Latos
mijô 30. roczëzna lëteracczi i 25. kòmpòzëtorsczi aktiwnotë
Jerzégò Stachùrsczégò, pierszégò w historëji kaszëbsczégò
ùtwórcë, ùrodzonégò we stolecznëm Gduńskù. Dało to leżnosc
do ùroczëznów naczãtëch w maju w teatrze Miniatura we Wrzeszczu,
dze jubilat je mùzicznëm czerownikã, dali w szkòle w Czeczewie,
gdze je direchtorã i kùreszce, w czerwińcu w wejrowsczi Mùzeji
Pismieniznë ë Mùzëczi Kaszëbskò-Pòmorsczi, jinstitucëji, jakô
ju z samégò ji mióna je nôlepszim môlã do fejrowaniô jubleùszu
pisôrza a kòmpòzytora, tak mòckò sparłãczonégò z kaszëbską
kùlturą.
Pierszi rôz dało sã czëc ò Stachùrsczim w 1977 rokù, czej
jakno dwadzescetrzë latny sztudéra gduńsczi Wëższii Mùzyczny
Szkòłë dobëł kònkùrs na lëteracczé usôdzczi napisóne pò kaszëbskù.
Zôs na mùzycznym gónie debutowôł ju w ósmi klase spòdleczny
szkòłë i òd négò czasu dzeli swój taleńt midzë mùzykã, pòézją
i kùreszce téater.
I pò prôwdze cãżkò je dac wiarã, że leno jeden człowiek mòże
tak brzadno dzejac na tëli gónach. Jerzi Stachùrsczi je autorã
dwùch widzawiszczów: "Przodkòwa" i "Jastrów",
wielnych wiërztów dzélama pisónëch téż pò pòlskù, a przede
wszëtczim je utwórcą mùzyczi do wiãcy jak sto szpetôklów dlô
Pupòwich Téatrów w Òlsztënie, Stołpskù, domôcym Gduńskù ë
w jinszich gardach.
O
chòrankach Jerzégò Stachùrsczégò gôdô sã, że je to mùzyka,
jakô letkò wpôdô w pamiãc. I nie są òne, jak to sã dosc czãsto
mëszli w lëdowim szëkù, to są zwëczajny, terôczasnë spiéwónczi.
Czile z tëch dokazów zaspiéwałé na ùroczëznie w Wejrowie dwa
chùrë: "Cartusia" z Kartuzów i "Bel Canto"
ze Srôkójc. I wiele lepi niż pisóné słowa o talence ùtwórcë
przëswiôdcza reakcëjô lëdzy przëtomnëch na zalë. Dzéwczãta
mùszałë czilë rôzów warcëwac na binã, tak sã widzała mùzëka
jubilata. Widzałë sã téż dzecné spiéwë w wëkònanim "Dzôtków
Rodny Zemi".
Jak òb czas fejrowaniô rzekł jeden z przërôczonëch gòscy:
wiele lëdzi stoji pòd drzewama z jabkami i jich nawetka nie
zriwô, nawetka nie wié, że ône są kòl nich, a wasta Jerzi
Stachùrsczi rwie z negò drzewa kùńsztu fùl rãkama. Më czëtińcë
i słëchińcë mômë leno nôdzejã, że cos jesz negô brzadu òstało
i jesz wiele razy mdzemë sã redowac, czej bãdzemë czëc, czë
czëtac nowi dokazë tczëwôrtnégò jubilata.
P.Bréza
zaczątk
|