò kòlpòrtażu?Napiszë do naju! |
|
|
