W
bòkadnym, latném kalãdôrzu rozegracëjów na Kaszëbach kôżdi
mógł nalezc cos dlô se. W gazétach pisano ò ò Jastarnicczi
Sobótce, ò Dniach Wãgòrza i jinszëch atrakcëjach, przédno
na nordze Kaszëb. A co na pôłniô?
Ju òd dzewiãcu lat karno Krebanë z Brus òrganizëjë Midzenôrodné
Jigrë Folkloru. Na lotosém jinauguracjowim kòcertce, chtërny
òdbëł sã 22 lëpińca w Chònicach, sekretôra Pòlsczi Sekcëji
CIOFF Edward Błażek gòdôł, że są to przédné midzenôrodné jigrë
folkloru z dwônostu, jaczé są w Pòlsce. Do òrganizacëji, dejade
kòsztowné i brëkòwné wiele przëszëkòwań ë rąk do pòmòcë, pòdjimiznë
przëstąpiłë samòrządzënë i karna folkloristiczne pôłniowëch
Kaszëb.
Òb szesc dni, òd 22 do 27 lëpińca na binach w Brusach, Chònicach,
Charzëkòwach, Bëtowie, Kòscerznie, Serakòjcach, Wielu i Swornëchgacach
roznôszëła sã muzyka z rozmajitich stron Pòlsczi i swiata.
Cepłé, latné wieczorë przëcëgały wiele przëzérôczów. A programa
kòncetów bëła pò prôwdzë bògatô. Pùblika mògła wcyg, kòle
cëzégò karna, òbôczëc pòkôzk swòjigò domôcégò karna kaszëbsczégò.
Rzmë (?Karna) „Nowa Ruda” z Nowi Rudë i „Cepelia-Poznań” z
Poznania przedstôwiełë tuńce ze swòjégò dzélu kraju. Kôżde
wëstãpujący karno miało cos òsoblëwégò, cos co rëchało publikã.
W pierszi rédze widzałë sã farwné ruchna i bôłdzewé tuńce
jitaliańsczé, chòrwacczi i meksikańsczi.
Co
sprôwiô, że karna tak chãtno przëjeżdżają na taczi festiwale,
nawetka z daleczi Algerëji? Są to dlô nich ferije, òdpòczink
i przigòda. Nôleżnicë karna „Kramarić” z Chòrwacczi pierszi
rôz bëli w Pòlsce. Wiele z nich ju robi, jinszi jesz sã uczą,
ale dlô kôżdégò bëłë to fejn ferije. Przede wszëtczim pòdsztrëchiwalë
mòżlëwòtã pòtkania lëdzy z wszelejaczich krajów, pòkôzania
swòji lëdowé muzyczi i tuńców, z chtërnych mają wialgą buchã.
Karna òbdôrzëwałë sã pamiątkòwima dôrenkama, wëmieniwałë adresama.
Na apartny bôczenie zasługëjë pòtkanié dwóch karnów: „Kramarić”
i „Cigra”. Nick nadzwëkòwégò to bë nie bëło, le to bëłë karna
z Chòrwacczi i Serbiji. Juwernota jãzëka, parłãczno historëjô
i gwësny wseczëcé nawzôjny zblëżëłë te karna do se. Nawetka
zmãczony pò kòncerce chcelë sã pòtkac, bë pògôdac, razã pòspiewac
i pòtuńcowac. Gòdôlë ò przeszłocë, ò wòjnie i ò tim, że terô
trzeba żëc dali w drëszbie.
Òrganizatorzë
festiwalu òrginalno sparłączëli jegò midzënôrodny charakter,
z promocëją swòjigò kaszëbsczégò folkloru. W title festiwalu
bëło: „Dni Kultury Kaszubskiej”, a prowôdnym mòtiwã „Kaszëbsczé
nótë”. W finałową niedzelã ta melodëjô przewtôrzała muzycznim
karnom òd mòmeńtu wéńdzenia na brusczi stadion. Pòtému wëkònëwałë
ją sparłączoné karna kaszëbsczi, sparłączoné kapele MJF, a
nôjcekawszim bëło zaspiéwanie „Kaszëbsczich nót” przez grupã
midzenôrodną, złożoną z przedstôwców kôżdégò zagrańcznégò
karna.
Programa MJF co roku je bògatszi i atrakcëjnieszi. Są w nim
jôrmarczé lëdowi, welowané Miss i Małé Miss MJF, pòkôzk sztëcznych
ògni. Wszëtce ju, z niédoczekanim żdają na dzesąti, jëbleuszowi
festiwal w przińdnym roku.
A. Cupa
zaczątk |