 |
| "Hej, Młodi z Kaszëbów rodã" !!!! |
Przińdnota Kaszëb je w młodzëznie, to je wiedzec. Fùl zôwzãcô,
ùdbów i chãcë, to mùszi prowadzëc kaszëbiznã do przodkù. Nôstarszą
zdrëszeną młodëch je Pòmòranijô . Dzejô ju 41 lat ë mô sã corôz
lepi. Nôpierwi mia bëc òrganizacëją przëcégającą nowëch lëdzy
do Zrzeszeniô, a pò témù sta sã prôwdzëwie klubã sztudérów,
zapôlińców. Jinszim môlã kaszëbsczich sztudérów je Stôlpsk,
gdze dzejô karno Tatczëzna.
Czéjbë na tim miôł bëc kùńc, to bë Kaszëbë chùtkò przëszłë do
zgùbë. Na szczescé pòwstają nowi òrganizacëje młodëch. W sztatucë
Zrzeszeniô stoi, że Òglowô Rada, jak ë przédnictwò partów mògą
zakłôdac klubë w òbrãbie swòjigò dzejaniô. W tim samim czasu
taczé ùdbë zrodzëłë sã w Baninie ë w Brusach.
Pòdskôcënkã do te w Baninie bëła pieszô pielgrzimkã do Swiónowa,
dze miało bëté wiele młodëch lëdzy. Pò czilë pòtkaniach òni
namëszlële sã pòwòłac karno Cassubia, kòle Klubù ZK-P w Baninie.
Są to lëdze z całi gminë Żukòwò, przidno absolweńce ë sztudérze.
Chcą kôżdégò rokù òrganizowac pielgrzimczi do Królowi Kaszëb.
Ju zajimają sã rëchtowanim swiãtëch mszów pò kaszëbskù w Baninie,
a mają ùdbã , żebë tak bëło we wszëtczéch kòscołach w gminie.
Mają wòlą przejąc òpiekã nad kòłama wësziwù w Żukòwie ë w Miszewie.
Pòdjimac téż dzejanié, chtërno mô ùbòkadniac kùlturowò jejich
gminã. Tak przërëchtowelë ju 30-lecé artisticzny prôcë J. Stachùrsczégò
w Miszewie ë pòkôzk téatru z Lëzëna. Célã jich je promòcëjô
młodëch taleńtów. Króm tégò pospólny jimprezë, jak Andrzejczi,
ne i rozmieje sã Wilëjô. Jak gôdô jeden z załóżców tegò karna
E. Prëczkòwsczi, "je w tim dzejanim dëch Pòmòraniji".
Tak samo je w mòjich kòchanëch Brusach. Widzimë, że z kaszëbizną
w Brusach nie je dobrze i mòże bëc jesz gòrzi. Dlôtë më nie
chcemë na to pòzwolic. Taczim przindnym mòtiwã naji robòtë je
rozbùdzëwac swiądã kaszëbską w Kaszëbach we brusczi gminie.
To mòże je ë kąsk dzywné, le to je prôwdã. Naje karno twòrzą
lëdze aktiwné, chterné chcą cos belnégò zrobic, a mają fùl ùdbów.
Pierszą taką akcëją bëłë "kòle pòlsczsczi fanë, fana kaszëbskô”
na 11 lëstopadnika. W tim miesącu zrobimë ankietã z lëdzama
ò jejich swiądze, a jãzëkù. Je téż planowónô na ten rok promocëjô
wierztów Wandë Czédrowsczé ë zéńdzenié młodëch ùtwórców Zymkù
z młodzezną w Brusach. Przërëchtëjemë jesz zrzeszeniową Wileją
ë prôwdzewi Gwiżdże. Króm tégò mómë w naji brusczé gazéce "Zabòrë”
swòjã starnã pò kaszëbskù. To je le kąsk tegò co chcemë zrobic.
Ale to wszëtkò sã pò malinkù dô.
Midzë wszëtczima tima òrganizacëjami je brëkownô łączba i czasã
wespólné zéńdzenia. Taką leżnoscą mdą Andrzejczi w pòmòrańsczi
chëczë 30 lëstopadnika. Rôczimë serdeczno!!! A pò temù, 6 gòdnika
w Żukòwie klub Cassubia rôczi do restauracëji "Grif” na
swòje òficjalné zéńdzenié załóżców. A Kaszëbskô żdô na dalszé
pòwstôwanié taczich karnów.
Ana òd Cupów
zaczątk |
|
|
