Z pôłniô
W
lëzënsczi dżimnazëji miona pisarzów kaszëbskò-pòmòrsczich
òdbéł sã zacht dzél wëmiónë. Na òdjimkù – historicznô warkòwniô,
prowôdzy D. Szëmikòwsczi.
W drëdżim tidzeniu lëpińca më gòscëlë karno czesczich sztudérów.
Mielë przejachóné na sztudérską wëmiónã òrganizowóną przez
karno sztudérów Pòmòranijô ë Rémùsa. Przez tidzéń òbezdrzelë
bëlny sztëczk Kaszëbów ë zaczãlë ùczëc sã gadac pò kaszëbskù.
Wëmióna bëła òdzwãkã na sukces Kaszëbsczich Dniów w Pradze
w gromicznikù. Dzãka zacht zajinteresowaniémù kaszëbizną w
Pradze ë najim spònsoróm dało radã zórganizowac przëjôzd,
nocnik ë wanożenié pò Kaszëbach dlô karna Czechów. Prowôdnikama
bëlë jima nôleżnicë Pòmòranije, Rémùsa, ë kaszëbsczi sztudérzë,
jaczi brelë dzél we wëmiónie.
To baro cekawô ùdba. Terô na jeseni më jedzemë do nich, do
Pradżi, pòznawac czeską kùlturã ë Czechë. Móm nôdzejã, że
za rok mdze téż wëmióna z Czechama, a téż z jinszima krajama
– gôdô Patricëjô Kłisz ze Gdini, ùczestniczka wëmiónë. Òrganizatorowie
pò sukcese ny zapòwiôdają wicy wëmiónów. – Mómë bëlną łączbã
z Dënama ë Finama ë je to dosc mòżlëwé, że za rok mdze cos
òrganizowóné razã z nima – gôdô Paùl Szczëpta, kòòrdinatór
wëmiónë.
Czeszë ùczëlë sã kaszëbsczégò jãzëka ë pòznôwelë najã kùlturã.
– Kaszëbizna dlô Czecha je lżészô jak dlô Pòlôcha, bò je dosc
tëli dosebnëch jãzëkòwëch zjawiszczów – gôdô W. Knol z Pradżi,
kaszëbsczi przedstôwca ë ùczastnik wëmiónë. Prócz jãzëka,
młodi Czeszë mielë ùczbë z kaszëbsczi kùlturë ë historije.
Òdbëło sã téż zéńdzenié z Bògùsławã Brézą, direchtorã wejrowsczi
Mùzëji Pismieniznë ë Mùzyczi Kaszëbskò-Pòmòrsczi, namienioné
rolë ny mùzëji dlô kaszëbsczi kùlturë. Pùzni mielë téż trafùnk
z Tadeuszã Stankòwsczim, żłobiarzã z Brodnicë, na jaczim mòglë
òbaczëc jak wezdrzi kaszëbsczé lëdowé złobiórstwò.
P. Kąsk
zaczątk
|