Piąti ju rôz, 13. lëpińca, mdze Zjôzd Kaszëbów. Gardã w
jaczim sã trafimë mdze Słëpsk (Stôłpsk), a do niegò zawieze
nas tradicëjnô Bana Jednotë Transcassubia.
Zjazdë są òrganizowóné, żebë pòdsztrichnąc jednotã wszëtczich
Kaszëbów: z nordë ë pôłniô, z zôpadu ë óstu, ze wsë ë z gardu.
Pierszô bana jacha w 1999. rokù pò tim jak pò refòrmie samòrządzënë
wszëtczé zemie wikszoscowòkaszëbsczé nalazłë sã w jednym wòjewództwie.
Wanożëlë më baną jednotë z Hélu do Chòniców. Na drëdżi rôz
– òdwrotno – z Chòniców do Élu. Drëdżi zjôzd béł transmitowóny
przez 2. program TVP. Trzecô bana pòjacha z Chòniców do Wejrowa,
łoni czej zjôzd béł w Kartëzach – banë nie bëło.
Bana Jednotë òd zôczątkù kòscérzëła wielotësączną ùrmã lëdztwa
z kaszëbsczima fanama, partë Kaszëbskò-Pòmòrsczégò Zrzeszeniégò
ze swòjima stanicama, lëdowëch ùtwórców, karna mùzyczné lëdowé
ë rokòwé. Jedno, co òd zôczątkù bëło z nama to kaszrbizna
ë swiąda, że jesmë jednoscą.
Tegò tipù zéńdzenia są òsoblëwòtą w Europie. Mòżemë bëc bùszny,
bo le blós më tak òglowò swiãtëjemë najã jednotã. Jinszé nôrodë
jaczé mają dosebné swiãta to Jitalianowie (Festa dell’Unita)
ë Katalanowie. Kòle Jitalianów równak nie je to tak òglowé.
Katalanowie zato dzéń swòjégò zéńdzeniô mają wzãté òd jejich
smùtny roczëznë – przegróny biôtczi we strzédnëch stalatach,
czej mielë straconé wszëtkò. Naje swiãto je zato redosné.
Latosô bana pòjedze z Pùcka przez Rédã, Wejrowò, Lëzëno, Lãbòrg.
We Słëpskù mdzemë ò 10:30. Pò marszu przez gard dińdzemë do
kòscoła Nôswiãtszi Marije Pannë w centrzë, dze ò 11:30 mdze
kaszëbskô mszô swiãtô. Pò ni przeńdzemë pòd rednicã, dze na
wialdżim Placu Dobëcégò mdze główny dzél rozegracëje. Mdą
wëstãpòwałë kaszëbsczé karna lëdowé ë rokòwé, a téż spiéwónô
pòézëjô. Mdze téż kaszëbsczi jôrmark, na jaczim mdze mógł
kùpic kaszëbsczi ksążczi ë lëdowé ùtwórstwò. Ò 19:30 bana
òdjedze nazôd do Pùcka.
Równoczasno z zôbawą we Słëpskù, w Ùstce (Ùszczu) mdze drëgô
bina, na jaczi téż mdą wëstãpòwałë ne same karna co we Słëpskù,
le w jinszich gòdzënach.
ps
zaczątk
|