 |
| Na łôwce (wedlë tegò co je widzec) |
Sedzã so fejn na łôwce. Lëdze tak nó miã wzéraja, jak na jakąsz
głupią. Nie wiedzą przë tim czë jô jem białką, czë chłopa. Tegò
nie jidze ùzdrzec. A czë to je wôżné?
Jô téż, od wiela lat, ju nie wiém kim, abò czim jem. Nawetka
nie wiém czë jem człowiekã, czë roslëną. Czë móm dëszã, czë
zwiérzãcy jinstinkt, chtërny kôże przeżëc…
Jem òblekłô w stôré ruchna, chtërné są czôrné òd pichù zebrónégò
z bòkadoscë przeszłëch drogów. Cëż jô ni móm w swiece widzóné!
Wnetk wszëtkò. Przënômny tak mie sã zdôwô. Móm widzóné ë smiéch,
ë redosc, ë żôl, ë smãtk, ë jiwer, ë płacz, ë codzennosc… Jo,
ti codzennoscë bëło jaż za wiele.
Wãdrowanié to je mòjô nôtëra. Wãdrëjã òd wsë do wsë, òd miasta
do miasta, òd lëdzy do lëdzy, żëjąc z tego co dô mie Bóg w lëdzczi
pòstacëji.
Dzysô so fejn sedzã w môłim miesce na łôwce ë zdrzã. Zdrzã na
ten côłi jôch jaczi wkół panëje…ë ten ògłëpiałi fyrt. Dërch
flot, dërch flot…
Spòkójnosc – to je to, co człowiekòwi je nót. Pòmalinkù, pòmalinkù.
Bez żódnégò krzikù, bez jiwrë… Jô móm spòkòjnosc w se. Wkół
mie bùdëjã spòkòjnosc, ë baro nie lubiã, czedë mie chtos bùrzi
na mòjã skòrëpã spòkòjnoscë.
Naprocëm mie sedzy stôri człowiek. Fùtrëje szpóczi. Pewno ni
ma co do gãbë włożëc, a fùtrëje. Gwësno jémù sã zdôwô, że fùtrëjąc
szpóczi, je dobri? Nie chce ze mną gadac. Smierdzã. Wiém ò tim!
Smierdzã przeszłą drogą. Smierdzã zmòklëzną. Smierdzã biédą.
Jo! Wezdrzã biédno. Tak biédno, że lëdze nie chcą wzérac mie
w oczë. Nie chcą ùzdrzec se w mòjim malënkù.
Pijã tónié wino. A cëż! Cëż mie ostało w tim swiece. Blós picé
tónégò wina. Nie mùszã tedë jesc, ani nick.
Nick nie mùszã!
A co je nôgòrszé?
Nôgòrszô je na samòtnosc, chtërnô mie grëze òd bëna.
Le wiém ò tim, że nadéńdze taczi czas, czedë wkół mie bądze
wiôldżé karno lëdzy taczich jak jô. Mdą òni, tak jak jô, sedzelë
na łôwce. Nie mdze ju samòtnoscë. Mdą gôdczi ë gôdczi. Nié ò
dëtkach, le ò prôwdzëwim żëcym.
A cëż to je prôwdzëwé żëcé?
Ne cëż, wcyg nad tim mëslã…
R. Drzéżdżón
zaczątk |
|
| 
|
| Na Jinternece nigdë ni
môsz
wszëtczégò…
żebë miec wiedno całą Òdrodã, wiedno na czas – òbacz tuwò
Mòżesz nas wspòmòc w wëdôwanim abò kòlpòrtażu?
Napiszë do naju!
|
|
