26.stëcznika wieczór na rôczbã Roberta Keprta, przédnika
rësznotë mòdëch Mòrawianów, z wëkładama ò kaszëbiznie wstąpilë
etnológ Róman Barón ë znajôrz mòwów Wladislôw Knoll, nieòficjalny
przedstôwca Kaszëbów w Pradze. Bëło gôdóné m.jn. ò stosënkach
kaszëbskò-mòrawsczich. - Lëdzy bëło wicy jak më mëslelë, ë
no swiôdczi ò zacht zajinteresowanim mòrawsczi młodzëznë słowiańsczima
bracynama z nordë. Wiele lëdzy téż przejachało òsoblëwie na
no zéńdzenié jaż z Pradżi - mô rzekłé mia Robert Keprt. Mòrawsczi
dzejarze rozsądzëlë na zéńdzenim w Brnie, że chcą brac wzór
z kaszëbsczi rësznotë, jakô je barżi rozwitô na gónie òbarnë
swòjich jãzëkòwëch ë spòlëznowëch prôw. Delegacëjô mòrawsczich
dzejarzów chce w lato òdwiedzëc Kaszëbë ë spòtkac sã z kaszëbsczima
aktiwistama.
(p.k.)
zaczątk
Kònferencëjô regionalëstów
31 stëcznika w gimnazëji nr 2 w Żukòwie òdbëła sã Wòjewódzkô
Kònferencëjô Szkólnëch Regionalëstów. Témą ji béł Jãzëk kaszëbsczi.
Referatów bëło sétme: prof. Edward Breza gôdôł ò statusu ë
rozwiju kaszëbsczégò jãzëka òb stalata; Stanisz Janke ò rolë
kònkùrsu Rodnô Mòwa w kùlturze regionu; Grégòr J. Schramke
ò kriteriach dobòru repertuaru na kònkùrs Rodno Mòwa z pòdanim
bibliografëji; Danuta Pioch ò kaszëbsczim jãzëkù w szkòle;
Eùgeniusz Gòłąbk ò kaszëbsczi wëmòwie ë akcence; Łukasz Grãdzecczi
ò dzysdniowëch prawnëch ùmòżlëwieniach, żëcznëch rozwijowi
kaszëbsczi mòwë; a Paùlk Szczëpta ò kaszëbsczim jãzëkù w mediach.
W przérwie wëstąpieniów zatuńcowało ë zaspiéwało fòlkloristiczné
karno Bazunë z Żukòwa. Bëła téż promòcëjô ksążczi Dzieje Żukowa
– zrëchtowónô pòd red. Błażeja Sliwińsczégò. Òb czas kònferëncëjë
béł jôrmark regionalnëch ksążków, a pò referatach wanoga pò
Żukòwie.
Jôbard
zaczątk
Zymk w Żukòwie
10 stëcznika 2004 rokù w Samòrządowi Gimnazëji nr 1 w Żukòwie
òdbëło sã, zorganizowóny bez hewòtny Ùrzãd Gminë ë ju wëmienioné
gimnazëjô, zéńdzenié Zymkù. Wiele ju razë w najim cządnikù
bëło pisóné ò ti resznoce, przëbôczëc dejade je mùs, że Zymk
to òtemkłé pòtkania młodëch ùtwórców kaszëbsczich, chtërnych
to zéńdzeniów brzadã je m.jin. pôradzesąt kszëbskôjãzëkòwich
dokôzów ë dwa lëteracczé zsziwczi z jich dzélã, wëdóné w 2001
ë 2002 r.
Pierszé zéńdzenié Zymkù miało môl w 2001 r., a żukòwsczé bëło
ju szóste w historëji resznotë. Bëło jinszé jak rëchlejsze,
bò chòc jak òstało rzekłe, zéńdzenia są òtemkłë dlô wszëtczéch
to jesz nigdë nie bëło taczégò, chtërnë bëło zrobioné przede
wszëtczim dlô lëdzy zeza Zymkù. Òkróm czëtaniégò dokôzów,
bëła m.jin. diskùsëjô ò jãzëkù kaszëbsczim (w tim téż ò nowich
ë cezich słowach w kaszëbiznie) ë dzysdniowi rodny lëteraturze.
Na pòtkaniu béł leno dzél Zymkù: Macéj Dorau, Róman Drzéżdżón,
Tómk Fópka ë Grégòr Jarosz Schramke. Zabrakło m.jin. dôwcë
ùdbë tich zéńdzeniów – Michała Piépera, znónégò chòcbë z pòeticznégò
zbierkù Wanoga pò mëslach.
Na lotos je mësla zrobieniô jesz dwóch-trzech zéńdzeniów,
a ju gdzes za pôrã niedzelów mô wińsc drëkã trzecy ju zsziwk
Zymkù, w jaczim naléze sã dzél dokôzów prezentowónych na łońsczich
zéńdzeniach, a téż ë tim żukòwsczim.
Jôbard
zaczątk
Òdszedł 20 lat temù
24 gromicznika minie 20 roczëzna smierce Lecha Bądkòwsczégò
– jednégò z nôwëbitniejszych pòwòjnowëch kaszëbsczich dzejôrzów,
a téż lëterata ë pùblëcëstë.
L. Bądkòwsczi ùrodzył sã 24 stëcznika 1920 r. w Torniu. Òb
czas wòjnë biôtkòwôł sã na rozmajitich frontach Eùropë (m.jin.
w Pòlsce, we Frańcëji ë Anglëji). Ju w Anglëji dôł sã pòznac
jakno kaszëbskò-pòmòrsczi pùblëcësta (z tegò czasu pòchòdzy
m.jin. wëbiérk dokôzów tegò zortu – Pomorska myśl polityczna)
ë dzejôrz spòłeczno-pòliticzny (béł jinicjatorã, wespółzałóżcą
ë zastãpcą przédnika Pòmòrsczi Zdrëszënë). W 1946 r. wrócył
na Pòmòrzé. Zaczął robic w pismionach, m.jin. w Dzienniku
Bałtyckim ë Rybaku Morskim, z wieloma téż wespółdzejôł (Pomeranią,
Polityką, Życiem Literackim ë jinszima). Béł m.jin. przédnikã
Założëcelsczégò Kòmitetu Kaszëbsczégò Zrzeszeniégò (1956);
wespółzałóżcą a téż pierszim przédnikã dzysdniowégò Karna
Sztudérów Pòmòranijô (1962); nôleżnikã Przédnictwa Midzëzakładowégò
Sztrajkòwégò Kòmitetu (1980).
Bądkòwsczi nôpisôł kól 30 ksążków ë broszurów, m.jin. Bitwa
trwa (1960), Odwrócona kotwica (1976), Sygnet Świętopełka
(1981). W 1964 przëtołmaczëł na pòlsczi Żëcé i przigòdë Remùsa
A. Majkòwsczégò.
Òstôł ùtczny wieloma ùhònorowaniama, m.jin. Krziżã òrderu
Virtuti Militari V klasë (1941), Medalã Stolëma (1978) ë Pieczãcą
Swiãtopełka Wiôldżégò złotë klasë (1982).
Je pòchòwny na gduńsczim Strzébrzëskù.
Jôbard
zaczątk |
