18 rujana latos, w Mùzëji Kaszëbskô – Pòmòrsczi Pismienniznë
ë Mùzyczi w Wejrowie òdbëło sã II diktando kaszëbsczégò pisënkù.
Tak jak łoni, ò titel méstra kaszëbsczi òrtografië biotkòwalë
sã w dwùch wiekòwëch karnach: dzecë ze spòdleczny szkòłë ë
gimnazjum; młodzezna ze nadspòdlecznëch szkòłów ë dorosłi.
Bëłë téż, jak przóde, dwa etapë kònkùrsu. W pierszim bëtnicë
mòcowalë sã z czëtónyma bez Wandã Czedrowską (w młodszim karnie)
ë Zbigôrza Jankòwsczégò (w starszim) wëjimkama pòwiescë Aleksandra
Majkòwsczégò „Żëcé i przigòdë Remùsa”. W drëdżim etapù – finale,
za rozsądzenim jury w zestôwkù prof. Jerzy Treder, Wanda Czedrowskô,
Danuta Pioch ë dobiwca I diktanda Paul Szczëpta, dzesãcu nôlepszich
ze starszi grëpë (w chtërny na zaczątkù bëło 21 lëdzy) ë szescu
z młodszi (na zaczątkù mia 19 dzecë) zmierzëło sã z tekstama,
co je przerëchtowôł prof. J. Treder.
 Méstrã
II kaszëbsczégò diktanda w młodszim karnie òsta Jizabela Cyrockô.
II plac mia Jizabela Zarach, a III zajął Macéj Zdrojewsczi.
Wszëtcë są ùczniama gimnazjum w Srakòjcach.
W starszi grëpie pierszi plac ë titel méstra dobéł Eùgeniusz
Prëczkòwsczi – redachtor programù w TV Gduńsk „Rodnô zemia”
ë dodôwkù do „Dziennika Bałtyckiego” „Norda”, II zajãna ùczennica
Kaszëbsczégò Òglowégò Liceùm we Brusach – Joanna Gackòwskô,
a III dobiwcą do niedôwna nôleżnik kabaretu „Fif” – Róman
Drzeżdżón.
Dobiwcë pierszich trzech placów òstalë òbdarowóny diplomama
ë nôdgrodama, midzë jinszima bònama wôrë (na 700, 500 ë 300
zł), a téż ksążkama. Wszëtczi, co zajãlë dalszé place dostalë
diplomë ë ksążczi.
Diktando artistyczno ùfarwiło teatrowé karno gimnazjalëstów
z Bólszewa, chtërne w przeriwce pò pierszim etapu bawiło bëtników
binowim òbrôzkã nôpisanym bez ùczennicã ti szkòłë – Joannã
Lange.
Przédnim òganizatorã diktanda bëła Kòmisëjô do Sprawów Edukacëji,
chtërnô dzejô w Kaszëbskò-Pòmòrsczim Zrzeszenim (z jegò remienia
zajimała sã tim W. Czedrowskô). Jinszima òrganizatorama bëlë:
Pòwiatowé Starostwò w Wejrowie, Mùzeùm Kaszëbskô-Pòmòrsczi
Pismienniznë ë Mùzyczi, Gduńsczi Ùniwersytet, TVG i Radio
Gduńsk.
Jôbard
zaczątk |
