Czë je to bëlnô ùdba, żebë licëją nazwac „kaszëbskô”? Jo,
to brzëmi bùszno! To pòdsztichô kaszëbskòsc! To ùblëgùje do
sztôłceniô w kaszëbiznie! Mòże jo… Ale mie sã zdôwô, że no
miono „kaszëbsczé” nie je pòtrzébné! Czë mòżece so zobrazëc,
żebë w – na przëmiôr Pòznaniu bëła licëjô, co bë sã nazéwa
„Pòlskô Licëjô”? Nié. Le mógã so zobrazëc, żebë w Rzëmie bëła
„Pòlskô Licëjô”. Czemù? Bò w Jitaliji wszëtczé licëje są jitalsczé,
a ta jedna bë bëła prawie pòlskô. Tej czemù na prawie je kaszëbskô?
Czëjã sã përznã jak Pòlôch na cëzy jitalsczi zemi! A kò to
më jesmë tuwò gòspòdôrzama!
Móm czasã taczé wrażenié, że miono „kaszëbskô”, „kaszëbsczi”
dodôwô sã le blós dlô òzdobë, żebë pòdsztrichnąc tã swòjiznã,
domôcëznã, a za tim nick prawie nie „jidze”. A czasã téż le
dlô zôchãcbë. Bò czë w jaczi kaszëbsczi szkòle prócz Głodnicë
kaszëbsczi je chòc w dzélu wëkłôdowim jãzëkã? Rząd Pòlsczi,
jaczémù nie zanôlégô òsoblëwie na kaszëbiznie je baro rôd,
że më tuwò sã chwôlimë na całą Europã tima „kaszëbsczima”
szkòłama. Rząd czëje sã zwòlniony òd robieniégò czegò le.
Në, bò czej ti Kaszëbi mają tak bëlno, to pò co rząd mô wëkładac
drëdżé dëtczi pòdatników? – gôdają. Rządowi zanôlégô, żebë
to wszëtkò sã tak piãkno nazéwało, bò na midzënôrodny binie
mòże tak rzec: wejta, Kaszëbi mają wszëtkò. A pò prôwdze pòlonizacëjô
Kaszëbów je baro chùtkô ë mòckô! Téż dzãka temù!
Tej bédëjã, żebë nicht nie rzekł, że le kritikùjã a nie dôwóm
pòzytiwnëch ùdbów. Mùja ùdba je: żebë wszëtczé szkòłë na Pòmòrzim
sã nazéwałë „kaszëbsczé”. Abò nawetka jinaczi, niech sã nazéwają
jak chcą, nawetka „môłpa pòd pôlmą”, le niechôj w nich kaszëbsczi
mdze wëkłôdowi.
P. Szczëpta
zaczątk
|