Na Kaszëbach, jak gwësno wszëtcë wiemë, je do òbezdrzeniô
ful snôżëch ë cekawëch môlów. Jedne z nëch są barżi znóné,
drëdżé zôs mni. W nym dokazu jô bë chcôł pòkazac jeden z nëch
placów. Je to wies pòłożonô na kaszëbsczi nordze niedalek
òd szaségò z Wejrowa do Krokòwi. Òbkrążają ją snôżé lasë Darżlëbsczi
Dzëwiznë. Je z tą wsą sparłãczony, mòże nie wiôldżi, ale za
to wôżny dzélik kaszëbsczi historije ë òbéńdowé tradicëje.
Chòdzy tuwò przede wszëtczim ò biôtkã midze pòlsczim a krzëżôcczim
wòjskã, chterna mia dosc wiôldżi cësk na kùńcowi dzél tak
zwóny Trzënôstolatny Wòjnë, pò jaczi Gduńsczé Pòmòrzé nazôd
dzélã Pòlsczi. Nie je wòlno téż zabôczec ò legendach, co sparłãczoné
są z henëtnyma kamama. Môlã, co łączi w se historiją ë legendë
tegò dzéla Kaszëbów ë ò jaczim je nen dokôz, je wies Swiecëno.
Swiecëńskô biôtka òdbëła sã 17. séwnika 1462. rokù. Bëła òna
jedną z nôwôżniészëch biôtków w dzejach Trzënôstolatny Wòjnë,
chtërną prowôdzył z Krzëżôkama pòlsczi król Kazëmiérz Jagellończik.
Procëm se stanëlë w ni wspieróné bez gduńszczanów Pòlôszë
(bëło jich wszetczich kòle 2000 żôlnérzów) pòd przédnictwã
Piotra Dùnina ë wspòmôgóné bez pòmòrsczich gbùrów Krzëżôcë
(kòle 2700 lëdzy, w tim 1300 gbùrów), chtërnyma kòmańdérowôł
Fritz von Raweneck. Jak je z tegò widzec, wòjskò krzëżôcczégò
zôkonu mia nad pòlsczim przewôżenié. Pòlsko-gduńsczé wòjskò
Dunina nie miało tedë chãcë biôtkòwac z Krzëżôkama w czëstim
pòlu. Chcało blós pluńdrowac zajãté bez nieprzëcéla nordowé
Kaszëbë ë próbòwac òdzwëskac niechtërne òbsôdzoné bez krzëżôcczich
żôlnérzów zómczi ë gardë. Chòdzyło tuwò przede wszetczim ò
Pùck. Równak wiôldżi deszcz, jaczi tedë padôł, sprawił, że
Dunin òdstãpił òd ùdbë òbléganiô tégò gardu ë sczerowôł sã
dali na zôpôd. 12. séwnika doszedł z swòjim wòjskã do Starzëna.
16. zôs pòsënął sã jesz dali, w stronã Lãbòrga. Tégò dnia
równak, nie spòdzëwającë sã nick, napòtkôł Krzëżôków, chterny
òb ten czas pòradzëlë, przë wiôldżi pòmòcë gbùrów, òbkrążëc
Pòlôchów ë gduńszczanów w lasach Darżlëbsczi Dzëwiznë kòle
Swiecëna. Pò tim zôs zacza sã dérëjącô dosc tëli gòdzënów
biôtka. Zakùńcza sã òna dobëcym pòlsczi armije, krzëżôcczi
zôs żôlnérze w ùrzasu rozbieglë sã pò henëtnëch lasach. W
biôtce pòd Swiecënã zdżinãło razã kòle 1200 lëdzy, czë kòl
wiertla tich wszetczich, co sã w ni bilë. Mia òna dosc wiôldżé
znaczenié dlô Pòlôchów, chterny òd ti pòrë zaczëlë wierzëc
w swòjã mòc jaż w kùńcu dobëlë całą Trzënôstolatną Wòjnã.
Co sã zôs tikô przédnika krzëżôcczégò wòjska, Fritza von Raweneck,
to zdżinął òn w swiecëńsczi biôtce ë do dzysô mòżno je òbzérac
bënë kòscoła w Żarnówcu jegò, fest ju zniszczoną, nôgrobną
platã.
Równak nie blós pamiãc ò ny biôtce je tim, co je cekawé w
té wsë ë ji òkòlim. Są kòl ni, czãsto spòtikóné téż w jinëch
dzélach Kaszëb kamë. Są to Diôbelsczi Kam ë Bòżô (chòc gôdô
sã téż Anielskô) Stopka. Ta òstatnô leżi midze trzema mitama,
co òznôczają grańcã midze gruntama miéwców Kłanina, Swiecëna
ë òkòlicznyma gbùrama. Chòc kam nen je pòrosłi mechã, to równak
są na nim widzec dwa znaczi: òdcësk stopë ë palëcë anióła.
Gwësno je z tima znakama sparłãczonô legenda. Òpòwiôdô òna
ò dwóch bracynach, Jónkù ë Tónie, co sã mòcno pòsztridowëlë
ò to, chto dostôł lepszi dzél majątkù. Jich sztridë nie mògłë
sã skùńczëc, a króm tégò pòdzelëłë lëdzy we wsë, bò dzél miészkańców
wsë stanął za Tóną, drëdżi zôs za Jónkã. Kùreszce Pón Bóg
pòmëszlôł so, że to mòże sã lëchò skùńczëc ë pòsłôł na zemiã
anióła, co miôł jich pògòdzëc. Równak, cziej próba pògòdzeniô
òbu bracynów nie uda sã ë té nazôd zaczëlë na së szkalowac,
té aniół rozgòrzôł sã, tupnął nogą ò kam, na chtërnym stôł
ë zarô pòszedł lóz. To, co dzysô mòżemë òbzérac na nëm kamie,
je prawie znakã pò tim przëtrôfkù.
Fòrmellów Słôwk
zaczątk
|