Chto je procëm?

W spòdlëczny szkòle nr. 5. w Rédze starszi wielu dzecy mają złożoné wniosczi ò nôukã jich dzeców kaszëbsczégò jãzëka. Czë równak òd séwnika hénë regnie ùczba? To nie je tak letkò!
Wszëtkò òstało zòrganizowóné wedle prawa: mómë zgłoszenia starszich ë jô jakno direchór móm składłé do gminë wniósk ò przëdzélenié gòdzënów – gôdô Éwa Ùberman, direchtorka rédzczi „piątczi” – nawetka ju òstôł nama sélóny òsoblëwi fòrmùlar, jaczi wëpisëją szkòłë w jaczich je ùczony miészëznowi jãzëk.
Wedle rozpòrządzeniégò Minystra Szkòłowiznë z 2002. rokù sygnie 7 pòdaniów òd rodzëców, żebë ùczba kaszëbiznë regła w spòdlëczny szkòle. Gmina mô òbrzészk zagwësnic dëtczi na pierszé sztërë miesące dzejaniégò ùczbë. Ne òstóną ji zwróconé przez Minystra.
– Prawie nie mùszą. Minyster mô swòbòdã w przëznanim nëch dëtków. Mô dac z rezerwë, ale mòże òdmòwic – gôdô Łukôsz Grzãdzëcczi, sztudéra prôw, dzejôrz karna sztudérów „Pòmòranijô”.
Gmina mô zagwësnioné, że czej terô nacznie ùczbã, na òstónie wpisónô na drëdżi rok do dëtkòwégò ùstawù, ë mdze òd 1. stëcznika normalno finansowónô. Tôczel je z wëłożenim nëch dëtków na ùczbã òd séwnika do gòdnika. – Gmina mô strach abò lëchą wòlą ë nie chce wëłożëc nëch dëtków – gôdają lëdze. Wice-bùrméster do sprôw szkòłowiznë, Kazëmiérz Gruba, je dbë, że to je niezrozmienié ë ze stronë gminë nie ma lëchi wòle. – Kaszëbsczi jãzëk mô bëc ùjawernióny na „direchtorsczich” gòdzënach, to je gòdzënach òstôwionëch direchtorowi do swòbòdnégò wëzwënégòwaniô. Tej ni ma nót, żebë gmina dôwa jaczés òsoblëwé, dodôwkòwé dëtczi. – gôdô. „Jiwer” je le w tim, że Rozpòrządzenié z 2002. rokù tikającé nôuczi kaszëbsczégò rzecze wërazno, że ùczba kaszëbsczégò mô bëc normalnym przedmiotã, na zwëczajnëch gòdzënach. Nié na direchtorsczich.

Paùlk Szczëpta

zaczątk