W 1986. rokù przez Jistitut Lëteracczich Badérowaniów we
Warszawie przë wespółrobòce z Jinstitutã Historije
PAN òsta zorganizowónô kònferencëjô, jaczi brzadã je
ksążka Zmiónë fòrmùlë pòlskòscë w drëdżi pòłwie 19. stalatégò.
Zbiérny dokôz pòd redakcëją Janusza Macejewsczégò (Przemiany
formuły polskości w drugiej połowie XIX wieku. Praca zbiorowa
pod redakcją Janusza Maciejewskiego). Minãło ju përznã
lat òd ùkôzaniégò sã ny ksążczi, a òsoblëwie òd ny
kònferencëje, dejade na sprawa je dërch aktualny, a òsoblëwie
pò òstatnym Òglowim Spisënkù ë w cządze diskùsëjów ò bëcym
sląsczégò ë jinszich nôrodów dostôwô jesz wicy aktualnotë.
Na slédny starnieòbkłôdczi czëtińc je pòjinfòrmòwóny, że w
90. latach 20.st. pò ùstrojowëch zjinakach w Pòlsce wzrosło
zacekawienié etnicznoscą. Wôrt je dodac, że
dzysodnia no zacekawienié nie zmiészô să.
Tej je analëzowónô pòlskòsc zerzeszonô z doswiôdczenim jinszich
nôrodów, a téż je pòdsztrichniãté nôrodzenié sã
pòlsczégò nôrodnégò czëcégò we spòlëznach, jaczé donądka taczégò
czëcégò ni miałë.
Pò wstãpnym słowie J. Macejewsczégò ną ksążkã
òtmikają dwa wprowôdné, teòreticzné artikle. W pierszim z
nych, filozoficznym, „Ò nôrodnoscë kùlturë” J. Jedlicczi zastônôwiô
sã nad tim, co robi, że kùltura jednégò nôrodu je jegò
prawie kùlturą, na przëmiôr pòlskô że je pòlską. Autór dochôdô
swiądë, że taką rzeszką biwô prawie jãzëk, chòc nié
wiedno, bò kò są dwa- abò wielojãzëkòwé nôrodë (Belgòwie,
Szwajcarowie). Sóm procés przesztôłcaniégò sã dialechtu
w jãzëk mòże prowadzëc do pòwstaniégò nôrodu jak w
Finlandiji, czasã òdwrotno – nowòtny nôród mòże bëc
nimò ùtraceniégò jãzëka. Ni mòże tuwò gadac dejade
ò niżódnëch reglach, bò w pòłwie 19.st. „nicht ni mógł jesz
przewidzec, że mòwa Kaszëbów –
nimò robòtë Cenôwë - òstónie le môlewą gôdką,
a dialechtë Białorusënów czë Slowaków – mdą ùznóné za apartné
jãzëczi, spòdla apartnëch nôrodów”.
Drëdżi wprowôdny, historiczny artikel „Rasa abò princypijô”
(titel z wiérzta C.K.Norwida) J. Macejewsczégò, pòkôzëje m.jn.
pòwstanié ë rozwij taczich słów jak „Pòlskô, pòlskňsc” w dzejach.
Autór dôwô 4 definicëje słowa „Pòlskô”. Nôstarszé z ich òbjima
„zemie jaczé bëłë bëlnym dërżeniã pòlsczégň kraju pierszich
Piastów, to je Wialò- ë Môłopòlskô, Sląsk, Mazowszé ë Kùjawë”.
Pùzni, pò wińcym Pòlsczi z dzélnicowégò rozbicégò òd czasów
Łoczetka mionã „Pòlskô” bëła taksowónô le Wialgò- ë
Môłopòlskô, bò le blós z nëch dzélnic sã skłôdôł pòlsczi
krôj. Trzecé rozmienié bëło równoznaczné z Kòroną, tj. z nym
dzéla Repùbliczi Dwòjga Nôrodów, jaczi béł tak zwóny w ùprocëmnienim
do Wialdżégò Ksãżëstwa Lëtwsczégò. We czwiôrti dbie
„Plskô” znaczëło to samò co całô Repùblika, a co bëło sparłãczoné
ze znoszenim apartnosców midzë Kòroną ë Lëtwą.
Na zôczątkù, we szlachecczi Repùblice, Pòlôchama, przedstôwcama
nôrodu, taksowelë sã leno szlachcëcë, niezanôleżno
czë gôdelë pò pòlskù, ruskù czë miemieckù. Rzôdkò tak ò se
gôdelë gardzanowie, a gbùrzë nawetka pòlskòjãzëkòwi
– nigdë. Dopiérzë w pòłwie 19.st. na skùtk rabczënë ë pòwstawaniégò
nôrodnégò czëcégò niepòlskòjãzëkòwëch mieszkeńców dôwny
Repùbliczi, òd fòrmùlë pòlskòscë zaczãlë òdchadac m.jn.
Lëtwinowie, Ùkrajincowie a ùjawerniac z pòlskòscą zaczãlë
- Kaszëbi.
Tak prawie autór òceniwô deklaracëją Derdowsczégò
„Ni ma Kaszub bez Pòloniji, a bez Kaszub Pòlsczi”. Apartny
òd pòlskòscë Slązôcë ë Mazurowie (jejich zemie kò nie słëchałë
Repùblice) ùswiądnilë so swòjã pòlskòsc. Apartnym dzélã
ti mòzajiczi bëlë Żëdzë, jaczich zacht dzél òpòwiedzôł sã
pò stronie pòlskòscë. Wiele z nich téż ùswiądniło so swòjã
apartnotã.
Jinszé artikle we ksążce pòkôzëją, jak no nôrodné òdecknienié
wezdrzało na kònkretnëch przëmiarach. Temù, że wëdôwcą ë ògranizatorã
kònferencëje béł Lëteracczi Jinstitut, òpisënczi zjinaczi
fòrmùlë pòlskòscë są ùkôzóné na spòdlim lëteracczich tekstów.
Ne téż są za jilustracëją dónëch dbów ë wniósków.
M. Cybùlsczi
Przemiany formuły polskości w drugiej
połowie XIX wieku, Praca zbiorowa pod redakcją Janusza
Maciejewskiego, Warszawa 1999
zaczątk |