Nie wierzã w òbiektiwną prôwdã. Ni móm téż autoritetów.
Jem dërchem westrzód dosc wąsczégò ë „zascónkòwégò” karna
kaszëbsczich dzejarzów, ë móm se za jednégò z nich. Czëjã
czãsto rozmòwë ë pòlemiczi przë wszelejaczich zéńdzeniach
abò w cządnikach. Ë ni mógã sã wëzbëc mëslë, że jesmë barżi
pòlsczi jak prawie Pòlôszë (co dzél dzejarzów mô zrobioné
swòjim mòtã!). Në, ale na znanka, ò jaczi mëslã to wialgô
próżnosc, dôwanié òd se, lëché ambicëje, nieżëcznosc, nielëdanié
– znanczi nierozwijowé ë nieùtwórczé. Cziledzesąt òsób pòdzélonëch
na cziloòsobòwé, abò nawetka jednoòsobòwé partë czë frakcëje,
zazdrzonëch le blós w se,
mô pòswiconé fùl stëtkòscë na kritikã ë zgardlëwé
òceniwanié dzejaniégò jinszich.
Tak jakbë zabëlë ò wikszim spektrze òcenów ë czëcégò. Ny
mają czãsto namienioné wiele czasu na òkazywanié so wrogòscë
ë próbach zatrzëmaniô samòrealizacëje swòjich kòlégów, temù
że mają jã za szkòdlëwą ë niebezpieczną.
Jô jem bùszny ë wiedno sã tim chwôlã, że wikszosc ùczałëch
na gdunsczich wëższich szkòłach to Kaszëbi, że mómë autonomiczny
kaszëbsczi jinstitut. To je wiedzec, nie czëjã sã ùczałim
ë nim nie jem, tej ceszã sã, że chtos mądrzészi sã tim zajimô.
Chòc priwatno, na przëmiôr ò znajarzach historiji gôdiwajã,
że ny są jintelektualnyma nekrofilama.
Baro lubiã téż wëmiónã dbów midzë cziloma pòstójcama, co wëdôwają
swòje mëslë pò kaszëbskù drëkòwóné. Kòl mie swòbòda pisënkù
wëchôdô z te, że nie rozmiejã pisac pò kaszëbskù, móm gwarowé
przënãtë w kaszëbiznie ë pò prôwdze tim, że je òn përznã sztëczny
– nôukòwò-lëterackò-kaszëbsczi. Nié òglowi. Nie szkòdzy mie
to, bò wiém, że pò kaszëbskù niewiele sã czëtô, równo jak
pò pòlskù, bò we wikszoscë lëdze zwëczajno ni mają dëtków
na ksążczi. Czëtającëch ò Kaszëbach a do te jesz pò kaszëbskù
je tak mało, że ti co czëtają òbrzeszkòwò je to môłé geto.
Dërchem natrzãsającé sã wzójno ze se
czë sztricha nad „o” mô bëc „czuder” czë „ùjt”.
A to sã stôwô wialdżim tôklã ë je òrãgą do próbë sëłów bez
mòżlëwòtë kònsensusu. Z drëdżi stronë móm wialgą tczą dlô
nëch lëdzy za robòtnosc ë stëtkòsc ë mòdlã sã, żebë to co
robiã dlô pisóny kaszëbiznë bëło tak òglowé jak pòwszédny
chléb.
Znajã taczich co spiéwają pò kaszëbskù: roka, spiéwóną pòézëją
ë òglowò rzekącë: tereczasno. Ceniã jich za to, że nie spiéwają
pò pòlskù czë pò anielskù, co gwës bë mògło bëc wikszą szansą
na „sukces”. Chòc sã zdôrzi, że niechtërne piesnie mie sã
nie widzą, tak czë jinak
je mie żôl, że ti co mògą, ni mają chãcë abò
czasu
żebë pòmagac nym w rozkòscérzanim swòjégò ùtwórstwa.
Pòliticë – niechtërnëch znajã priwatno ë pò prôwdze lubiã
jakno lëdzy – ale grãdo mie sã strzëmac òd taczégò stosënkù
do nich jaczi òni mają do mie. Ale rozmiejã, że są samòbëtnyma
pòstójcama ë tak jak jô, mają swòjã òcenã ë nôdbã.
Jedno co mie mierzy, to zéwiszcza ò jednoce. Jednym widzą
sã bialisczi jinszim czôrné brutczi. Téj nie rozmiejã, czemù
wszëtcë më bë sã mielë marachòwac z rudima. Mëslã, że mùszimë
sã kùreszce wëlékarzëc z paranoje ë dozdrzégac wkół nas prôwdzëwé
zôgróżbë. Temù bédëjã przëkôzanié na lato, ùdbã minymum, jak
w medicënie: pierszé – nie szkòdzëc.
D. Król
zaczątk
|