Czej w 1991 rokù bracynowie Tadeusz ë Andrzéj
zaklôdelë firmã, gwës nie wiedzelë, że ju wnetka mdą mielë
jednã z nôwikszich na Pòmòrzim séc krómów z bùdowlanyma materialama.
Jich
pierszô firma zajima sã przede wszëtczim handlã szitama ë
fùdrã. Z latama zaczãło sã to zmieniac ë czej w 2002 rokù
firma wzã miono BAT, handlowa ju le artiklama do bùdowë chëczów.
Samò BAT je skrócënkã òd nôzwëstka ë mionów bracynów: Bigùs
Andrzéj ë Tadeùsz.
– Co je baro wôżné w naszi firmie, to kaszëbsczi etos robòtë,
jaczi pòlégô na ùtcëwòscë, zychernoscë, pòwôżnym stosënkù
do robòtë – wëjasniwô Czesłôw Pòbłocczi, òd wiele lat czerownik
marketingù w BAT – Je to fakt, że na Kaszëbach òd wiedna bëłë
letczé zemie, jaczé nie dôwałë tak bëlnégò zbiéru. Lëdze bez
to òb pòkòlenia sã przënãcëlë, że je mòżno do czegòs dóńc
le cãżką, długò dérëjącą robòtą, a nié z dnia na dzéń.
Mòżno sã spòdzéwac, że kòle 100% robòtników to są Kaszëbi,
ale że na co dzéń sã gôdô pò kaszëbskù w robòce to gwës nié
w kòżdi firmie. Je to dosc normalné, czej wchôdóm do sedzbë
firmë przë szasëji Mirochòwsczi w Serakòjcach, że je czëc
le blós rodną gôdkã.
– A kò to je zwëczajné, że nie gôdómë w cëzëch jãzëkach –
òdpòwiôdaja mie zapitóny ò to robòtnicë w firmie.
– Kaszëbizna w żëcym ë w gôdcë sã przekłôdô na kaszëbsczi
etos w hańdlu – gôdô Cz. Pòbłocczi. – Chòc òficjalné pisma
czë rechùnczi ni mògą bëc pisóné pò kaszëbskù, firma achtnie
rodny jãzëk na taczi ôrt, że wszëtczé gòdowé czë jastrowé
żëczbë sylóné do robòtników, wespółrobòtników czë kòntrahentów,
a téż emitowóné w rediu, są wiedno pò kaszëbskù.
Firma òd lat zajimô sã wspieraniém kaszëbiznë, a bracynowie
są aktiwnyma dzejarzama Kaszëbskò-Pòmòrsczégò Zrzeszeniégò.
Tadeùsz je terô przédnikã partu, Andrzéj béł w ùszłi kadencëji.
Firma je dobrzińcã wielu kaszëbsczich rozegracëjów, z jaczich
nôwôżniészi je Kònkùrs Rodny Mòwë w Chmielnie, jaczi je òd
dôwna wspieróny przez BAT-a. Niedôwno firma zaspònsorowa dwie
platë CD: kaszëbsczégò karna Kùtin ë platã z kòlãdama, jakô
bëła dołączonô do Dziennika Bałtyckiego 22.12. Dzéń chùdzy
mógł słëchac nëch nagraniów reno w Redio Gduńsk.
– Kòl nas doma sã wiele spiéwô, równo tatk ë ùja lubią spiewac
w familëjnym karnie – gôdô Łukôsz Bigùs, przedstôwca młodégò
pòkòleniégò Bigùsów. Sztudérëje pierszi rok ekònomije we Gduńskù.
Nie dzëwòta, ze bracynowie wspiérają robòtã mùzyków. Òsoblëwie
karno Kùtin, jaczé je czësto nowim zjawiszczã w kaszëbsczi
mùzyce. Nie je to mùzyka lëdowô, le spiéwónô pòézëjô. Tekstë
są wzãté z dôwnëch ë tereczasnëch kaszëbsczich pòétów.
Rodzëna pòchôdô z Kawelków kòle Srôkòjc, ë wszëtcë czëją bùchã
z tegò, że są Kaszëbama ë mògą kaszëbiznã wspierac. Jaczé
je znaczenié taczich lëdzy ë firmów? Wiôldżé, bò dzãka nim
kaszëbskô kùltura mòże sã normalno rozwijac ë lëdze mògą pòkazac
jinszim, jaka wôrtnotą je kaszëbizna. Mòżemë téż na taczi
ôrt pòkazac, że rozmiejemë sã wzójno wspierac w biôtce ò ji
przedërchanié.
P. Kąsk
zaczątk |