W slédny dzéń maja òsta ùroczësto zakùńczonô we wejrowsczi
mùzëji ósmô ju edicëjô òglowopòlsczégò prozatorsczégò kònkursu
miona Jana Drzéżdzona. Pierszi môl i nôdgrodã półtora tësąca
złotëch dobëła wastna Kristina Lewna, szkólnô z Bòżégòpòla.
Drëdżi béł wasta Leszk Szulc, szkólny z Wejrowa, a trzecy
wasta Henrik Pipka, penzjowi gbùr z Bòrzëstowa. Latos do organizatorów
kònkùrsu doszło 11 lëteracczich ùsôdzków pó kaszëbskù i i
jak rzekł prowôdôrz kònkursowi komisëji prof. Jérzi Tréder
wikszy dzél béł na wësoczi równi.
Òsoblëwą nôdgrodã, dlô nômłodszégò ùczãstnika, dostôł ju trzë
razë rôz po rôz Daniel Pipka z Bòrzëstowa, òtrok wastë Henrika.
Knôp je 16 lat stôri, doma gôdô po kaszëbskù, a w szkòle ùcziła
gò rodny mòwë wastna Danuta Pioch. W ùszłëch latach jegò dokôzczi
òstôłë wëprzédnioné i mòżemë je nalézc w wëdónym zbiérkù prozë
„Kaszëbskô nôtëra”. Wôrt je pòdsztrichniãcô, ze pò kaszëbskù
pisze wnet całô familëjô. Òkròm nôdgrodzonégò latos starka
Henrika sélała swòje ùsôdzczi na kònkùrs miona J. Drzéżdżona,
téż Dańlowa sostra Alina. Jesz rôz sã òkazëje, że w òkòlim
Bòrzestowa kaszëbizna je wcyg żëwô i temù jesz wikszi je żôl,
że nie bëło zgòdë przédnictwa gminë na założenié tam kaszëbsczi
dżimnazëji, żebë naju mòwa pò latach ùcamiãdżi mògła kùreszce
doznac przënôléżnégò ji ùważaniégò.
P. Breza
zaczątk
|