Praga. 13. maja w prasczi Słowiańsczi
Bibliotéce òstôł òtemkłi wëstôwk zatitlowóny „Kaszëbë we zdrzadle
swòji pismieniznë”. Wëstôwk mógł wszëtczim zajinterespwanym
sã pòkazac òb czas trzech tidzeniów rozwij kaszëbsczi lëteraturë
ë kònkretné przëmiarë kaszëbsczich cządników ë knéżków. Wëstôwk
sóm mô prawie szesc dzélów. Na pòczątkù so zwiedzającë mòże
przezdrzéc kartã kaszëbsczich gwarów F. Lorentza ë przeczëtac
tekst ò jazëkòwëch znankach kaszëbiznë. Pùzni sã ùzdrzi kòpije
ë òridżinałë historicznëch zabëtków kaszëbsczi pismieniznë
òd Krofeja, Mòstnika przez Cenôwã ë Derdowszégò. Mô mòżlëwòtã
pòrownac wszelëjaczé tipë kaszëbsczégò pisënkù ë przeczëtac
so wëjimczi ze znónëch dokazów. Trzecym dzélã je wstãp do
Młodokaszëbów ë Zrzeszińców razã z òdjimkama niechtërnëch
pisarzów ë egzemplarzama Grifa a Zrzeszë Kaszëbsczi z różnëch
lat. Terëczasnô lëteratura ë média przedstôwiają fragmentë
pòézëje òstatnëch lat (pò drëdżi wòjnie) ë cządniczi (Pomerania,
Norda, Òdroda, Głos Kaszëb). Midzë ekspònatama sã nalézą téż
kaszëbsczé kôrtczi ë jinszé òbrôzczi. Jedna szafka je pòswiconô
badanióm ò kaszëbiznie ë B. Zëchce. Zwiedzającë mòże so pòzdrzéc
òbrôzczi z kaszëbsczi materialny kùlturë, hasła słowarzów
ë artiklë ò kaszëbiznie w cëzëch cządnikach. Dali sã mòże
człowiek pòznac z dzysdniowima knégama, wëdónyma niedôwno
na Kaszëbach ‑ tu òstôł wëzwënégòwóny darënk kaszëbsczich
wëdôwców z gromicznika 2003. (piselë më ò tim w strëmiannikòwim
numrze w teksce „Baro pôłniowé Kaszëbë”) ë pòd kùńc sã mô
przed òczama przezérk kaszëbsczich cządników òd Grifa pò Òdrodã,
wszëtczé pëszno wedle se. Sama jinauguracëjô sã òdbiwa w reprezentatiwny
zalë Nôrodowi Bibliotéczi w Pradze. Na wëkładze W. Knola òstôł
przedstôwoiny krótczi wstãp do kaszëbsczi pismieniznë, jaczi
miôł pòkazac, na jaczich tradicëjach leżi dzysdniowô lëteratura
ë jaczim rozwijã sã do najich czasów dosta. Mòderatorã òdpòłniégò
bëła Wastna Niachajová, jakô katalodżizëje kaszëbsczé ksążczi.
Na jinaugùracëją przëszlë główno lëdze ze sami bibliotéczi,
Stowôrë drëchów Łużëcë, poloniscë ale nawetka z minysterstwa
szkòłowiznë. Pò wëkładze bëła mòżlewòta so przezdrzéc sóm
wëstôwk. 17égò maja, òdwiedzëlë naju wëstôwk téż nôleżnicë
lużëcczégò sztudérsczégò karna PAWK, jaczi miôł w tich dniach
w Pradze swòje zéndzenié. Mést pierszi kaszëbsczi wëstôwk
w Pradze dérowôł do kùńca maja, ale mómë nôdzejã, że naju
gard dostónie corôz wicy lëżnosców łączbë z kaszëbską kùlturą.
W. Knol
zaczątk
|