19. rujana 2003 rokù w Brusach òsta pòswiãconô stanica brusczégò Partu Kaszëbskò-Pòmòrsczégò Zrzeszeniégò.
Ùroczëzna rozpòczãna sã mszą swiãtą, chtërną òdprôwiôł ksądz probòszcz Zdzysłôw Wërwicczi. Do Brusów przëbëłë delegacëje Partów Kaszëbskò-Pòmòrsczégò Zrzeszeniégò wnetk z całich Kaszëbów. Pò mszë wszëtczi gòsce ë delegacëje przeszłë ze swòjima stanicama sztrasama Brusów do Młodzëznowégò Domù Kùlturë. Pò òdspiéwanim kaszëbsczégò himnu, przédnik Partu K-PZ w Brusach, Władis Czôrnowsczi, pòwitôł wszëtczich. Wëstrzód gòscy bëlë midze jinszima przédnik Nôwëższégò Zarządu K-PZ Brunon Synak, wiceprzédnik karna sztudérów „Pòmòranijô” ze Gduńska Jirena Szëngwelskô ë radny sejmikù Kazëmierz Klawiter. Nôleżnicë partów symbòliczno przëbijelë gózdzama nową stanicã, a pùzdni òsta òna swiãtno przekôzana bez Brunona Synaka Władisowi Czôrnowsczémù. Òb czas ti ùroczëznë, diplomë za swòją dzałalnotã dostalë wszëtcë chtërny rozkòscérzalë ë wcyg rozkòscérzają kaszëbiznã w Brusach.
Czas ùmilałë wëstãpë fòlkloristicznégò karna „Krëbanë” z Brusów. Ùroczëznã prowadzëlë pò pòlskù – Mark Czôrnowsczi, direchtór MDK w Brusach, òpiekùn karna „Krëbanë”, ë pò kaszëbskù – Ana Cupa, nôleżniczka karna sztudérów „Pòmòranijô”, òbstójnica Kaszëbsczi Òglowégò Liceùm w Brusach.
Pò pôłnim béł jesz dzél dlô młodzëznë. W MDK zagra Kòmpanijô Wãdzëbôków ë wëstãpòwôł kabaret „Fif”. Wszëtcë bawilë sã baro fejn. Nie zafélowało téż kaszëbsczi fanë ë czëło sã „kaszëbsczi klimat”.
Mòże terô w Brusach cos sã pòcygnie w kaszëbiznie do przodkù. Mòże hasło z nowi stanicë „Kaszëbskô – naj wid ë skôrb” dô wszëtczim do mëszleniégò ë zmòbilëzëje brusczich Kaszëbów do rëszniészégò dzejaniégò. Żebë nowô sanica pò prôwdze zapòwiôda cos nowégò.

Asza Gackòwskô

zaczątk