Rozmòwa z Agnésą Bradtke, spiéwôczką ë
liderką kaszëbsczégò karna Kùtin.
Skąd
sã wzã ùdba, żebë spiewac kaszëbską pòézëją?
Pòézëjô je òsoblëwim tipã tekstu, ë je to baro cekôw, żebë
jã sparłãczëc z mùzyką. Dôwô to bëlny efekt. Je to téż cekawé
dlô słëchińców, bò to co donądka mòglë le czëtac, terô ùczëją
w czësto nowi fòrmie.
Wasza mùzyka je wôrtnotą samą w se ë mëszlã, że w kòżdi piesnie
je dosc tëli mùzyczny ùdbë, że bë bëło mòżno zrobic nié 10
le 30 piesniów…
Kòżda piesniô je apartną cawnotą ë taczé „dzélenié ùdbë wedle
médialnégò efektu” je nama czësto cëzé. To nie je mùzyka do
MTV, le do słëchaniégò we skùpienim. Më mielë dosc tëli ùdbów
na piesnie, ë na kùńc më wëlowelë le ne nôlepszé. Nôlepszé
i mùzyczno i tekstowò.
Co wama czerowało, czej wa wëlowa nëch a nié jinszich autorów
tekstów?
Z jedny stronë – chãc przëbôczeniô stôrszich autorów, na przëmiôr
zabëtëch përznã jak L. Heyke czë z pòliticznëch prziczin òdsëniãtëch
w nórt jak A. Labùda. Jeżlë chòdzy ò młodëch – jak R. Drzéżdżona
czë M. Doraua – chãc żebë pòkazac swiatu, że òni piszą cekôw
tekstë. Në a drëgô prziczina bëła takô, że nama sã ne tekstë
zwëczajno widzałë. Nie spiéwómë nic co bë sã nama nie widzało.
Jaczé są ùdbë karna?
Chcemë zagrac czile kòncertów, żebë zaprezentowac ne dokazë,
jaczé są na ny place. Równak mómë we dbie czile nowëch, ë
jeżlë mdze to finansowò mòżlëwé – w przińdnym rokù chcemë
znôwka weńc do sztudija ë nagrac drëgą platã.
Czë ne nowé ùdbë mają jinszi stil czë mdze to jakbë kòntinuacëjô?
To mdze cygnienié dali ti mùzyczny mëslë jakô nama swieca
terô. Równak nic dwa razë sã nie zdarzi, ë gwës nowé piesnie
mdą czësto, czësto jinszé.
Czemù
karno wzã so taczé prawie starokaszëbsczé miono? Nie lepi
bëło nazwac sã barżi médialno, żebë wszëtcë rozmielë?
Nié. Pò pierszé naja mùzyka nie brëkùje taczi pòmòcë, bò to
nie je mùzyka na diskòteczi. A pò drëdżé, ùżëcé tegò starokaszëbsczégò
słowa, jaczé znaczi tëli co czarznik, czarzëcél, mô przëbaczac
lëdzóm, że kaszëbizna to téż je cos dôwnégò, wôrtnégò, pòdniosłégò
ale téż czarznégò. No miono pasëje téż do najégò karna, bò
naja mùzyka nie cygnie słëchińca mòże do tuńca, ale barżi
gò zaczarzi…
Òd pierszich słëchińców jô mia czëté, że nôlepszą piesnie
je mést „Sama” do tekstu R. Drzéżdżona…
Wszëtczé są mùzyczno tak samò cekawé ë równo wôrtné wedle
mie. Mòże „Sama” ma pérznã prostszą mùzykã ë dzãka temù „wpôdô
w ùchò” wiele chùtczi jak jinszé.
Nôdłëgszô piesniô mô 10 minut, czë to nie je za wiele, kò
jaczé redio mdze to chca pùscëc?
Në, Bohemian Rapsody téż bëła za dłëgô jak na nenczasné gùsta,
a równak je to jedna z nôwikszich pisniów karna „Queen” ë
roka. Nie czerëjemë sã dłëgòscą piesnie, në bò docz? Ùdba,
melodiczny zamësł wëmôgôł, żebë bëła takô a nié jinszô. Pòsłëchôj
ji a òbaczisz, że nie je nawetka ò sekùndã za dłëgô. Òna je
prawie takô jak mô bëc, ë jem gwësnô, że nick sã nią nie znudzy.
Jak twòji drëszë ë twój mùlk zdrzą na twòjã mùzykã?
Drãgò rzec. Mëszlã, że ti jaczim sã òna widzy, przëchôdają
prosto na naje kòncertë. Mój mùlk, jaczi je autorã dwùch tekstów
na ti place, chòc nie chce bëc zwóny pòétą, je – mëszlã –
bùszny ze mie. Wiém, że lubi słëchac najã platã, chòc dżéz
nie je jegò nôbarżi ùlëdónym ôrtã mùzyczi.
Czë karno je znóné bùten Pòmòrzô?
Jo. Mòja mùzyka bëła spiéwónô dwa lata temù przez midzënôrodny
chùr na festiwalu Voices of Europe (Głosë Europë) w Bùdiszënie,
a samò karno je përznã znóné w Czechach ë Frizëji. Mómë nôdzejã,
że w nëch krajach ùdô sã nama zagrac kòncertë.
Dzãka za rozmòwã.
gôda ala
zaczątk |